8
Demat nogo so tong go menay
1 Demat no takong genang so menay tong go kunala, motnang lo mo klik dali, “Yang! Blong duoyap go senongduduing gemang.” No, banim ngge kalik mea pen-asilu. Senongduduing seguong logo, dabui tategue ey, saysuk nogo dewi-a woy-banu gemang bubut. Klum logo-a, wali ngge mea bubuong. 2 Nando lo duing go: naklay mo senong go, genam dega gabe. Esang! Nemot-a maning senongduduing nenega so. 3 No, Ki Wali Iram no klum ey dabui iti go-a, nemot ngga Ki Wali Iram lo senong go mo mlak gemang.
4 Demat nogo so tong go dasi dedam go nebut gabe pen-asitugu, “Seni so imot mo senong! Kukunan blo sogo demat kua gabe! Ki Wali Iram seguong-a dui ey, klaya gabe got-aton.” 5 Nemot-a, tebadali woy-banu lo duing go: ut ey nan eygo sogo, ida mata so gemang. Ngga kalik duduing go, kukunan ida ey, don meno-meno, mata dega so gemang. 6 No, imot-a ngga kalik go kua duing: Ki Wali Iram klaya seguong gabe. Ngga Ki Wali Kumam, ut-nan, sikabung, wi-dasi, taut naklay-naklay ngge, Nemot go blongdon sik so, gabe lemoy-angum. Nemot nogo so imot gabe wali-eton. Nggano, Woy Dem klaya dali! Yangga, Iram Yesus-a. Nemot logo tang so, ngge naklay lelemoy go gabe. Yang! Imot, Nemot logo so gabe wali-eton dali.
7 Senongduduing ngga, maning suey so naklay lo kua mlak. Blong duoyap temu gemang. Maning kangok so demat no duduing go tang so, demat no iti go ten, nemotnang kua dedam. Dabui-iku don kua go nogo, ten ngga dam golo, ide ey gemang tetra. 8 Se senong: Ki Wali Iram dagu sono go, imot tendam logo yakua wawi go pung. Ten dedam go kua dam go, imot no tebok go, kua, nega go kua dali. 9 Kunala temoy no se! Tang kua usi goso, Woy Dem ba no tebadali taitak goso mot lo dam klong go logo, dabui don maning kua kok go andua meno, pui genaning. 10 Se duing! Idayap ba no, taiti nang sogo ten mot lo dedam go, dabui don kua go andua lo ngga ikum go, nemot ey yakua lek? Ngga kalik pupluok golo, motnang go waglodon eygo logo, tap piam go sono nemot gemang tetenget. 11 Kua kay! Andua, dem-debui, waglodon kua kok gono so Iram Yesus mo kebong gabe. No, motnang go senongduduing don eygo tang so, piam ba sono pui go, nemot gemang ne ya nega. Esang! 12 Ngga kalik go tang so, andua dem-debui nogo tasam piam go, mot lo gemang tetaling. Nemot go dabui-iku kenip go tang so, Iram Yesus nogo kuklue mot lo gemang pupluok dali! 13 At tang so gabe pen-asitugu, “Genam go andua, dem-debui nogo, tendam sik so kuklue so lelemoy go, menay ngga se dega. Ngga kalik go, genam go andua mea kua pui.”