27
Roma sono Paulus wawi go klong go
1 Nebut degut go blo idi lo, ku meno no nan Italia yakena Roma no bayi lo atnang klong genang ku gemang pung. Plewengkabui meno Yulius go ta sono boy ba sogo sedue temu ey Paulus gemang itak. Yulius ngga Kaysar Roma go plewengkabui. 2 Ngga ey, yakena Adramitium sik so bayi no genamnang gemang blengot. Ngge, nan Asia no tandali klong sogo bayi. Blengot gono, bayi gemang klong. Kerlam so atnang ey klong go Aristarkus dem blong duoyap sik sogo meno, nan Makedonia yakena Tesalonika sik sogo.
3 Ngga utep go, yakena Sidon no atnang pung gono, suey so Paulus nogo plewengkabui Yulius lo gemang tetebok. Seni so, Paulus go wali nogo sogo-sogo iti genang, yakena Sidon sogo blong duoyap ey nemot tegu genang, nemot lo mo iwat dali.
4 Ngga sik so koklong go nebit kangok go nebuemku sik so genamnang sono gemang uluing. Ngganemot sogo so, nebit kua go idi lo nantebot Siplus ba lo atnang tebok go gemang klong. 5 Nan Kilikia ey Pampilia eygo beap bata golo koklong go, e... nan Likia yakena Mira no gemang pung.
6 Nggano pung gono, plewengkabui Yulius bayi meno nan Mesir yakena Aleksandria sik sogo gemang ikum. Bayi ngga nan Italia sono klong go tang so, bayi ngganemot no atnang wawi go gemang blengot-lak. 7 Ide kangok so nebit kangok golo tra go nogo, yakot so atnang gemang koklong. Ku kata yam sogo no, nantebot Kenidos ketang no genamnang gemang pung. Woy sut sik sogo nebit kangok golo sada idi sono atnang tenget go koklong, e... nantebot Kleta no pung go tebuem gemang pue. Ngga yakena, Salmone. 8 Seni so, sip ngganemot lo atnang koklong go nogo, nebit ey beap alui ey kangok go tang so, sip meno nantebot Kleta dali sogo no, gemang pung. Sip ngganemot go sui, ‘Bayi so kokok go sip suey go.’ Ngga yakena Lasea dagu so. 9 Kedaso kua klong go nogo, ku mata so atnang mo nega, ku dalip no deda go. Seni so, sedue Yahudi go walop kangok go, ‘Kon suep genang ku dega’ mo yam. a Ngganemot nogo, yaguisa masi mo li. Sikabung bayi lo koklong sogo ya kua, ngga piam eygo ku. Ngganemot sogo so, plesedue nogo, nggano, bayi ta so mlak go sedue nogo nebut mang, kua klong genang sogo so ngge kalik Paulus lo gemang pen, 10 “Ayanang! Genam mo ikum, Imot tandali koklong go nogo piam kangok go mea tegu. Ngga kalik go imot go taut ey bayi eygo seguong-a ya kua net, no, sikabung bayi lo koklong go, beap alui lo mea saguip dali.” 11 No, plewengkabui Yulius, Paulus logo nebut kua keng. Bayi ta so mlak go seguong no mo tup. 12 Seni so, yaguisa nogo bayi so kokok go sip ngganemot suey kua. Ngganemot sogo so sedue mata sogo lo duing go, “Ngge suey, tandali bayi lo imot mea klong. Ngga ey nantebot Kleta sogo sip meno, Peniks no pung genang. Sip ngga nogo woy sut sik so uweng go bayi, suey so mea degut. Yagui sa sip ngganemot nogo suey so mea suing.”
Beap alui kangok go
13 Ku ngganemot nogo sada idi sik sogo nebit suey go gemang uluing. Nemotnang lo duing go, “Suey so mea klong!” Ngganemot sogo so, bayi tegan plet go, nantebot Kleta ketang lo tandali gemang koklong. 14 No, ku walong kua luik gono, dun idi sik so nebit kua seni go nantebot Kleta sik sogo, lemoy so gemang lemoy. 15 Nebit ngganemot lo bayi iti betep klong go, metuk temu nebit lo tandali ya kua iwot genang so demu-a gemang betep. Ngga ey, nemotnang lo duing go, “Nueya!”
