9
Nan Akaya go blong duoyap dali-dali taiti yaluim sogo
1 Ayanang, mianang! Yakena Yerusalem sogo blong duoyap tebok genang, ta logo mea kua plong, sam ba nogo mea kua klik-silu dali. 2 Seni so, genam mo senong: tetebok genang motnang mo duduing gemang. Ngga, sikabung Makedonia nogo, ngge kalik so genam lo mo pen, “Yagui nayum go sik so, nan Akaya logo duoy dali mo yaluim-sing.” Seni so, motnang go tasam ngga sik so, Makedonia sikabung mata sogo ngga kalik tebok dali genang don so mo iti. 3 Nggeasui go, motnang sono genam lo mot-dak go andua-andua ngge koklong go, ngga ey, motnang go sui, blo sono genam lo pupu go ngga, seni ey lemoy genang. Yang! Genam lo pen go kalik, motnang sikabung Akaya logo taiti, dali tui-sing go se gigit. 4 Nago no, nan Makedonia sik sogo andua ey genam weng go be, dali motnang lo kua ta go ikum go, atnang suongsut genaning. Seni so, ngga atnang nogo so kua, no motnang nogo suongsut. 5 Ngganemot sogo so, banim andua-andua ngge genam lo mot-dak go gabe koklong. Genam maning kua pung gono, tegadi so dok go taiti ngga, nemotnang lo yaluim genang. Nago no atnang weng go nogo, taiti ngganemot, dabui yakay ey dali-dali motnang lo semu-sing go gemang gigit. Taiti ngga ta lo plong go sik so kua.
Yakay ey iti go taiti go seni
6 Se senong: nangglik ey nando lo bubluim go, nangglik dato so mea buo; mata so bluim go-a, mata dega so mea buo. 7 Dabui ba no iwat go-a se iti! Dabui ide ey ta lo plong gono kua iti. Se senong: dabui yakay ey iti go nogo-a, Ki Wali Iram go gualaklum gemang. 8 Ki Wali Kumam blongdon dega ey! Motnang nogo, tong kua tong go taiti walipega-a, mea uweng. Ngga ey, motnang go wali ba nogo mea tetey! Ngga sik so, tasam suey go-a pupluok genang, mea pupung dali. 9 Wali Sam klaut no klik go kalik,
“Taut kua go sikabung nogo,
suey so dabui lo nemot gemang uwasey.
Seni eygo nemudi sogo pupluok go-a,
senang so mea gigit, yakua nega.” (Mazmur 112:9)
10 Yang! Usu no bluim genang wasma nok, ten dedam, Ki Wali Iram lo dali ta-sing go gemang gigit. Wasma nok kalik, motnang nogo taitiklum Ki Wali Iram lo mea ta-sing dali. Ngga sik so, motnang lo uwasey go, kangok so tagot dali genang. 11 Motnang nogo pega, taut, blong naklay mo ikak-sing gemang. Guala sik so motnang se uwasey. Ngga ey, Yerusalem sogo blong duoyap nogo, atnang go ta lo iti go mea klong. Guala ngga tang so, Ki Wali Iram nogo taitisuey mata so dabui lo mea keklak. 12 Se senong! Motnang lo yaluim go duoy ngga, blong duoyap go wali no tebok genang seguong-a kua. No, Ki Wali Iram nogo taitisuey keklak dali genang. 13 Suey so dabui lo guala ey motnang uwasey go sik so, Yerusalem sogo blong duoyap mea senong: Iram Yesus logo deguo teguop no, tupduk go Akaya sogo blong duoyap dabui lo gemang kekeng! Ngga tang so, blo sono Ki Wali Iram nogo iway nemotnang lo gabe lelek. 14 Ki Wali Iram go taitiklum motnang sono miam ey uweng go ikum go, yakay ey dewi ngge kalik gemang ya keklak, “Ki Wali Aya! Akaya blong duoyap ey atnang tegu sogo se!” 15 Ngganemot sogo so, Ki Wali Iram nogo, taitisuey kangok so imot naklay lo se keklak, “Atnang no Mot lo iti go taiti, ngga Iram Yesus! Taiti ngga kangok dega. Lom seguong logo-a yakua pu.”