28
Nantebot Malta no Paulus no lemoy go
1 Metuik ngganemot no suey so genamnang naklay blon gono, gemang senong, ngga nantebot Malta ba. 2 Atnang suey so ngga sogo sikabung lo gemang wawi. Ku ngganemot nogo, sa kangok go ba lo dalip kangok so atnang mo tra. Dalip lemok genang so nemotnang lo koy gemang puit. 3 Se ikum! Koy puit so di tebot so Paulus yaluim gono, koy nengkoy suali so pung go lema lo Paulus go ta no kekayso gemang tebung. 4 Paulus ta no lema lo tebung go gigit go, sikabung ikum gono, way-way so ngge kalik gemang pen-netenawon, “Seni so, ngge, sedue so tetebuet go sedue gabe! Nemot beap blo sik sogo suey so sesuoy go, nggeasui lema lo mo glok! Ngga Demat seni eygo lo mo pluok! Sedue ngge mea kua wali, ngge nemot nogo idekeba gabe!” 5 No, lema ngga, koy ba sono Paulus lo tenguo go, iseng kua tra-srenawon. 6 Sikabung-a bung-netenawon, Paulus go ta, babu so mot dega gono, mea kebong-yon. No, Paulus no walong so nemotnang bubung-netenawon go, Paulus nogo, sogo-sogo lemoy go kua ikum. Ngga sik so, nemotnang lo duing go, “Esang! Paulus tang go demat gabe!”
7 Nantebot ngga tasomlak go deguena Publius tete sogo sip dagu so. Ku nangglik so glop so atnang nemot lo suey so gemang wawi. 8 Ku ngganemot nogo, deguena Publius go nglangin teguan tra golo, nengkoy dega ey to-tenawon. Nemot srek go degu ba sono Paulus nawon go gemang degut. Ngga ey, nemot blo no ta tui go, Ki Wali Iram sono dewi gemang pu-nawon. Publius go nglangin gemang pali-dapnawon. 9 Tasam ngga senong-nenawon go, sadui sogo sikabung naklay Paulus sono gemang uweng-lak. Ngga ey, nemotnang go sadui Paulus lo gemang pali-sing. 10 Taiti mata so atnang sono, nemotnang lo gemang idok. Nggano, tandali genamnang klong sogo ku no, atnang tebok genang taut mata so gemang yaluim-nenawon dali.
Nantebot Malta sik so Roma sono Paulusnang klong go
11 Banu nangglik yam so nantebot Malta no atnang gemang suing. Ngga ey, ngga sik so bayi Kastor-Polis no atnang gemang klak. Ngga demat namonidikay, Kastor ey Polis ey go sui. Yakena Aleksandria nan Mesir sik sogo bayi, yaguisa sogo so, nantebot Malta no namboy kok dali go. 12 Genamnang koklong go nantebot Sisilia yakena Sirakusa no bayi kok go, ku nangglik ey gemang suing. 13 Yakena Sirakusa sik so tandali beap ketang lo tebok go koklong, e... yakena Regium no. Ngga utep go, nebit suey go sada idi sik so uluing golo, ku namon ba no keda so yakena Puteoli no atnang gemang pung. 14 Yakena ngga sogo, blong duoyap gemang. Genamnang nemotnang lo usi go, minggu klaya yam so nemotnang eygo gemang suing. Ku minggu klaya yam so suing gono, yakena Roma sono atnang gemang klong. 15 Ngga sono atnang koklong go, yakena Roma sogo blong duoyap mo tup. Ngga tang so yakena Tres Taberne sono nemotnang sik sogo sedue temu klong tap bubung. Nggano, sedue temu dali naysip Apius no gemang klong go bubung. Nemotnang ey tegu go, Paulus dabui klaya iti go, dabui don kok go Ki Wali Iram nogo taitisuey kangok so ta ey gemang kong-nenawon.
