24
Paulus Gubernul Pelis lo neyboy go
1 Ku 5 yam so suing gono, yakena Kaysarea no taitisopuit go trang dega ey Ananias, woy-woy Yahudi temu ey, gemang nenawon. Se senong: nebutpen genang kunala sedue demu naklay mo senong go, Tertulus nemotnang lo gemang wawi go keng dali. Gubernul Pelis mit no ip go, tandali Paulus neyboy genang sogo nebut, nemotnang lo gemang pen-nenawon. 2 Paulus wawi go tegu dali gono, ngge kalik Tertulus lo gemang pen-nawon, “Gubernul Pelis, suey gabe! Mot suey so wengkabui so suing go tang so, nan ngge ba sogo, suey so ngengam yakay ey imotnang naklay gabe got-eton. Senongduduing kalong eygo lo atnang go tang Yahudi nogo tasam suey go, mata so mot lo mo pluok-sanyo. 3 Kuno-woyno, nago no imot susuing go, tasam ngga dabui lo gabe iyang. 4 Nggeasui go, nebut walong bata genam ya kua pen-srelu. No, at lo pu go-a suey so dabui lo mot se tup!
5 At lo ikum go, ngge nebut iwot eygo sedue! Yakena Nasaret sik sogo walitap inim go woy sui eygo dega nemot gabe. Saula-saula naklay nemot go nebut temoy sik so, plesagui eygo so sikabung Yahudi mo lemoy. Kukunan blo logo iseng bu kalik nemot logo naklay gemang dedayap. 6 Nemot go piam kangok go, ngge gemang. Ki Wali yap kon kua go, yatrang so nemot lo, kon ey goso mo lemoy. Ngganemot sogo so, nemot mlak go gabe. Seni so, atnang go demutrui nogo, nemot nogo idekeba se iti! 7 No, atnang go ta sik so don ey Paulus plewengkabui Lisias go plesedue lo mo lek. 8 Nggano, Lisias lo pu go, nemot neyboy genang so, mot mit no atnang weng go gabe. Gubernul Pelis! Atnang lo pen go nebut seni mot tang so senong genang, suey so Paulus mot lo se usi go pen. Yang! Genam go nebut ngge no yam!”
9 Paulus sogo nebut tup go, sedue Yahudi temu gemang yang-netenawon dali, “Tertulus lo pen go nebut seni so gemang!”
Nebut Paulus logo tete pen-anawon go
10 Yam so Tertulus nebutpen gono, Gubernul Pelis lo ta taling gono, Paulus lo ngge kalik gemang pen-nawon, “Aya Gubernul, mot suey gabe! Genam mo senong, yaguino-yaguino nan ngge sogo mot wengkabui so suing go, sikabung lo tasam piam go semu go, mot lo suey so mo neyboy. Ngganemot sogo so nggeasui go nisonoso genam tang so nebutpen sogo gabe ip. 11 Se senong, ku 12 nayum gono, dewi pu genang so yakena Yerusalem no, Ki Wali yap ba no genam gemang degut. Aya Gubernul! Tasam ngge, suey so tandali mot logo se ikum! 12 Genam sedue meno ey plesagui semu go, sikabung kua ikum. Ki Wali yap ba nogo, dewi so pupu go yap meno-meno ba nogo, sip meno no, taybat genam lo semu go kua. 13 Genam so pen-newon go ngga, nemotnang tang sogo nemot go seni yakua taling dali. Ngga seni kua go nebut. 14 No, at logo seni-a, mea pen-asilu, ‘Tap imening go, nemotnang lo duing go kuaseni go tap, ngganemot no genam gabe kekeng. Tap ngganemot lo babuasi go Ki Wali Iram no dabui lo genam gabe kekeng. Nggano, Musa ey, nabi-nabi ey golo klik go nebut nogo naklay gabe kekeng dali.’ 15 Woy-woy Yahudi lo kekeng go tap nogo, genam kangok so dabui gabe iti go duduing dali! Tap ngga, seni so, tandali sikabung kebong go naklay, mea nglong-ayon. Kon eygo-kon kua go sikabung naklay, tandali mea nglong. 16 Ngganemot sogo so, Ki Wali Iram ey kukunan blo sogo sikabung eygo nemuku nogo, dabui iku lo nemudi so, kon kua goso kuno-woyno suing genang-a gabe uwet. 17 Yang! Nan-nan meno so yagui mata so genam mo suing. No, genam go saula no taiti iti genang, duoy genam lo yaluim go, Ki Wali Iram no taitipuit genang so, yakena Yerusalem sono tandali genam mo weng. 18 Tasam suey go ngga pupluok go nogo, genam nan Asia sik so pung go sedue Yahudi lo gemang ikum. Seni so, demutrui nogo kon bu yam so genam lu go nogo, genam mit sogo sikabung mata so kua. Plesagui kua semu dali. 19 No, sedue Yahudi Asia sik sogo ngganemot-a gemang. Seni so, nemotnang go kunala duing genam sogo pen genang, mot mit nogo se pu go weng dali!
20 Kua go, nggeasui go dia no iram-tegay Yahudi lo nase pen-nesiyon: nemotnang go neyboy go ku nogo, sogo kalik go piam-a, genam lo semu go mo ikum? 21 No, ngge kalik nemotnang damoy so at lo pu go-a mea pen-nesiyon, ‘Mo kebong go sedue tandali mea nglong!’ Nebut ngganemot pen go sogo so, nggeasui go, mot damoy sogo genam gabe uwet-ketogoy.”
22 Seni so, Gubernul Pelis, blong duoyap lo keng go tap inim naklay mo senong. Ngga sogo so nemot lo pu-go, “Nggeasui go nebut ngge, namboy ya kua neyboy gabe. Plewengkabui Lisias weng gono, nemot go nebut tup gono, Paulus go kuklue mea pu-eyon.” 23 Nggano, Gubernul Pelis lo plewengkabui no pu go, “Paulus tandali wawi go klong! Paulus yay suey so se suing! No, Paulus go wali genang so, sogo-sogo andua-andua uweng golo tebok genang-a mea degut.”
Paulus tegu so gubernul Pelis senun eygo lo wawi go
24 Ku nangglik meno no, Gubernul Pelis, senun Dursila Yahudi kabung eygo tandali weng golo pu go, “Paulus wawi go weng!” Weng gono, Iram Yesus go walitap Paulus lo pen gono, suey so nemotnamon gemang tup. 25 No, nebut ngge kalik go Paulus lo pen-anawon go, “Wali ngge-a blong duoyap se senong:
- seni eygo nemudi sogo tap se klong;
- gigling ey don ey se susuing;
- suey go piam go neyboy genang ku.”
Nebut ngganemot tup golo Gubernul Pelis suali gemang tra. Ngga nemot sogo so, ngge kalik gemang pu-nawon, “Suey! Nggeasui go nebut yam, mot se klong! Ku gemang tandali mot genam lo usi go mea weng!” 26 Seni so, Pelis dabui ba lo ngge kalik gemang duing-nawon, “Genam no duoy Paulus lo iti gono, ta mea itak-lu!” Ngganemot sogo so, da klaya-da klaya tandali Paulus nemot lo usi go, nemot ey nebut gemang pen.
27 Yagui namon yam so suing gono, Pelis way sogo gubernul demening go Perkius Pestus lo gemang got-nawon. Se senong: Yahudi go iram-tegay yakay genang sogo so, Pelis logo Paulus ta kua itak-srenawon.