26
Deguena Agripa damoy so Paulus lo pen go
1 Woy ngganemot no Paulus sono deguena Agripa lo gemang we-nawon, “Nggeasui go, mot tang so se pen-sando!” Ngga ey Paulus ip go nebutpen so, ta lo taling gono ngge kalik gemang pen-anawon.
2 “Deguena Agripa suey gemang! Nggeasui go, genam yakay ey. Nebut kua seni go genam so sedue Yahudi lo pen go, suey so nemudi so mot sono mea nebuem-silu. 3 Yahudi go demutrui ey sagui eygo nogo, suey so mot mo senong. Ngga mo senong go tang so genam yakay kangok. Gigling ey suey so genam so se tup-sando!
4 Yang! Genam go wali ngguot sogo sedue Yahudi naklay lo yam so mo senong! Yakena Yerusalem so, nemotnang ey at go sikabung dagu so got-naku go. 5 Ku walong dega so genam nemotnang naklay lo mo senong. Nemotnang duduing go mea pen, ‘Banim go, walitap Parisi no genam mo degut go mo keng.’ Seni so, tap ngganemot keng genang ide dega ey, tap temu ey kua kerlam go. Demu-demu mata dega so kekeng go nogo.
6 Banim so ngge kalik babuasi no tegadi Ki Wali Iram lo dok-angam go, ‘Kebong go sikabung tandali mea nglong.’ Tap ngga keng go tang so, nggeasui go genam neyboy go gabe usi-ketogoy. 7 Se senong: use-wadikua tegadi ngganemot lemoy genang so, Ki Wali Iram sono, sedue Israel tang 12 lo ta gabe kokong. Ngga kalik dali so sedue Israel ey genam tang go gabe duduing. No, esang, deguena Agripa! Kunala ngganemot tang so, genam no idekeba iti so sedue Yahudi lo mo pluok.”
8 Nggano, sikabung Yahudi sono Paulus lo gemang pu-nawon, “Motnang sedue Yahudi! Sogo tang so tasam ngge kalik go kua keng? Kebong go sikabung Ki Wali Iram lo tandali mea nglong.”
9 “Aya deguena ey aya Gubernul ey! Banim nogo ngga kalik go genam kua duing! No, genam lo, yakena Nasaret sik sogo Yesus lo ngunguok go tap, genam lo mo waydang-sanyu. 10 Yakena Yerusalem sik sogo tasam waydang kangok so genam mo pluok. Boy ba sono Yesus no keng go sikabung mata so, Yahudi go iram-tegay lo pu goso, genam lo mlak go mo tega. Nemotnang tuk go leguot genang, genam mo iwat dali. 11 Yang! Yahudi go dewi yap-yap nago so gemang go, Yesus no keng go waydang genang, idekeba nemotnang nogo genam lo mo taling. Nan Yudea ket sogo yakena-yakena sono, dabuipiam kangok golo tram go tang so nemotnang genam lo mo duk go lemit.”
Damsik tap no Paulus teguey go
12 “Deguena Agripa! Ku meno no ngga kalik dali, Yahudi go taitisopuit go trang-trang dega eygo lo sam iti go mot-dak go, yakena Damsik no at gemang klong. 13 Wabedong tap koklong gono, ut ba sik sogo neblong kangok go, ngap go genam lo mo ikum. Ngga, neblong kangok go dega, woy neblong ey kua kerlam. Genam ey genam no keng go sedue ey neblong ngganemot lo mablong so mo itak. 14 Ngganemot no, nan blo sono atnang mo net-lak. Ngga ey, Iblani nebut sogo nebut kluim ngge kalik pu go, genam lo gemang tup, ‘Saulus! Saulus! Sogo sogo so Genam mot lo truik-togoy? Mot so lek go don nogo sagui kokong golo, iseng mot gabe tra-sitogoy, sang!’ 15 Ngga ey, ngge kalik genam lo gemang usi, ‘Woy Dem, Mot nando?’ Nemot lo tenguo go, ‘Genam ngge Yesus! Mot lo tutruik go, ngganemot! 16 Ip-a! Nggeasui go mot ey Genam tegu go, Genam go tamot so Genam lo gabe temuit-situgu. Nggeasui lemoy go tasam, ku santegun gono taling genang tasam-tasam naklay, sikabung nogo mot lo se pen-satogoy! 17 Sikabung Yahudi, nggano saula-saula nogo so, Genam lo mot-dak go se klong. Saula Yahudi ey, saula-saula temu eygo lo piam go nogo, mot yay suey so Genam lo mea suing. Mot koklong go tang so, nemotnang go nemu gemang pli. 18 Ngga ey ku klik go ba sik sogo neblong sono sikabung mea teguey. Yang! Kupiamgo don itak go, Ki Wali Iram no wawi go, nemotnang go piam konkebamling naklay Genam lo mea suep. Genam no dabui iti go tupduk keng go tang so, Ki Wali Iram go duoyap so lemoy go, tegadi so Nemot lo dok go blongdon nemotnang lo mea iti-sing.’
