23
Yahudi go iram-tegay nebutdegut go sono Paulus wawi go
1 Ngga ey, Paulus ip go, iram-tegay sono nemu yalap go, ngge kalik gemang pen-anawon, “Ayanang! Nggeasui go ku no pung go, Ki Wali Iram lo iwat go-a pupluok genang so, teguop so genam go wali naklay mo itak gabe.” 2 Paulus go nebut tup gono, Paulus mit so suing go sedue sono taitisopuit go trang dega, Ananias lo bega go, “Lom sono Paulus pang-a!” 3 Ngga ey, way so trang ngga no, ngge kalik Paulus lo gemang pu, “Mot tang go-a, Ki Wali Iram lo mea plapang! Wi, si pegop kalik go mot gabe, ngan no, dia sik so ikum go suey, no dabui ba nemon dega ey! Mot! Musa no iti go demutrui no mot logo gemang neyboy. No, nggeasui demu ngga mot lo paysing go, genam pang genang so ne we-santo!” 4 Ngga ey, ngge kalik Paulus mit sogo sedue temu lo gemang pu, “Ki Wali Iram lo kuoy go taitisopuit go trang dega mot lo mo waydang-to.” 5 Ngga tup go, way so Paulus lo pu go, “Esang ayanang! Genam kua senong, nemot ngge trang dega ngganemot. Genam senong go, genam kua waydang. Seni eygo ngge kalik Wali Sam klaut ba no klik go, genam mo senong, mot go wengkabui nogo kua wayang!” a
6 Se senong: ngga sogo wengkabui, tang namon, partay Saduki ey partay Parisi eygo sik sogo, Paulus mo ikum. Ngga tang so iram-tegay no Paulus lo gemang pu-nawon, “Ayanang! Genam ngge sedue Parisi, sedue Parisi dali lo tui go. No, nggeasui neyboy-ketogoy go, ngge kalik duduingbubung keng go tang so, ‘Sikabung kebong go, tandali mea nglong!’ ” 7 Ngga kalik Paulus lo pu go tup go, way-way so sedue Parisi ey sedue Saduki eygo nebut sagui gemang sok-nenawon. Ngga ey, banom-banom nemotnang gemang tegek-lak. 8 Sedue Saduki lo keng go, sikabung kebong go, tandali go kua nglong. Ngga ey, Ki Wali tamot, kuasep, naliwabu kua dali. No, sedue Parisi-a ngge naklay gemang kekeng, sikabung kebong go mea nglong, Ki Wali tamot, kuasep, naliwabu gemang. 9 Nebut sagui ngga, kangok so gemang lemoy-anatun. Woy ngganemot no, ngge kalik sedue Parisi ey Musa logo demutrui so nguok go klui temu eygo lo gemang pu, “Paulus go kuklue atnang kua ikum gabe! Atnang lo duing go, nemot nogo Ki Wali tamot lo nebut mo pen? Kua go kuasep logo-a gabe pen-aton.”
10 Nebut sagui, ngga kalik kangok so lemoy go, plewengkabui lo duing go, “Way-way so Paulus luik go nemotnang lo mea tegek-neyon.” Ngga sogo so pu go, nemotnang nesip sik so Paulus tandali plesedue lo wawi go, plesedue go ibesip no gemang degut.
11 Se senong: wadi nesip go, Paulus mit no Woy Dem ip go, ngge kalik gemang pen, “Mot suali kua tra! Yerusalem sogo, ibe nogo Genam sogo nebut suey so Mot lo mo pen. Nebut ngga kalik go yakena Roma nogo mea pen-analo dali!”
Paulus but so sedue Yahudi nebu pu go
12 Ngga utep wadikua go, sedue Yahudi temu Paulus but genang nebut gemang pu-nenawon. Ngge kalik, seni-seni so tegadi gemang dok-nenawon, “Maning Paulus kua but go, ten ya kua dam, bu ya kua drop gabe!” 13 Seni so, ngga sedue 40 yam blo nogo lo dok-nenawon go, mata dega so. 14 Ngga ey, taitisopuit go trang-trang dega ey, Yahudi go iram-tegay mit no klong go, ngge kalik gemang pu-nenawon, “Paulus but genang so, Ki Wali Iram go suongku no atnang mo pu-etu gabe, ‘Maning Paulus kua but go nogo, ten ya kua dam bu ya kua drop-elu!’ 15 Genamnang go atuia ngge kalik gabe: Iram-tegay nebutdegut genang plewengkabui no motnang se usi, ‘Da klaya dali ngge no, suey so neyboy genang, Paulus wawi go se weng, No, seni so, atnang tap so dali mea bubung, Paulus uweng gono, motnang mit no maning kua pung gono, mea but go kebong.’ ”
Nebut ngge, sedue Yahudi temu lo semu-nenawon go.
