4
Ki Wali Iram go blongdon lo Paulus gabe pepen
1 Wali inim taling klong genang kebali ngge, Ki Wali Iram go gualaklum logo so, atnang sono gabe itak. Ngga tang so, nisonoso wali kebali gabe pupluok. 2 Maykok sogo, suali eygo tap atnang logo, mo itak. Duduing namon eygo atnang kua koklong. Ki Wali Iram go deguo teguop, idi logo yakua iwot-sing. No, way so neguon so ibe no seni sogo walitap-a atnang lo gabe tetaling. Sikabung ey tegu go, ngge-a gabe pepen, “Ki Wali Iram go suongku no, atnang tang go seni-a, motnang go dabui iku lo se ikum.” 3 Esang! Dabui ba nogo deguo teguop atnang lo pepen go, maning kua mlak go, ngga amka lo pok go kalik, waluk genang tap lo koklong sikabung gemang. 4 Ki Wali Iram no kua keng go ngga, kukunan go don lo yam so kunala mo saguip. Ngga tang sogo so, Iram Yesus go blong, deguo teguop ibe no ngap go, yakua ikum. Yang! Iram Yesus ngga, Ki Wali Iram tang go sam gabe.
5 Atnang go saysuk so kua pepen, no, Iram Yesus imot go Woy Dem so, atnang lo pen klong go gabe. Yesus lo mot-dak go tang so, motnang nogo kebali sedue so atnang mo lemoy, sang. 6 Ki Wali Iram lo pen-ngam go, “Kuklik ba sik so, blong mea ngap.” Yang! Imot go dabui ba no blong ngga mo king gabe. Ngga ey, Ki Wali Iram seni senong genang wagloblong-a imot nogo mo iti gabe. Blongdon ngga Iram Yesus go nebuemnemu sik so taling go atnang mo ikum. a
Saysuk ngge ba no wagloblong king go
7 Nan sik so semu go saulabon, saysuk ngge ba no wagloblong ngga king go imot gabe gigit. Ngga ey senong genang: wagloblong don dega eygo ngga, Ki Wali Iram sik so uweng go, atnang tang go sik so, kua pung. 8-9 Ngga sik so duing go se senong: ide naklay ba no kenok go nogo atnang kua nedik; yam so kunala tebot go nogo, atnang kua nega; duk go truik go, demun suey go, day ba no betep go nogo, banom go genam kua itak. 10 Kuno-woyno Iram Yesus no keng golo tra go kebong iseng, genam go saysuk lo lek go gabe uwet. Ngga sik so, Yesus go wali-a, genam go saysuk ba nogo, way so pung sogo be. 11 Yesus tang sogo so, atnang, maning uwali go ngge, kebong lo gabe lelek. Ngga ey, buin genang saysuk ba no Yesus go wali-a imot nogo pung genang. 12 Se senong: atnang go saysuk ba nogo, kebong logo kebali-a pupluok, way so motnang ba nogo wali-a gemang pupung.
13-14 Wali Sam klaut ba no klik go, “Ki Wali Iram no, genam gabe kekeng. Keng go tang sogo so, gabe pen-asitugu.” b
Ngga kalik dali, Ki Wali Iram no dabui iti go tang so, Iram Yesus, atnang logo gabe pen klong. Yang! Woy Dem Yesus, tandali Ki Wali Iram lo nglong go, atnang mo senong. Kebong sik so genamnang Yesus kalik, Nemot lo mea nglong dali. Nggano, motnang ey kerlam so, Nemot go suongku no atnang Ki Wali Iram lo mea yaluim-sing. 15 Motnang nogo so, iseng ngga naklay gemang lelemoy. Ngga ey, Ki Wali Iram logo gualaklum, dabui iti go sikabung no uwasey golo, Ki Wali Iram sono takong genang taitisuey kangok so mea keklak.
Kebong sogo dabuibelui kua tra
16-17 Nggeasui tetra go iseng seguay go ngge mea yam. Yansi go senang waliblong, atnang nogo iseng ngge lo gabe lelemoy. Yang! Blong kangok dega go nogo, tandali go iseng ngge yakua duing. Ngga tang so, dabui belui go wali kebali yakua itak gabe. Nemot-a kuno-woyno genam go saysuk ngge uwaluk go, kuno-woyno demening goso atnang go waglo-a gabe lelemoy. 18 Nemu lo i-ikum genang-a atnang lo kua uwet. No, nemu lo kua ikum go-a gabe uwet. Ikum-eton go ngge mea nega. No, kua ikum go-a senang so mea gigit.