21
Yerusalem sono Paulus klong go
1 Yakena Epesus go blong duoyap ey walong so atnang suey semu go, bayi no klak go nan Kos no gemang klong. Ngga utep go nan Rodos no gemang pung. Ngga sik sogo, bayi so kokok go sip yakena Patara no gemang klong. 2 Patara no Penisia sono klong sogo bayi temu gemang ikum. Nggano, atnang blengot go gemang klong. 3 Koklong go, nan Siplus-a takali idi sono gemang ikum. No, atnang-a, nan Siria sono gabe klong. Bayi ba sik sogo taut ngga no suk genang so yakena Tirus no bayi gemang kok. Ngga tang so, ngga no namboy atnang gemang li. 4 Ngga sogo blong duoyap ey tegu genang so atnang gemang klong. Ngga so nemotnang eygo, minggu klaya yam so gemang suing. Ngga sogo blong duoyap no Ki Wali Waglo lo taling go, Yerusalem nogo Paulus idekeba mea lek. Ngga tang so, nemotnang lo Paulus no nebutmang king go, “Yerusalem nogo kua klong!” 5 Tandali atnang klong genang ku pung gono, Tirus sogo blong duoyap naklay, duo kabung eygo lo genamnang yakena sik so wawi go bayi no klak genang so, beap ketang no gemang klong. Beap ketang no pung gono, atnang naklay segabuem unuik go dewi gemang pu. 6 Ngga ey nemotnang eygo suey yam so semu go, genamnang bayi no blengot go, tandali yap no nemotnang-a gemang klong-lak.
7 Yakena Tirus sik so klong go, yakena Ptolemais no gemang pung. Nggano, blong duoyap ngga sogo no suey pu genang so atnang gemang klong. Nemotnang ey atnang suing go ku klaya. 8 Ngga utep ip go, yakena Kaysarea no gemang pung. Ngga nogo, Pilipus go yap no atnang gemang klong. Pilipus ngge, wali deguo teguop so ngunguok go tamot. Banim, tamot-tamot no tebok go wali kebali semu genang, yakena Yerusalem go blong duoyap 7 yam so kuoy go sik sogo meno. 9 Pilipus go duo kaguit namon-namon yam so. Wali Waglo lo taling go tap senong eygo kabung.
10 Genamnang ngga sogo, ku kata yam so suing gono, Ki Wali Iram go tamot meno, nan Yudea sik sogo, Agabus gemang weng. 11 Nemot, genamnang mit no weng gono, Paulus go kuibey iti go, ta ey masi ey nemot tang so kuibey lo gemang dok-nawon. Ngga ey gemang we-tenawon, “Ki Wali Waglo lo ngge kalik pu go, ‘Yakena Yerusalem no, ngge kalik kuibey ngge go sedue, sedue-sedue Yahudi lo, dok gono, idekeba iti genang so amble go ta sono mea iti.’ ” 12 Ngga tup gono, atnang ey Kaysarea sogo blong duoyap eygo lo Paulus no pu go, “Aya! Yerusalem sono go kua klong!” 13 No, way so Paulus lo tenguo go, “Ngga kalik go u sogonang so kluo-ketogoy? Genam go dabui ey sagoy so teguok go dali yam so genam mo suing. Mlak go dok genang seguong-a kua, no, Woy Dem Yesus go sui nogo so genam mea kebong dali.” 14 Nebut ngga Paulus kua keng goso, atnang lo pu go, “Woy Dem lo duduing go-a se lemoy!”
15 Ngga blo idi lo, atnang taut go Yerusalem sono ip go gemang klong. 16 Yakena Kaysarea sogo blong duoyap temu gemang keng dali. Yerusalem no pung go, Menason dem go yap no gemang ta. Manason ngge, nan Siplus sik sogo, banim seni so blong duoyap so lemoy go.
Yerusalem no blong duoyap go woy Yakobus ey tegu go
17 Yerusalem no genamnang pung go, yakay ey blong duoyap ngga sogo lo gemang wawi-nenawon. 18 Ngga utep go, Paulus no keng go, woy Yakobus ey tegu so genamnang gemang klong. Ngga sogo, blong duoyap go woy-woy naklay gemang pluep.
19 Suey Paulus lo semu-nawon gono, koklong go nogo, saula-saula no nemot lo pluok go tasam suey so klay-klay yam so gemang pen-nawon. 20 Nebut ngge naklay tup gono, Ki Wali Iram go sui iway blo sono, blong duoyap go woy-woy lo gemang iti-nenawon. Nggano, Paulus no, nemotnang lo we-netenawon, “Andua dem! Mot se senong, Yesus no dabui iti mo keng go sikabung Yahudi temu mata dega so gabe. No, Musa go demutrui nogo kangok so maning kekeng dali. 21 Nemotnang mo tup, sikabung Yahudi, saula-saula go nan sogo ngge kalik mot lo gemang nguok, ‘Musa logo demutrui, tandali go ya kua keng! Imening tui go danonnang go saduisuk ya kua tong.’ 22 Nggeasui go, ngge sono mot weng go sedue Yahudi ngga gabe sesenong. Nggeasui go sogo kalik so ne ya semu? 23 Mot nogo ngge kalik atnang go nebutmang, be pepen, ‘Ngge sogo, sedue namon-namon yam so, Ki Wali Iram nogo tegadi mo dok. 24 No, nemotnang go tegadi nggeasui go yam so mo lemoy. Ngganemot sogo so, Ki Wali yap ba no nemotnang degut gono, Ki Wali Iram nogo taiti mea puit. Nemotnang ey mot se klong! Nggano, Yahudi go demutrui kalik saysuk bu lu go, ngga ey, nemotnang go betodop tong genang tete sogo duoy kekayso mot lo se semu-nalo! Ngga tang so, sikabung naklay senong genang, ‘Musa logo demutrui nogo suey so Paulus gabe kekeng.’ ”
25 Se senong: saula meno sik sogo Yesus no dabui iti gono keng go sogo, genamnang lo sam mo klik go iti, nemotnang lo keng genang so pen go:
- Ida nogo so but go menay, blong duoyap logo kua dam;
- kin seguong-a go kua drop kua dam dali;
- menay kin lo nadui go kua dam;
- kin klaya go kabung sogo ya kua iti;
Ngga naklay sedue Yahudi nogo kudemat!
