9
Tamot tete sogo ey kebali ey
1 Esang, dabui klum! Motnang lo klik go, “Paulus ngga Woy Dem go tamot seni kua. Ta mo itak go sedue, nemot kua.” Mo kay? Imot go Woy Dem Yesus, genam ikum go. Woy Dem ba nogo, genam go kebali don tagot goso motnang lemoy go, kua duing? 2 Genam sogo, Woy Dem go tamot so sikabung temu lo kua pu go, nueya! No, ngga kalik go motnang logo yakua pu! Woy Dem go tamot motnang nogo genam ngge gabe. Woy Dem no motnang keng go tang so, ibe mo senong: Paulus ngge, seni so, Woy Dem go tamot.
3 Genam tamot sogo waydang go sikabung benom genang nebut way, gabe pen-asitegu: 4 tendam-budrop genang, atnang tete sogo yakua wadong? Genam logo se pu dali: 5 walitap so pen klong gono tebok genang kluay debui meno at logo, yakua iti? Esang, genam logo mea iti dali! Tamot-tamot temu, Petrus-dem ey Woy Dem Yesus go ntatonnang eygo tete sogo ngga kalik mo iti gemang. 6 Sogo temoy no at ey Barnabas eygo-a ten nang sogo duoy seguot lo ya u-usey? 7 Se duing: plesedue nando-a mo? Plepung genang duoy nemot tang golo uwet go? Esang, ngga kalik go plesedue, kua. Nggano, nando-a mo? Usu semu go nogo, seni iti go kua dam go? Ngga kua lemoy. Nggano menay domba, nemot-a pong go, minip sik go, yakua dedrop go? Kua, nemot mea drop dali. 8 Ibe lo pen go kalik, nebut ngge kua. No, Wali Sam klaut ba no demu ngge mo nguok dali. 9 Ngge kalik Musa logo demutrui no mo klik, “Usu kebali so sesemu go sapi, lom tegan kua dok!” a
Sogo kalik ngga mo klik-ngam? Menay nogo-a kangok so Ki Wali Iram lo mo duing goso? 10 Ngga seni so, sapi so kua pen. No, imot, kebali sedue so, pen go. Seni so, usu so klik go sedue ey, wasma so tutuet go kabung eygo, nemot tete sogo iti genang duduing ey, kebali gemang sesemu. 11 Wali wime motnang nogo wasma kalik suey so mo bluim. Nggeasui go, wasma tagot gono, atnang wali genang tete so, taut way so usi go, ngga piam so mo pu? 12 Seni so, drang so tamot temu lo wadong go, keda so nemotnang no iti go, atnang nogo sogo kalik? Wali kebali, kangok so atnang lo mo pluok! No, at logo kua wadong. Ide ngga atnang tang so mo lek gabe. Iram Yesus sogo walinebut pepen go, ngga lo puem genaning. 13 Kua kay! Banim go Ki Wali yap ba sogo kebali sedue ngga ba sogo lo gemang uwali. Yang! Taiti sip ngga ba sik so iti go-a, taitisopuitgo trang-trang logo mea dam dali. 14 Ngge kalik Woy Dem lo mo pu, “Deguo teguop so pen klong go, ngga ba dali sik so se uwali!”
15 Se senong: motnang sik sogo, genam tete sogo ngga, pu go kua iti. Ngga semu genang so, kua klik-situgu gabe. Ngga kalik go, genam-a kebong go, suey! Yang! Blo sono at go sui Ki Wali Iram lo iti go, sikabung logo yakua lek. 16 Seni so, deguo teguop genam lo pepen go sogo, dabui ta genam kua tegue. No, kebali ngga, dabui lo genam se semu klong. Deguo teguop at logo kua pen klong go-a genam segaplu. 17 Tebadali kebali ngge, genam go duduing no pupluok go, genam go seguot duoy mea wadong. No, at go duduing tang so kebali ngge, kua gabe. Genam blo sono Ki Wali Iram lo glung go tang so, gabe pluok-satugu. 18 Sogo kalik go drang-a, genam go seguot pung go sogo, ya iti? Motnang se senong, “Genam go ‘drang’ ngga, genam lo deguo teguop yakay ey pepen klong genang sogo kebali, ngge gabe. Nemot-a, genam tete sogo gemang, no ngga genam logo kua pu gabe.” 19 Se senong: nemot-a, sikabung naklay nogo ta mo itak go sedue genam gabe. No, way so, saysuk ngge, sikabung naklay nogo koybutasemu kalik, genam mo itak. Ngga ey, walitap sono sikabung mata so genam lo wawi genang. 20 Ikum-a! Woy Dem go tap sono sikabung Yahudi wawi genang, Yahudi go tap no genam gemang kekeng dali. Se senong: Musa go demutrui logo-a genam kua dok gabe. No, Woy Dem go tap sono demutrui lo dok go sikabung wawi genang, demutrui no genam mea keng dali. 21 Nggano, Musa logo demutrui no kua keng go saula meno eygo, nemotnang kalik dali genam gabe lemoy. Ngga ey, walitap sono nemotnang genam lo mea wawi. Suey so se senong: Ki Wali Iram logo demu itak go sedue genam kua! No, Iram Yesus go demu logo-a genam mo dok gabe. 22 Nggano, Iram Yesus no dabui iti genang don kua go eygo, klaya so genam gabe lemoy. Ngga ey, wali sono nemotnang wawi genang. Yang! Sikabung naklay eygo, ngga kalik so genam gabe pupluok. Ngga ey, wali sono nemotnang wawi-sing genang. 23 Deguo teguop nogo so, ngga naklay genam lo pupluok go, deguo teguop ba so kok go tegadi blongdon, yakay, genam tete sogo mea iti.
24 Kua kay! Rlam so kuek genang denok, mata so sui mea klik. No, rlam ngga sik sogo nali klaya duo seguong lo mea iti. Klaya duo nali iti genang kalik, walitap no motnang-a keng go se kuek dali! 25 Rlam ba no degut sogo, saysuk don suey so mea kokok. Nali ngga iti sogo so, ngga kalik nemotnang logo gemang pupluok. Esang, ngga buin genang nali. No, senang nali kok genang-a, imot logo gabe usey-eton. 26 Ngga sogo so, tebadali genam kua kekap gabe. No, seni eygo sono nemudi so gabe kekap. Nemu kua tong goso bubut go sedue lo kalik, genam kua bubut gabe. No, nemu tong gono, suey so seni-seni-a bubut go sedue kalik, genam gabe. 27 No, kuno-woyno yatrang waglo-saysuk ngge genam lo gabe ngunguok. Yam so, waglo-saysuk ba no yatrang ngga degut go don kok genang. Ngga kalik kua go, sikabung nogo-a wali demu nguok go, genam tang go-a gemang ne ya tenguo.