2
1 Ayanang, mianang! Dabui ba no iwat go mo pu-yu: u kluo ey goso, tandali motnang ikum sogo genam mea kua klong. 2 Dabui ba nogo motnang no u tap genam lo taling go, genam don kok genang nebutmang nando lo ya king? No, genam tang sogo so motnang u kukluo go, sogo kalik yakay ya pung? 3 Ngga nemot sogo so, banim sam mo klik-yu, “Motnang ey tandali genam tegu go, u kluo genang genam moyso! Yakay genang so, genam mea pung Ngga ey, genam go yakay, motnang ey klay goso lemoy genang.” Yakay ngganemot pung genang, kangok so genam mo duing. Motnang, dabui ide genang sogo so, kua! 4 Esang, sam ngganemot dabui ide ey, u ba lo mo klik-yu! Seni so, iseng motnang lo tra genang, genam moyso! No, motnang sono klum taling genang-a, genam mo duing.
Kuklue pluok go sedue tandali se klum
5 Yang! Kuklue so pupluok go sedue, a genam go dabui seguong-a kua waluk gabe. No, motnang naklay go dabui waluk go u kluo genang tap, mo taling dali gemang. Seni so: ngga sikabung naklay lo kua, no miam dali so gemang. Tebadali blo sono go genam logo yakua pu. 6 Ibe damoy so, taybat so pluok go sedue no idekeba taling go, nemot lo! Sikabung mata sogo lo yang go, tandali go kua taling. 7 Yang! Nemot go kuklue ngga sono motnang se kay! Dabui don kok genang sogo, nemot no yakay nebut-a se pen! Dabui lek go nemot kebong genaning. 8 Motnang nogo nebut drom, gabe king-situgu, “Blong duoyap ba sono klum ba lo nemot se wawi.” 9 Seni so, banim klik-yu go sam ngga seni meno gemang dali. Ngga ey ikum genang: genam lo taling go tap naklay, tupduk so motnang dabui lo kekeng? Kua? 10 Yang! Andua go kuklue, motnang lo kay go, genam logo mea kua duing dali. Iram Yesus go suongku no nemot go kuklue, genam logo se kay dali. 11 Kunala temoy no se! Imot sik sogo seni, Kupiamgo lo, buo eygo. Seni so, Kupiamgo logo uwaluk go tap, suey so imot mo senong.
Nan Makedonia no Paulus klong go
12 Yakena Troas no pung go, Iram Yesus go deguo teguop pepen genang, walikebali pluok genang tap suey go, genam nogo Woy Dem lo mo kebuo. 13 No, Titus dem, kua tegu go tang so, dabui ide ey tra go, taitisuey pu go, nan Makedonia sono genam mo klong.
Wali kebali nogo kinemon suey goso imot se
14 Ki Wali Iram nogo-a, kangok so taitisuey genam lo gabe keklak. Seni so, Iram Yesus ey klaya lemoy go tang so, imot Ki Wali Iram lo wawi go, senang so gabe koklong. Yakay ey don ey suing go iram lo wawi go kalik. Yang! nago-nago no, ibe no Iram Yesus sogo deguo teguop imot lo wasey go, kinemon suey goso gabe tetengin. 15 Seni so, Ki Wali Iram nogo taiti teguop Iram Yesus lo puit go, wali sono sesuoy so pung genang, itak go kebong genang sikabung eygo nesip no, kinemon so imot gabe. 16 Itak go kebong genang sikabung nogo, nemon pegop goso, imot mo lemoy. No, wali genang sikabung nogo, wali kinemon so, imot mo lemoy gabe.
Gabe usi-situgu: walikebali ngga pupluok genang, nando-a don eygo ya ip? 17 Se senong: drang uwet sogo so, sikabung miam ey wali nebut-a gemang pepen. No, ngga kalik so atnang kua duing gabe. Yang! Nemot go suongku no, Ki Wali Iram lo mot-dak go tang so, Wali Nebut nemudi so, Iram Yesus ey dabui lo atnang gabe pen klong.