19 Deguena Agripa! Ku ngganemot sik so, ut blo sik so ngap go mot-dak golo genam go wali gemang taling. 20 Banim no, sikabung Yahudi yakena Damsik ey Yerusalem eygo sogo no Yesus lo mot-dak go pen genang so, Genam mo klong. Nggano, nan Yudea sedingno-sedingno. Ngga ey, saula-saula no mo klong pepen dali. Ngge kalik don ey genam lo mo pen, ‘Tasam piam go ngga sono itak go, wayso wali inim-a se wawi. Ki Wali Iram no teguey go sik so, wali inim nogo tasam-a se pupluok!’
21 Aya deguena, tap ngga-a genam lo taling go tang so, genam but genang so Ki Wali yap ba so sikabung Yahudi lo mo mlak. 22 No, Ki Wali Iram lo genam no, suey so mo tebok, e... nggeasui gono gabe pung-atugun. Yang! Nago no, sikabung naklay nogo Ki Wali Iram go nebut genam gabe tetaling. Seni so, banim no nabi-nabi logo ey, Musa lo klik go nebut ey genam lo pen-tugu go nebut ngge mo kerlam gabe. 23 Ngge kalik:
- idekeba tegadi so Ki Wali Iram lo dok go Iram lek go;
- keduong seni so kebong go sip sik so tandali Nemot nglong go;
- saula Yahudi ey saula-saula eygo nogo blong Nemot lo gabe tetaling.”
Yesus go tap keng genang so deguena Agripa Paulus lo nguok go
24 Paulus nemot nogo nebut ngga kalik go pen-awon gono, ngge kalik Gubernul Pestus lo gemang bega-nawon, “Paulus! Kunala kua go nebut-a pen-atogoy go! Sam mata so ikum go tang so, mot yane so mo lemoy.” 25 No, Paulus lo pu go, “Aya Gubernul! Genam kua yane. Nemudi sogo gabe pen-situgu. Nebut ngga seni eygo. Dabui lo ngga genam mo senong gabe! 26 Deguena Agripa mot se ikum: tap ngga naklay nemot mo senong. Dia no plet go walinebut ngga, nemot ey genam eygo lo mea pepen. Tasam-tasam ngga naklay nemot lo mo tup. Tasam-tasam ngga ket so kua pung go! 27 Deguena Agripa! Yansi go nebut nabi-nabi lo pen go mot gabe kekeng? Nueya, kua pen! Genam mo senong, nebut ngga senong sogo mot lo gabe duduing.”
28 Way so, Paulus no ngge kalik Deguena Agripa lo gemang pen-anawon, “Esang Paulus! Mot lo duing go, keda so Yesus no dabui iti go sedue so genam se lemoy!” 29 Paulus lo pu go, “Nggeasui go, ku meno nogo nueya! Ki Wali Iram no dewi ngge kalik gabe ya pu, ‘Genam kalik so, motnang ngge sogo, nebut ngge tup go naklay, mea lemoy. No, ta tegan lo dok genang-a yakua.’ ”
30 Nebut ngge naklay tup gono, deguena Agripa, gubernul, Bernike, nggano sikabung naklay ip lak-anatun. 31 Ngganemot no dia no pluep go, way-way so ngge kalik gemang pen-netenawon, “Sedue nggenemot but genang piam, boy ba no betep genang piam, kua!” 32 Seni so, gubernul Pestus no deguena Agripa lo pu go, “Kaysar no klong genang sogo nakua pu go, ta gabe mo itak.”