Roma no Paulus pung go
16 Roma yakena no atnang pung go, yap meno ba no Paulus suing genang so gemang pu. Paulus yay plesedue klaya duo lo gemang suing. 17 Ku nangglik tete no, woy-woy Yahudi nemot mit no yaluim genang so Paulus lo gemang usi. Yaluim gono, ngge kalik gemang pen-nawon, “Ayanang! Yakena Yerusalem sogo no, genam sedue Yahudi lo mlak go. Nggano Roma sedue go ta sono genam, nemotnang lo gabe iti. Nemot-a, imot go sikabung nogo, babuasi logo demutrui nogo, tasam piam go genam logo kua pluok. 18 Genam nebut, plewengkabui lo mo neyboy, genam taitak so nemot lo mo duing. But go kebong genang, genam go kuklue kua ikum. 19 No, taitak sogo, Yahudi go iram-tegay moyso. Ngganemot so, tap klaya seguong genam mo ikum, ‘Ngga neyboy genang so Roma go Kaysar no weng genang.’ Suey so se senong: at go sikabung Yahudi piam so pu genang tap, genam kua uwet. 20 Ngga suey so senong genang sogo, Genam go yap ba no motnang ngge genam lo mo yaluim-tu. Se senong, ‘Sikabung Israel lo duduing bubung, Sesuoy Iram go sui no genam mo mlak.’ ” 21 No, way so ngga sogo woy-woy Yahudi lo pu go, “Nan Yudea sik sogo klaya nang go mot sogo sam atnang nogo kua iti. Ngga ey, deguo piam go mot sogo sedue klayanang go logo kua pen dali. 22 Yang! Atnang mo senong: sip naklay nogo, walitap inim ngge, Yahudi sikabung lo gemang waydang. Nggeasui go mot lo duing go nebut-a tup-elu so gabe.”
23 Ngga ey, tandali Paulus ey tegu genang ku gemang pu-nenawon. Tegadi pu go ku ngganemot no, Paulus go yap no sedue Yahudi miam dega so banim nogo ey kua kerlam go, gemang pluep. Ngga ey, wadikua go sik so iti go, e... woy-a sut go, nemotnang no deguo teguop Paulus lo gemang nguok-nawon. Woy Wali Iram tamlak go blongdon duduing pung go deguo Paulus lo gemang pen. Ngga ey, Musa logo demutrui ey, nabi-nabi lo klik go nebut eygo sik so, Yesus no dabui iti go keng genang tap, don ey gemang nguok. 24 Deguo ngga tup gono, sedue Yahudi temu keng-nenawon, temu-a kua keng-nesrenawon. 25 Ngga ey, banom so sedue Yahudi pluep go, nebut sok-sok so gemang pen-netenawon. Tandali nemotnang klong sogo no, ngge kalik Paulus lo gemang we-nawon, “Kua kay! Banim seni so, ngge motnang go babuasi no Ki Waglo go don no nabi Yesaya lo mo pen-ngam,
26-27 ‘Klong-a! Mot go sikabung no ngge se pen,
Suey so motnang go kama lo mea tup, no yakua senong!
Suey so motnang mea ikum, no ya kua mlak!
Saula ngge, sogo-sogo nemot go dabui logo kua tetra.
Nemotnang go kama mo ketok.
Nemotnang go nemu mo sup.
Se senong: nemotnang ngga kalik kua go,
nemu lo mea ikum ne, kama lo mea tup ne.
Ngga ey dabui ba no senong go, mea mlak ne.
Ngganemot no tandali Genam sono nemotnang mea teguey ne.
Ngga ey, tandali nemotnang Genam lo mea sesuoy ne.’ ” (Yesaya 6:9-10)
28 Nggano, tandali Paulus lo pen go, “Motnang se senong: Ki Wali Iram sik sogo deguo teguop, nggeasui go, saula-saula no gabe pepen klong. Nemotnang lo tup go mea keng-nenayon!”
[ 29 Nebut ngga kalik Paulus lo pen gono, nebut mata so way-way so sedue Yahudi lo gemang sok-nenawon. Nemotnang go dabui nogo ey kua but go nogo, Paulus go yap ba sik sogo pluep go gemang kuek.]
I go sogo nebut
30 Yagui namon ey, nemot go yap duoy lo ta go ba so Paulus got-nawon go. Yakay ey nemot mit no uweng go sikabung, gemang wawi-tenawon. 31 Woy Wali Iram tamlak go blongdon duduing pung go deguo Paulus lo gemang tetaling. Ngga ey, nisonoso Iram Yesus sogo deguo teguop naklay don ey gemang nguok. Nemot lo nguguok go, sedue meno logo yakua puem.