2
Sikabung nogo kisebui nemudi so taling go
1-2 Moy-ay, blong duoyap! Ngge kalik motnang lo pu go, “Tap piam go ngga, atnang kua pupluok! Ngga so pupluok go sikabung nogo-a, kisebui iti go, suey!” Way so gabe pen-asitugu: kunala temoy no se! Motnang tang go, tap piam go ngga gemang pupluok dali. Sikabung meno go kuklue so taling go, mot tang so gemang taling dali. Kua kay! Nemudi sogo kisebui-a, Ki Wali Iram lo gabe tetaling. 3 Motnang lo duing go: motnang-a, Ki Wali Iram logo kisebui sik sogo ya sesuoy? Ngga kalik kua!
Tangpleng eygo Ki Wali Iram yakua
4 Ki Wali Iram go gualaklum, gigling katu dega ey, ku sono motnang lo kua kenok ne. Ki Wali Iram go duduing-a, suey so se mlak! Mot, kua senong? Gigling eygo gualaklum ngga: kuklue imot itak go, iwot-dak go, dabui lo Nemot no keng genang so uwawi go gabe! 5 Nemot-a gualaklum ey gigling go, wali sono motnang iwot go keng sogo, moyso. Wengkabui demu-a ne! Ngga tang so, nemudi sogo seni eygo kisebui taling go ku, motnang nogo ide dega eygo-a mea iti. 6 Nemot go tasam tang so, sikabung klay-klay, Ki Wali Iram lo mea neyboy-sing. a 7 Yang! Tasam suey go, waysagi ey gigling go, blong eygo, ta ey kokong go, senang so gigit genang-a duduing go sikabung nogo, kikiwali-a Ki Wali Iram lo mea iti. 8 No, saysuk lo duduing-a usey go, tap seni eygo so paysing go, piam go tap no kekeng go nogo-a, way so Ki Wali Iram go dabuisagui dega-a mea taling. 9 Taybat piam go-a pupluok go naklay nogo, iseng kangok go mea taling. Banim seni go, tang Yahudi, ngga blo lo, saula-saula nogo mea taling dali. 10 No, suey go-a pupluok go sikabung nogo, blong, ta kokong, ngengam eygo-a, Ki Wali Iram lo mea taling. Banim seni go, tang Yahudi nogo, ngga blo lo saula-saula nogo mea taling dali. 11 Yang! Sueygo-piamgo nogo nemudi so Ki Wali Iram lo mea taling. Tang eygo mea kua pleng.
Demutrui seguong logo yakua sesuoy
12 Kua kay! Musa logo demutrui kua senong golo kuklue pupluok go, tebadali gemang nega. No, demutrui ey senong gono, kuklue pupluok go, demutrui ngganemot lo taling go, kisebui mea iti. 13 No, ngge se senong! Musa go demutrui-a tup go seguong logo, Ki Wali Iram go suongku no, seni eygo nemudi sogo yakua ip. No, demutrui ba no pen go-a pupluok go tang so, seni eygo nemudi sogo so, nemot Ki Wali Iram lo mea yang.
14 Se senong: Musa go demutrui kua senong go saula-saula, nemot go duduing no demutrui lo taling go-a pluok go, dabui iku-a, demutrui so nemotnang no mo lemoy gemang. 15 Nemotnang lo pupluok go sik so gabe ikum: dabui ba nogo Musa logo demutrui seni mo klik dali. Nemot tang go kunala lo gemang tetra: nago-a suey go, nago-a piam go. Ngga ey, dabui iku lo mea yang. 16 Se ikum! Neneyboy ku no, dia sono ngga naklay mea ngap-sing. Yang, dabui ba logo, kunala ba so kok go gigit go, Ki Wali Iram go duduing no Iram Yesus lo mea neyboy-sing. Ngga naklay, genam lo pepen go deguo teguop kalik.
Demutrui seni-a kekeng go
17 Motnang sikabung Yahudi tang go, nggeasui go sogo kalik? Motnang lo pu go, “Atnang ngge sedue Yahudi gabe; atnang go wali naklay, demutrui no glung go gabe; Ki Wali Iram ey takeduik go, atnang naklay dega.” 18 Nggano motnang lo pu go, “Ki Wali Iram go duduing atnang mo senong. Tap taling genang kunala naklay demutrui sik so atnang nogo gabe pupung. Ngga ey, sueygo-piamgo mea senong.” 19-20 Ngga no, ngge kalik motnang lo kangok so duduing go, “Atnang go demutrui sik so, kunala suey go, seni sogo tap gabe pupung. Ngga ey, tap kua senong go sikabung wawi genang klui atnang ngge gabe. Kuklik ba sogo sikabung sono sagoy ngap genang, kunala kua go, puplu sogo sikabung go nglangin, atnang ngge gabe.”
21 No, way so gabe usi-situgu: sikabung temu suey so motnang lo gabe nguok. No, sogo temoy no motnang tang go wali-a yakua nebuem? Se duing, motnang lo nguok go: wom kua iti! No, motnang tang so wom-a ne kiking. 22 Motnang lo nguok go: kamea kua pluok! No, motnang tang so kamea-kamea sogo ne ya uwet? Didemu, kudemat sogo, motnang, i-ikle. No, idayap sik sogo taut-a, motnang tang so ya i-idok? 23 Dewi so motnang lo bubut go, “Ki Wali Iram logo demutrui ey wawi go tang, atnang ngge gabe.” No, demutrui ngga, kua kengduk go sik so, Ki Wali Iram go sui-a motnang lo ne uwayang. 24 Se tup! Wali Sam klaut ba nogo ngge kalik mo klik gabe, “Motnang go kuklue tang so, Ki Wali Iram sogo saula-saula lo gabe wayang.” b
25 Yang! Demutrui no motnang kengduk go, saduisuk tong go, seni ey gemang. Suey dato! No, motnang tang go, demutrui no kua kengduk golo, seni kua goso saduisuk tong go gemang lemoy. 26 Nago no, saula meno dabui lo demutrui no kengduk go, saduisuk tong go sikabung kalik, nemotnang gemang. Ki Wali Iram go blung ba sono, Nemot lo gemang ya wawi. 27 Esang! Motnang nemot-a, saduisuk tong go, demutrui nogo motnang lo mo kuklue. Ngga tang so, saula-saula, saduisuk kua tong go, no, dabui lo demu no tupduk golo motnang nogo kisebui mea taling.
28 Yang, sedue Yahudi, dabui lo Ki Wali Iram no keng go-a, Nemot go blung sogo mea pu. No, sui seguong-a yakua pu. Nggano, suktong go, saysuk no pluok go tasam sik so, yakua pupu dali. 29 No, sikabung Yahudi seni-seni ngga, dabui lo Ki Wali Iram no kengduk go sikabung-a gabe. Nggano, suktong go, seni-seni ngga, Ki Wali Waglo lo iwat gono, dabui tong go-a gemang. Musa logo sam no klik goso kua, no dabui ba no klik goso pu go. Blo sono go, ngga kalik go sikabung-a sui blong ey mea iti. Sedue logo ngga yakua, Ki Wali Iram seguong lo mea iti.