25
Kaysar no neneyboy genang so pu go Paulus klong go
1 Ku nangglik yam no gubernul so Pestus got-nawon gono, yakena Kaysarea sik so Yerusalem sono gemang nawon. 2-3 Yerusalem no pung gono, Paulus sogo nebut nemot no taitisopuitgo trang-trang dega ey Yahudi go iram-tegay eygo lo gemang pen-nenawon. Nemotnang lo pu go, “Pestus lo duing go, Kaysarea sogo boy ba sik so yakena Yerusalem no Paulus wawi go se weng!” Seni so, nemotnang lo duduing, “Tap no Paulus but genang.” 4 No, Gubernul Pestus lo pu-nawon go, “Kua! nggeasui go, Kaysarea go boy ba so Paulus gemang ya susuing. Genam tang go, ku kua walong gono, ngga no tandali mea klong. 5 Ngge suey, iram-tegay genam ey kerlam so klong go, yakena Kaysarea nogo Paulus wet go nemot go piam senong genang.” 6 Ku tanamon blo sogo, Yerusalem so Gubernul Pestus suing gono, Kaysarea no tandali gemang klong. Ngga utep go, neyboy genang nebut tandali gemang degut-nenawon. Ngga ey, nemot lo pu go, Paulus wawi go gemang weng dali. 7 Sip ngganemot no Paulus pung gono, Yerusalem sik sogo woy-woy Yahudi lo weng go gemang ip-laknenawon. Nggano Paulus nogo nebut kangok so gemang pen-netenawon. No, piam ngganemot nemotnang logo, seni yakua taling. 8 Nggano, nebut way Paulus logo ngge kalik gemang pen-anawon, “Musa lo klik go demutrui nogo, nggano Ki Wali yap nogo, nggano, Roma go Kaysar nogo tasam piam go, seni so genam kua semu.”
9 Gubernul demening goso, Yahudi go iram-tegay go dabui iti genang so, Paulus no ngge kalik Pestus lo gemang usi-nawon, “Ngge suey? Yerusalem no nebutdegut genang sogo mot ya wawi go klong? Ngga nogo, at lo mea neyboy dali.” 10 Way so Paulus lo pu-nawon go, “Yakena ngge, Kaysar lo taling neyboy genang sogo sip. Nggeasui go, genam Kaysar lo taling go sedue lo gabe uwet-aton. Ngga nemudi so! No, Yahudi go nebutdegut sip nogo genam ne ya klong. Yahudi nogo, piam go genam kua semu, ngga mot suey so mo senong. 11 Genam demu paysing go, piam kangok go mo semu go, but genang sogo genam mea yang. No, woy-woy Yahudi lo pepen go nebut, seni so kua lemoy go, dabui woy-woy Yahudi iti genang so, nemotnang go ta no genam mot logo ya kua itak. Gabe pen-asitugu, ‘Genam Roma go Kaysar mit no klong so, genam nemot tang so lo mea neyboy!’ ”
12 Paulus nebut ngge pen gono, nemot go kunala sedue-sedue ey nebut Gubernul Pestus lo pen gono, Paulus no gemang pen, “Mot lo pu go, ‘Genam Kaysar mit no neyboy genang sogo.’ Yang, ngga kalik go, Kaysar mit no mot se klong!”
Deguena Agripa demanon Bernike ey Paulus tegu go
13 Gubernul Pestus ey tegu go ku kua walong gono, suey semu genang so, yakena Kaysarea sono, deguena Agripa demanon Bernike ey gemang weng. 14 Ngga sogo, ku kata yam so nemotnamon suing gono, ngge kalik Paulus sogo nebut Deguena Agripa no Pestus lo gemang pen, “Ngge sogo sedue meno neyboy genang boy ba so gabe. Nemot go sui Paulus. Boy ba no Gubernul Pelis lo itak go. 15 Yakena Yerusalem sogo no, taitisopuit go trang-trang dega ey Yahudi go iram-tegay eygo lo usi go, Paulus nogo idekeba genam lo se iti. Nemotnang lo pu go, ‘Kuklue kangok dega go Paulus lo mo pluok.’ 16 Way so genam lo pu go, ‘Roma go demu nogo, banim no neyboy genang sedue ngga, nebutdegut go ba no tasam piam goso pen go sedue ey se ip. Nggano, tasam piam go taling gono, nemot tang so nebut way mea pen dali. No, woy-woy yakay genang so, idekeba iti genang sedue nemotnang go ta sono go yakua itak.’ Ngga kalik at lo mo pen. 17 Ngga tup go, ngge sono nemotnang weng gono, kekayso ngga utep dali go nebutdegut sogo genam lo mo pu. Nggano boy ba sogo sedue ngganemot mo pu go weng dali. 18 No, nemot go kuklue so pen go sedue-sedue ip go pen go, suey so kua taling, sogo kuklue mo pluok, genam kua senong. 19 No, sok-sok seguong ey nemotnang lo gemang pen. Walitap, sedue meno Yesus eygo lo nemot nogo nebut sok-sok gemang pen. Ngge kalik woy-woy lo gemang pen, ‘Yesus mo kebong!’ No, way so Paulus lo pepen go, ‘Yesus tandali mo wali!’ 20 Tasam ngga suey so kua senong go tang so, genam lo mo pu, ‘Ngge suey? Tandali Yerusalem no nebutdegut genang so wawi go mot ya klong.’ 21 No, ngga kalik go Paulus moyso. Nemot lo pu go, genam Kaysar lo mea neyboy! Genam sogo nebut maning pepen go, boy ba so genam mea suing. Ngganemot sogo so, genam lo pu go, boy ba so nemot gemang susuing, e... kaning so Kaysar sono nemot pu go mea klong.”
22 Ngga ey, ngge kalik deguena Agripa lo gemang usi, “Ngge suey? Nemot eygo genam ya tegu?” Ngga ey, Pestus lo pu go, “Yang, utep so, nemot eygo mot mea tegu.”
23 Ngga utep go, nemot go srem naklay semu go, nebutdegut genang sip no, deguena Agripa demanon Bernike ey sikabung mata sogo ey gemang degut. Nemotnamon ey degut go: plewengkabui, yakena go trang-trang naklay gemang degut dali.
Ngga ey, Paulus Pestus lo usi go gemang degut dali. 24 Nggano Pestus lo pen go, “Deguena Agripa, ayanang, mianang, suey gemang! Sedue ngge nemot sogo, Yerusalem sogo sedue Yahudi ey, ngge sogo sedue Yahudi ey golo pu go, ‘Paulus but go se kebong!’ 25 No, Paulus but go kebong genang tasam piam go, gemang kua ikum! Ngga tang so nemot lo pu go, ‘Roma no klong go, Kaysar lo neyboy genang.’ Ngga, genam mo yang dali! 26 No, seni so, Kaysar nogo sam sogo kalik genam lo ya klik? Suey so genam kua senong dali. Ngganemot sogo so, nemot tandali wet genang, deguena Agripa go nemu ku no usi go Paulus mea ip. Ngga ey, genam senong genang, sogo kalik Kaysar no genam ya klik. 27 Seni so, genam lo duing go, ‘Roma nogo tebadali go sedue ya kua pu go klong. No, sam ba nogo nemot go tasam piam go se klik dali!’ ”
Ngge Gubernul Pestus lo pen go.