20
Nan Makedonia ey Yunani eygo sono Paulus klong go
1 Epesus yakena go nebutsagui yam so logo, blong duoyap Paulus lo yaluim gono, don kok genang mang gemang king-anawon. Ngga ey, suey semu-nawon go, nan Makedonia sono gemang klong. 2 Nan Makedonia lo koklong go nogo, yakena-yakena ngga sogo, a blong duoyap tap lo tegu go, suey so nebutmang mata so gemang pen-asiton dali. Ngga kalik semu-siton go nan Yunani b no gemang pung. 3 Nan Yunani so banu nangglik ey Paulus gemang got-nawon. Ngga sik sogo, nan Siria no tandali klong sogo so taut-tenawon. No, esang! Ku ngganemot nogo, Paulus but go kebong sogo nebut sikabung Yahudi ngga sogo lo mo degut. Deguo ngga tup go tang so, nan Siria nogo bayi logo kua klong. No, tandali Makedonia tap lo gemang ya klong. 4 Paulus ey koklong go andua-andua, Pirus go danon Sopater dem Yakena Berea sik so; Aristarkus ey Sekundus eygo yakena Tesalonika sik sogo; Gayus dem yakena Derbe sik sogo. Timotius dem, Nggano, nan Asia sik sogo Tikikus ey Tropimus dem ey. 5 Nemotnang ngge, banim klong go, yakena Troas so atnang Paulus eygo so gemang bubung. 6 Walop Paska atnang degut gono, yakena Pilipi no, mesip so yakena Troas no bayi lo gemang klong. Koklong go, ku taidi yam no, yakena Troas no Timotiusnang ey gemang tegu. Ngga so, tandali klay gono minggu klaya yam no atnang gemang suing.
Denok kebong go tandali nglong go
7 Ku Minggu wadi go, Yesus go sui no loti betok go dam genang, klay gono atnang mo yaluim. Ngga utep go, Paulus klong eygo so, sikabung ngga sogo ey nebut pen-netenawon go wadi ku nesip yam nogo maning pen-tenawon. 8 Se senong: degu blo sogo koy blong mata so gemang. 9 Ngga sogo, duoneguot meno gemang, nemot go sui, Etikus. Yap put tong gono gemang suing. No, nebut walong bata so Paulus lo pepen go nogo, usene so wim go yap blo da nangglik sik so kekayso ku sono duoneguot ngga gemang kenuong. Ngga ey, sikabung lo lek-nenawon go, ikum go, kekayso mo kebong sang.
10 Nggano, ku sono Paulus li go, duoneguot no kluguok go ta lo teguot go, ngge kalik gemang pen, “Motnang suali kua tra! Wali ey nemot maning be.” 11 Ngga ey, tandali degu blo sogo no klak go, ten Paulus lo betok go, wasey go, klay gono gemang dam. Tandali nebut pepen, ku ey blong go, Paulusnang gemang ip-nenawon. 12 Duoneguot wali go ngga, tandali yap sono wawi go gemang klong. Ngganemot nogo, yakay ey donkok go sikabung gemang tetra.
Yakena Troas sik so yakena Miletus sono Paulus klong go
13 Paulus lo pu goso, yakena Asos no banim genamnang bayi lo gemang klong. Yakena Asos sono Paulus-a Metuik tap lo gemang koklong. Ngga sogo bayi no Paulus klak dali genang nemot lo mo taling.
14 Yakena Asos no bayi no klak go, yakena Metilene sono atnang gemang klong. 15 Metilene sik sogo, ngga utep go, nan Kios go nebuem ku lo gemang tong. Nggano, nan Samos no ngga utep go pung go, kayseguong so yakena Miletus no ngga utep dali go gemang tebok. 16 Ngga kalik koklong go, nan Asia gemang itak-lak. Seni so, ku yam so kua eygo sogo so, Epesus no degut sogo Paulus lo kua pu-srenawon. Nemot lo duing go, “Ngge suey, yakena Yerusalem no walop Pentakosta atnang keng sogo be.”
Epesus blong duoyap no suey semu go
17 Yakena Miletus no pung gono, tamot-a Paulus lo mot-dak go tandali Epesus no gemang kenawon. Ngga sik sogo, yakena Miletus no blong duoyap go woy-woy pu go weng genang so.
