8
Yerusalem nogo taiti yaluim genang
1 Dem-debui, blong duoyap! Nan Makedonia sogo blong duoyap no taitiklum Ki Wali Iram lo taling go, motnang se senong. Seni so! 2 Nemot-a koywong, idekeba iseng tra go, nemotnang yakay kangok. Taut kua go, no nemotnang ba nogo nenem-yakay ey sikabung meno no taiti tebok genang-a, kangok so mo pluok. 3 Gabe pen-asitugu: duoy kangok so nemot go don ey i go-a, nemotnang klay-klay lo mo iti. Seni so, babu dega so mo iti gemang! 4 Atnang no ta logo ey, nemotnang tang golo mo plong, “Yakena Yerusalem sogo blong duoyap nogo taiti, atnang logo mea tebok.” Ngga, dabui ba sik so, nemotnang tang so mo wa. 5 Mata dega so nemotnang lo mo yaluim. Atnang lo duing go, duoy seguong-a kua. No, banim temu no, wali saysuk eygo naklay, Ki Wali Iram go duduing no, Woy Dem sono mo itak. Ngga sik sogo, atnang nogo nemotnang go wali gabe iti dali. 6 Nemotnang ikum go sik so, keduong so kebali motnang lo tamlak go sik so, nggeasui go teguop so naklay se yaluim. Ngga nang so, Titus dem-a, gabe mot-dak go koklong. 7 Dem debui, blong duoyap! Naklay senong go sikabung motnang gabe: dabui iti go kekeng go; senongduduing; nebut kalong ey pen go; takebali usey genang. Motnang go dabui ba nogo, klum atnang lo bluim go sik so, ngga naklay mo pung gemang. Ngganemot sogo so, klumkebali suey go-a, teguop so motnang se pupluok. 8 Ngga kalik pu go, motnang so ta lo kua plong. No, sikabung temu tebok go taling go sik so, motnang go dabui mea ikum.
9 Imot go Woy Dem Iram Yesus lo taling go klum, motnang mo senong. Nemot-a, blong dega eygo, imot tang sogo so blong-taut kua goso, Nemot mo lemoy. Ngga ey, waliblong eygo so, imot-a lemoy genang.
10-11 Motnang nogo seni dega eygo, genam senong go-a gabe pen-asitugu: yagui nayum gono, dabui klaut no yaluim genang so, ta mo mlak. Nggeasui go dabui klaut dali no ngga naklay yam so se yaluim-sing. Ngga kalik go, nebutpen seguong-a kua, dabui iwat golo go takebali ey kekayso se pung. Nemotgo-nemotgo don ey i go sik so, se iti-sing. 12 Dabui iwat golo iti go taiti-a motnang se iti! No, gemang go sik so, motnang logo se iti, kua go sik sogo yakua iti! 13 Genam lo duing go: blong duoyap temu-a iwa go, motnang no ide glung genang so kua. No, ide kerlam so lek genang so gabe. 14 Motnang go wali mo nemot go sik so, Yerusalem sogo blong duoyap taut kua go nogo se tebok dali sang! Motnang sogo-sogo kua go ku nogo, nemotnang lo tebok dali sogo be. Ngga sik so, kuso-bloso imot naklay kua suing, suey so mea wali. 15 Wali Sam klaut ba no klik go kalik,
“Miam ey nando lo yaluim go,
temu eygo kua itak.
Nangglik ey nando lo yaluim go,
ta kua temoy go kua dali.
No, kerlam seguong so mo nemot.” (Keluaran 16:18)
Tebok go yaluim so Titusnang klong go
16 Senang so Ki Wali Iram nogo taitisuey at lo gabe keklak! Motnang nogo so, Titus go dabui ba Ki Wali Iram lo mo pluok. At go dabui ba no pluok go kalik. 17 Tandali motnang blong duoyap Korintus sono Titus klong genang so, at lo usi go, nemot tang so yakay ey dabui lo mo iwat. 18 Titus ey keng genang andua meno atnang lo mot-dak go mea klong dali. Yang! Wali kebali suey so tebok go tang so, nemot nogo blong duoyap yakena-yakena lo ta ey gabe kokong. 19-20 Ngga ey, atnang ey Korintus no klong genang so, dem nggenemot nan Makedonia sogo blong duoyap lo mo kuoy. Atnang go kunala suey go ikum go, Woy Dem go sui-a blo sono ibe lo i-iti genang. Makedonia sik sogo tamot ngga, atnang ey mot-dak go mea klong dali. Taiti kangok go atnang lo iti go klong go ngga so, nebut piam go sikabung temu lo pu genaning. 21 Yang! Kebali ngge nemudi so suey so atnang lo pluok genang-a gabe duduing. Woy Dem go suongku nogo-a kua. No, sikabung go suongku nogo, ngga kalik gabe pupluok dali.
22 Yang! Yakena Korintus no Titus ey klong go tebok genang andua meno, mo taling dali gabe. Andua ngge go takebali, dabui naklay suey seni. Da kata yam so ngga atnang lo mo ikum. Nggeasui go, motnang no tebok genang so dabui iti go tang so, don ey kebali nemot lo gabe pupluok. 23 Seni so, Titus dem ngge genam go andua gabe. Motnang no tebok genang so kebali klay gono atnamon lo pluok go. Nggano, andua namon meno ngga, nan Makedonia sogo blong duoyap lo mot-dak go. Ngga tang so, Iram Yesus no ibe lo ta gabe kokong. 24 Ayanang, mianang! Andua namon mot-dak go ngge nogo, motnang go klum dabui lo se taling! Ngga tang so, blong duoyap temu senong genang: motnang go klum seni ey gabe taling. Ngga ey, motnang go sui blo sono atnang lo iti go, seni ey mo lemoy.