26 Nebut mangking ngga tup go ngga utep, sedue namon-namon ey saysuk bu lu go, Ki Wali yap no gemang degut-nenawon. Ki Wali yap ba no, Paulus lo pu, “Ku 7 yam no Ki Wali Iram no taiti mea puit!”
Ki Wali yap ba sogo sikabung lo Paulus mlak go
27 Ku 7 tete no Ki Wali Iram nogo taitipuit so, Ki Wali yap ba sik sogo Paulus gemang pupung. Woy ngganemot no Paulus Wali yap ba sogo, nan Asia sik sedue Yahudi lo gemang ikum-nenawon. Ngga ey, Paulus mlak genang nebut sikabung ngga lo gemang lekok-nenawon. Ngga ey, sikabung naklay dabuipiam go Paulus gemang mlak-nenawon. 28 Ngge kalik wak ey gemang klung-netenawon, “O, sedue Israel pla tebok-a! Sedue nggenemot lo! Nggaku-nggaku koklong gono, sikabung Israel paysing genang nebut ibe sono Nemot lo mo nguok. Nggano, Musa logo demutrui ey Ki Wali yap ey go paysing genang mo nguok dali. Ngga ey, nggeasui go saula meno, Ki Wali Iram go yap ba no seni so wawi go mo degut-won. Ki Wali yap teguop go kon ey ngganemot lo mo pung.” 29 Seni so, banim yakena Epesus sik sogo Tropimus dem Paulus ey yakena Yerusalem no mo ikum. Ngga tang so, ngga kalik nemotnang gemang pen. Ngga ey ngge kalik pu go, “Ki Wali yap ba nogo Tropimus Paulus lo wawi go mo degut gabe.”
30 Yakena Yerusalem ey yam so ngganemot lo waluk-anatun. Nggano, sikabung naklay kuek-nesiwon go Paulus wok teguot-nenawon gono mlak go dia sono gemang lek. Ngga ey, Ki Wali yap taput naklay kekayso gemang kadun-sing.
31 Paulus but go kebong genang plesagui so sosok. Woy ngganemot dali no, Roma go plewengkabui no gemang pen, “Yakena sikabung naklay, sagui so pupung go!” 32 Nggano, keda-keda so sikabung sagui sogo sip no plewengkabui ngga, wengkabui-wengkabui meno, plesedue temu ey keda so gemang-nenawon. Plesedue mata so uweng go ikum gono, Paulus bubut sogo, sedue Yahudi gemang itak-nenawon. 33 Nggano, sikabung nesip no plewengkabui pung go, Paulus mlak go ta namon ey lante lo gemang dok. Nggano, plewengkabui lo gemang usi, “Paulus ngge nando? Sogo kalik go kuklue mo semu-won?” 34 No, ngge idi lo sikabung temu lo pepen, idi lo temu lo ngga pepen. Ngga nogo, plewengkabui suey so kua senong-srenawon. Ngga sogo so, plesedue go ibesip sono Paulus nemot lo pu go wawi go gemang klong. 35 Ngga kalik Paulus plesedue lo wawi go koklong go, e... plesedue go ibesip tenglam keklak gono, sikabung mata so Paulus but genang dagu no gemang yaluim-nenawon. Ngganemot sogo so, yalu no keda so plesedue lo Paulus lek go bauk blo sono gemang klak. 36 Nemotnang no sikabung mata sogo keng go ngge kalik gemang bega klong, “Temoy-a but-a!”
37 Plesedue go ibesip no, degut so se, ngge kalik Yunani nebut so plewengkabui no Paulus lo gemang usi-nawon, “Nggeasui go genam mot ey nebut ya pen?” Paulus go nebut tup gono, way so plewengkabui gemang usi-nawon, “Ey! Yunani nebut mo senong?” 38 “Ngga kalik go mot sedue Mesir ngga kua ba? At-a pu ngge demening plesagui so amble no semu go, sedue 4 ribu yam sogo ey kaseglokpay sono kuek go wengkabui.” 39 Nggano, Paulus lo pu go, “Genam ngge, Yahudi sedue sui eygo yakena Tarsus nan Kilikia sik sogo. Sikabung mata sogo nogo nebut genam logo ya pen-asilu?” 40 Plewengkabui yang-nawon gono, tenglam blo no Paulus ip go ta lo gemang taling-nawon. Nggano, sikabung yakot so tebung go Iblani nebut so Paulus lo gabe pen-asiwon.