3
Korintus sogo blong duoyap Ki Waglo lo dok go
1 Atnang Ki Wali Iram tang golo mot-dak goso pu go ngga, blo sono sui-a iti-etugu? Kua! Sikabung temu logo kalik tamot sogo sam teguopey atnang yakua taling. Ngga ey, motnang nogo ey, motnang eygo logo sam, yakua taling dali. 2 Kua kay! Atnang nogo sam ngganemot, genam go dabui ba no klik go, nenguon so ibe lo i-ikum go, motnang tang go gabe. 3 Iram Yesus go sam motnang gabe. Dinekuoy lo kua klik. Ngga, dabui ba no, atnang go kebali sik so, Ki Wali Waglo lo klik go. Demu temoy no kua pung-sing gabe. 4 Yang! Iram Yesus tang so, Ki Wali Iram go suongku no, don ey gabe pen-asitu. 5 Kebali ngga Ki Wali Iram go senong don logo-a gabe pupluok. Atnang go senong don lo kua pupluok gemang. 6 Se senong: tap ngga atnang no Ki Wali Iram tang golo mo taling. Demu temoy no ta lo klik go kalik kua. No, Ki Wali Waglo lo dok go tegadi gabe. Ngga tegadi inim gabe! Ngga nang sogo kebali sedue so, atnang gabe lemoy. Yang! Demutrui ta lo klik go logo, kebong sono gemang tetaling. No, tegadi inim Ki Wali Waglo lo dok golo, sikabung sesuoy so mea wali.
Ki Wali Waglo to taling tap blong dega ey
7 Tegadi banim go, kebong sono tetaling go, demu temoy no klik go, no, blong ey mo iti-ngam. Se senong: Musa go nebuemnemu nogo, blong ey. Sikabung Israel ikum sogo, yakua. No, blong ngga tandali mo kenip. 8 Tegadi inim, Ki Wali Waglo logo so taling go-a, blong dega ey mo pung, tegadi banim go ey kua kerlam. 9 Se duing! Woy-banu go kuklue so neyboy go tegadi banim go, blong eygo, wali sono sesuoy genang tegadi inim-a blong kangok dega gabe. 10 Yang! Banim no blong eygo ngga, nemot go seni nggeasui go blong eygo kua kerlam. 11 Ngga kalik blong ey kenip genang pung go, seni-seni yakua kenip genang-a, naklay blong dega ey gabe.
12 Seni so, ngge kalik dabui atnang iti go tang so, ibe sono go kebali pupluok go, don ey atnang lo gabe pepen klong. 13 Musa kalik atnang kua gabe. Blong ngganemot nenega go, blung Israel ikum eygo so, amka lo nebuemnemu Musa mo kebet. 14 Esang! Blung Israel go kunala ngga sik so gemang saguip. Tegadi banim go seni, maning amka lo kebet go kalik gabe gigit. Yang, Iram Yesus seguong logo so, nemot so kebet go lek go, seni mea truk. 15 Seni so, nggeasui go ku no pung go, maning Musa lo klik go demu ngganemot-a i-ikum go-a yakua senong. Nemotnang go dabui ba sogo, amka kalik kebet go gemang gigit. 16 No, Woy Wali Iram sono dabui iwot go-a, ku ngganemot no blong so kebet go amka, ngga sono mea plet-dak. 17 Seni so, nebut ngge ba no pepen go, ‘Woy Wali Iram’ ngge, Ki Wali Waglo! Nago no Ki Wali Waglo gigit go, sesuoy so taitak go tap ngga gemang. 18 Yang! Nebuemnemu kua kebet goso, nenguon so Woy Wali Iram go blong, blong duoyap logo gabe i-ikum. Ngga ey inim goso imot Ki Wali Waglo lo gabe i-iwot. E... blong eygo so Woy Wali Iram kalik, imot mea lemoy.