16 Ngga kalik koklong, sada idi no nantebot seguay go Kauda no genamnang gemang pung. Ngga sogo nebit seguay so gemang. Ngga sogo so, bayi seguay go, bayi kangok go blo no atnang lo gemang tui. 17 Ngga ey bayi kangok go temoy no tegan lo gemang dok. Nemotnang nan Aprika sogo nan metuik kaseglok Sertis blo no lit eygo suali so layar tebuo go, bayi nebit go tap lo yakot so klong genang. 18 Beapalui ey nebit ey, maning kangok goso, ngga utep go bayi beap lo kenok eygo so, taut temu bayi ba sik sogo idok go beap ba no gemang tega-nenawon. 19 Ngga utep dali, bayi klong genang sogo taut temu, layar tegan, idok go beap ba sono nemotnang lo gemang tega dali. 20 Ku kata yam so, woy kua ikum top kua ikum go. Ngganemot nogo kua senong, nago no atnang mo koklong. Nebit kangok go kua itak. Tandali suey so pung genang sogo kunala atnang kua duing. 21 Ku nago yam so, ten dam genang moyso. Ngga ikum go, Paulus nesip no ip go, ngge kalik gemang pen-anawon, “Ayanang! Sogo so genam go nebut mang no kua tup? Sogo so nantebot Kleta no imot kua suing? Imot ngga no suing go, tasam kua seni go, ngge kalik go kua lemoy be! 22 Nggeasui go ngge kalik gabe pen-asitugu, ‘Dabui ide ey motnang kua tra. Sedue klaya duo nang go yakua kebong. Bayi seguong-a mea nega!’ 23 Seni so, Ki Wali Iram, genam so tamlak go genam lo takokong golo, wadi Kiwali tamot genam mit no mo pu go weng. 24 Nggano, genam no pu go, ‘Paulus, suali kua tra! Mot Kaysar go nemuku no mea ip! Nggano mot ey koklong go, sikabung naklay, Ki Wali Iram go klum logo so, mot ey sesuoy so mea pung dali. Ngga taitiklum gemang!’ 25 Ngganemot sogo so, ayanang don ey se suing! Ki Wali Iram no dabui lo genam gabe duduing. Genam mo senong, ‘Nemot lo pu go nebut kalik mea lemoy.’ ” 26 Imot nantebot ketang no mea blon-esayon.
27 Ku 14 tete no, genamnang beapalui lo ngga sono-ngge sono betep, ku ngganemot wadi nesip bayi ta so mlak go sedue lo duing go, beap ketang no yam so gabe dedagu. 28 Beap yam suing genang so, demu tegan ey beap ba no gemang betep-nenawon. Nggano tagu i-neton, nemot go walong 40 meter yam so. Ngga ey, sip meno no nemotnang tandali betep-nenawon go, nemot go walong 30 meter no. 29 Nemotnang suali tra go bayi bu ketang no demu blo no lit genaning so, bayi demu 4 yam so bayi taton lo gemang tega-nenawon. Nggano, keda so ku blong genang-a nemotnang lo gemang segi-netenawon. 30 No, ku maning kua blong gono, yakot so bayi ta so mlak go sedue-sedue temu kap genang so duduing goso, bayi seguay go beap blo no gemang iti go tui. Bayi demu metuk temu lo tega genang sogo kalik so nemotnang gemang semu-nenawon. Nemot-a, kap sogo so. 31 No, tasam ngga Paulus ikum goso, ngge kalik plewengkabui no gemang pen-nawon, “Bayi ta so mlak go sedue bayi ba no kua suing go, imot naklay mea kua wali!” 32 Paulus go nebut tup gono, plesedue lo bayi seguay go tegan gemang ibot. Ngga ey bayi seguay go beap alui lo ket sono gemang betep. 33 Ku blong yam no, nemotnang naklay ten dam genang so, ngge kalik Paulus lo gabe pu, “Ayanang! Ku 14 yam so suey so pung genang sogo ku motnang lo bubung, maning ten kua dam. 34 Ngganemot sogo so, motnang ten seguay go dam genang so genam lo gabe usi! Sesuoy genang ku nogo motnang don se kok. Motnang nogo, sogo-sogo piam go yakua lemoy.” 35 Ngganemot no, nemotnang naklay go nemuku no ten Paulus lo iti go taitisuey Ki Wali Iram sono pu go ten ngga betok go, gemang dam-nenawon.
36 Ngga kalik semu gono, nemotnang dabui demu betep go, ten iti go gemang dam-nenawon. 37 Seni so, bayi ngga ba sogo atnang naklay 247 yam so.
38 Naklay ten dam go, nu mo temoy gono, taut temu gandum bayi ide kua genang sogo so, beap ba no idok go gemang tega-nenawon, suey so keteng no pung sogo be.
Beap kaseglok no bayi lit go
39 Ku naklay blong gono, bayi ta so mlak go sedue-sedue lo metuik gemang ikum. Nan ngga, nemotnang kua senong. No, tebuem way go sip suey go gemang ikum-nenawon. Nemotnang lo duing go, “Ketang ngganemot ba no bayi kok genang so.” 40 Ngganemot sogo so, demu tegan bayi so ide go ibot go beap ba no nemotnang lo gemang itak. Nggano, bayi nebit lo beap ketang no iti go klong genang so, dom tegan kuala go, ngga ey layar metuk temu no gemang keduik-nenawon. 41 No, koklong, beap kaseglok no keda so bayi gemang lit. Seni so, bayi metuk temu kangok so mo degut go nogo, tandali go ya kua lek. Ngganemot no beapalui kangok golo, bayi taton sik so gemang tegek.
42 Ku ngganemot nogo, plesedue lo duing go, boy ba sik sogo sedue naklay tuk genang so. Nemotnang beap sue go metuik no blon go kuek genaning. 43 No, plewengkabui lo pu go, “Kua semu! Paulus kebong genang nemot moyso. Nemot lo pu go, ‘Bu sue senong go sedue-a, banim beap sono sip go se sue.’ ” 44 Sedue temu bayi tegek go dipap ey se sue. Ngga kalik so metuik no suey so genamnang naklay gemang blon.