16 No, nebut atuia ngga naklay Paulus danon desui lo tup go, keda so natun go plesedue go ibesip sono Paulus gemang pen. 17 Nebut ngge tup gono plewengkabui usi go weng gono, ngge kalik Paulus lo gemang pen-nawon, “Duokaguit ngge wawi go plewengkabui mit no se klong! Nebut nemot lo sogo.” 18 Duokaguit ngga plewengkabui lo wawi go, plewengkabui kangok go mit no nawon go, gemang pu, “Boy ba sogo Paulus lo genam usi go duokaguit ngge wawi go, mot mit no gabe weng. Duokaguit ngge aya ey nebutpen sogo.”
19 Ta no duoneguot ngga plewengkabui kangok golo mlak go, banom gono gemang usi, “Sogo kalik go nebutpen so weng?” 20 Ngganemot no duokaguit lo pu go, “Aya! Sedue Yahudi temu nebut mo pu. Ngge kalik mot no nemotnang lo mea usi, ‘Paulus utep so wawi go, nemotnang mit no klong go, tandali suey so neyboy sogo.’ 21 No, nemotnang go nebut nogo mot kua tup! Seni so, sedue temu 40 blo no, nebut mo pu. Paulus but genang sogo klay tap mo wet. Nggeasui go klaya so lemoy go, ta nat go, nemotnang ten kua dam bu yakua dedrop, e... Paulus but go mea kebong. Seni so, mot lo pu go Paulus klong genang so nemotnang gemang bubung.”
22 Yam so duokaguit lo pen go tup gono, ngge kalik plewengkabui lo gemang pen, “Sikabung meno nogo genam no mot lo pen go kua pen!” Ngga ey, duokaguit ngga tandali pu go gemang klong!
Yakena Kaysarea sono Gubernul Pelis mit no Paulus wawi go
23 Duokaguit lo pen go nebut plewengkabui kangok go tup gono, plesedue wengkabui namon ey, nemot mit no usi go gemang weng. Nggano nemot lo pu go, “Mot namon nggeasui go klong go, plesedue 200 yam so sip klaya gono se yaluim. Nggano, nemotnang no tebok genang plesedue suon eygo 200, kuda eygo tete 70 yam so se! Woy 9 wadi go dali se taut Kaysarea sono go klong sogo. 24 Paulus klak genang kuda se wawi-sing dali. Ngga ey, no Paulus wawi go kekayso Gubernul Pelis mit no se klong.” 25-30 Ngga ey, ngge kalik plewengkabui kangok golo sam gabe klik,
“Gubernul Pelis suey go dega!
Sam ngge Klaudius Lisias lo klik go gabe!
Sedue ngge but go kebong genang so sedue Yahudi lo mlak go.
No, nemot ngge sedue Roma!
Ngganemot sogo so, nemot no genam tebok go,
genam go plesedue lo nemot mo wawi.
Genam lo pu go sedue Yahudi go nebutdegut goso,
suey so genam senong genang,
sogo kalik go kuklue temoy no,
nemot sedue Yahudi logo mo mlak.
No, genam nogo nemot but go kebong genang piam ikum,
boy ba no betep genang piam suey so kua taling dali,
Nemot go piam kua go!
Nemotnang go nebutsagui ngge,
nemotnang go demutrui seguong nogo.
Ngga ey, genam no pu go,
‘Paulus but genang sogo nebut Sedue Yahudi mo degut.
yay suey so Paulus suing genang sogo,
mot mit no pu go genam lo gabe koklong!
Yahudi go iram-tegay no genam lo pu go,
mot mit no klong gono, ngga no suey so mea neyboy!’
Ngga Klaudius Lisias go sam kluim!”
31 Ku ngganemot wadi go, plewengkabui kangok golo pu go Paulus ey wawi go, yakena Antipatris no gemang pung. 32-33 Ngga utep go, tandali plesedue teguey go, yakena Yerusalem no masi lo gemang klong. No, plesedue kuda ey go-a Paulus wawi go, yakena Kaysarea no gemang pluep. Nggano, Gubernul Pelis sono sam ey Paulus ey gemang itak-nenawon.
34 Gubernul Pelis sam ngga ikum gono, Paulus no gemang usi-nawon, “Nan nago sik sogo sedue?” Way so Paulus lo pu go, “Nan Kilikia sik sogo!” 35 Ngga ey, Pelis lo gemang pu-nawon, “Mot nogo nebutpen genang sedue, ngge no pung gono, genam mot logo nebut mea tup-lu dali.” Nggano, plesedue no pu go, banim nogo Herodes logo yap kangok go, boy ba no Paulus gemang degut.