22
Paulus go tang goso pen-anawon go
1 Ngga ey, sikabung Yahudi mata sogo no Paulus lo gemang pen, “Ayanang, duoneguot naklay se tup! At tang so, genam tang go sogo nebut gabe pen-asitugu.” 2 Iblani nebut so Paulus pepen go tup gono, yakot so sikabung mata sogo gemang tebung. Ngga ey ngge kalik Paulus lo gemang pepen, 3 “Yakena Tarsus nan Kilikia no tui go sedue Yahudi genam gabe. No, yakena Yerusalem no babu go. Genam go klui dega Gamaliel. a Babuasi logo demutrui genam nogo, suey so Gamaliel lo mo nguok. Nggano, motnang naklay kalik, Ki Wali Iram nogo dabui lo tupduk go kangok so genam mo keng.
4 Tap inim Yesus lo taling go, srang ey trok so genam lo mo usey. Yang! Sedue ey kabung ey at lo truik go mlak go, dok go boy ba sono gemang tetega. 5 Se senong: genam go tasam ngga taitisopuit go trang dega ey iram-tegay ey naklay mo senong. Genam sogo nebut, nemotnang logo mea pen dali. Banim no yakena Damsik sogo Yahudi go woy-woy no nemotnang sik so sam genam lo mo ikak. Ngga ey, Damsik sono at klong go, Yesus go tap no keng go sikabung mlak go tegan lo dok go, idekeba iti sogo, Yerusalem sono at lo wawi genang.
Yesus go tap no Paulus degut go pen go
6 Yakena Damsik sono go wabedong go se dedagu, kekayso ut sik sogo neblong lo genam ey mablong so itak. 7 Nan blo no kenuong go, ngge kalik pu go genam gabe tup, ‘Saulus! Saulus! Sogo so Genam duk go tutruik?’ 8 Nggano genam lo usi go, ‘O, Woy Dem! Mot nando?’ Way so nebut kluim ngganemot lo pu go, ‘Genam ngge Nasaret sik sogo Yesus, mot lo tutruik go ngganemot gabe!’ 9 Ngga sogo sedue genam ey koklong go, nebut kua tup neblong-a gemang ikum-nenawon. 10 Ngganemot no genam lo usi go, ‘Woy Dem! Sogo-a genam logo ya semu?’ Woy Dem lo pu go, ‘Ip go Damsik no degut-a! Ngga no mot mea senong, sogo kebali-a, mot lo ya pluok.’ 11 Genam go nemu, kekayso neblong ngganemot lo gemang kli. Ngga ey yakena Damsik no andua lo wawi go genam gemang degut. 12 Yakena Damsik sogo sedue meno gemang, nemot go sui Ananias. Nemot Musa lo iti go demutrui nogo tupduk go keng go nogo, yakena Damsik sogo sedue Yahudi lo nemot go sui iway blo sono gemang i-iti. 13 Genam mit no Nemot ip gono, ngge kalik gemang pen, ‘Andua Saulus! Tandali mot ikum-a.’ Woy ngganemot no, tandali genam go nemu pli go, Ananias sono nemu gemang pla-king. 14 Nggano, Ananias lo pu go, ‘Imot go babuasi lo keng go Ki Wali Iram go senongduduing go, seni eygo nemudi sogo Woy Dem ikum genang so, Nemot lo pu go kluim tup genang so mot mo kuoy gabe. 15 Sikabung naklay senong genang sogo, mot lo ikum go, tup go naklay sono mea pepen klong! 16 Nggeasui go, mot lekluik kua. Weng-a, ip go Woy Dem go sui no bu se degut, konkebamling bu lu genang.’ 17 Tandali yakena Yerusalem no genam gabe weng. Ki Wali yap ba no dewi so pupu gono, at go waglo Ki Wali Waglo lo ngap gono, 18 Woy Dem at lo ikum go, ngge kalik Nemot lo gemang pu, ‘Kedaso yakena Yerusalem se itak! Nemotnang ngge nogo, Genam sogo deguo mot lo pepen go yakua tup go keng.’ 19-20 Way so at lo pu go, ‘Yang Woy Dem! Mot go tamot Stepanus but go kin pi go kebong, genam damoy so, ngga genam mo iwat dali.’ Nemot so but go sedue go amka yay genam lo gemang suing. Ngga no, banim Yahudi go dewi yap-yap no tutruik go, suey so nemotnang mo senong. Mot no keng go anduasiyap boy ba sono go, tegan demu lo inya go, nemotnang mo senong. 21 Nggano, tandali genam no Woy Dem lo pu go, ‘Mot-a, ket so no Ki Wali Iram kua senong go saula-saula sono, At lo mot-dak go se klong.’ ”
Plesedue go ibesip sono Paulus wawi go
22 Woy ngganemot no, Paulus lo pen go nebut suey so sikabung mo tup. No, Paulus lo pu go, “Ket so Ki Wali Iram kua senong go saula-saula no deguo teguop pen genang.” Tup-nenawon gono, gemang bega, “Temoy-a but go kebong-a!” 23 Dabuipiam kangok so tra go nogo, bebega, temu lo amka sok go bebetep, temu lo sung ut sono bubluim. 24 Ngga ey, plewengkabui lo pu go, Paulus wawi go plesedue go ibesip sono degut go, neyboy go demun se suey! Ngga sik so senong sogo, sogo temoy no, ngga kalik sedue Yahudi logo pepen. 25 Demunsuey genang so, Paulus plesedue lo tegan lo yam so dok go, plewengkabui no Paulus lo gemang we-nawon, “Aya! Genam ngge, Roma sedue gabe! Sogo kalik go temoy no, maning kua neyboy gono demun-a ya suey?” 26 Plewengkabui ngga, plewengkabui kangok go sono klong go, gemang pu, “Ngge, Roma sedue! Sogo kalik so mo semu-to?” 27 Ngga ey, kekayso plewengkabui kangok go Paulus mit no klong go, gemang usi, “Seni so sedue Roma mot ngge?” Way so Paulus lo yang go, “Roma sedue genam gabe.” 28 Ngga tup gono, plewengkabui kangok golo pu go, “Ye, Esang! Roma sedue so lemoy genang sogo duoy mata so genam mo iti.” Way so, Paulus lo pu go, “Esang! Mia lo tui go sik so, Roma sedue so genam gabe pu.” 29 Nebut ngganemot tup gono, kekayso Paulus neyboy genang sedue-sedue lo ta gemang itak-nenawon. Yang plewengkabui kangok go senong go, “Roma sedue at lo mo dok-tu ba, ngga kalik kua pluok!” 30 Plewengkabui kangok go, maning kua senong, Paulus sogo kalik go kuklue pluok go, sedue Yahudi lo mo pen go? Ngga utep go, plewengkabui kangok golo mot-dak goso, taitisopuit go trang-trang dega ey, iram-tegay ey nebutdegut so gemang pluep. Nggano, senong genang, Paulus logo sogo kuklue mo pluok. Nebutdegut so Paulus plewengkabui lo wawi go gemang klong.