18-19 Paulus mit no nemotnang pluep gono, ngge kalik gemang pen-anawon, “Ayanang! Takuduen so Asia no genam degut go sik so, genam wali go, motnang mo senong. Motnang ey susuing go nogo, Woy Dem nogo kebali, dabui lo kangok so genam mo usey. Yang! Dabui dodonkuago so, unebu ba lo ngga mo pluok. Seni so, genam but sogo tap sedue Yahudi lo mo wet. Ngganemot sogo so, ngge so genam suing gono, idekeba kangok go mo lek. 20-21 Motnang nogo seni eygo-a semu genang, at logo kua keneng gabe. Ibe blo no, banom-banom so, yap-yap ba nogo, sedue Yahudi ey sedue saula-saula eygo no deguo teguop at lo mo pen klong. Seni so, don ey nebutmang genam lo mo pen, ‘Ki Wali Iram sono motnang se teguey, ngga ey dabui-a Yesus no iti go se keng!’
22 Ayanang! Nggeasui go, Ki Wali Waglo lo lek go tang so, yakena Yerusalem no at gabe koklong. Seni so, sogo kalik so ngga no ya lemoy, genam kua senong. 23 No, yakena-yakena no genam pung go nogo, ngge-a genam no senang so Ki Wali Waglo lo gemang tetaling, ‘Ide keba ey boy eygo-a genam so dali gemang bubung.’ 24 Genam go saysuk nogo, genam kua duduing. Ngge-a gabe duduing, ‘Woy Dem Yesus lo pu go kebali-a, naklay genam lo pluok so be, tap ngga genam kua itak.’ Yangga: Ki Wali Iram sik sogo gualaklum ey taitiklum eygo deguo teguop sikabung naklay senong genang, pen so gabe koklong!
25 Ayanang! Motnang mit no koklong golo, Woy Wali Iram tamlak go blongdon duduing nogo tap genam lo mo nguok. Nggeasui go, genam mo senong, genam motnang eygo tandali ya kua tegu. 26-27 Ngganemot sogo so, nggeasui go, motnang nogo kangok so gabe pen-asitugu, ‘Nggeasui go sik so iti go, motnang sik sogo sedue klaya duo, walitap sik sogo nega go, genam go idekeba kua gemang. Ki Wali Iram go tap motnang nogo naklay at lo mo nguok. Klaya nang go kay go kua itak.’
28 Ayanang! Wali yay mot go tang so yay se suing! Nggano, motnang go ta sono Ki Wali Waglo lo itak go blong duoyap nogo tap suey so motnang lo se tetaling. Kua kay! Ki Wali Danon go kin, Ki Wali Iram go blung nogo so mo pi gemang. Blung ngganemot suey so yay motnang lo se suing! 29 Genam mo senong! Genam koklong go blo lo, tap paysing so taling genang, klui-klui temu blong duoyap ba no mea degut. Nemotnang, duenuduo kalik iseng ey. Sikabung, waluk genang tap, nemotnang lo mea nguok. 30 Yang! Motnang sik sogo sedue temu mea ip dali. Nemotnang no blong duoyap keng genang, walitap seni eygo itak go wamoy sogo tap-a mea taling. 31 Ngganemot sogo so, kunala temoy no se susuing! Motnang kua kay! Kuno-woyno, yagui nangglik ba no, motnang klay-klay nogo nebutmang, unebu ba lo genam lo mo king.
Takuduen sik so motnang nogo so dali tui go taitiklum, blong duoyap Ki Wali Iram lo teguop go naklay mo iti. 32 Ayanang! Nggeasui go, Ki Wali Iram go ta no, Ki Wali Iram go deguo klum eygo nogo, motnang gabe i-itak. Nemot go blung buong genang don, Nemot gemang. Tegadi so dok go naklay Nemot lo mea iti. Seni!
33-34 Ayanang mo senong. Sikabung klaya duo nogo amka ey duoy ey genam kua wadong gabe. Wali nang sogo ten, amka, taut meno, genam tang go ta lo mo wet. Nggano, genam go andua-andua nogo ey mo wet dali. 35 Seni so, yatrang ngga genam lo semu go ngge kalik mo pen, ‘Seguot ey kebali blong duoyap lo se pupluok. Ngga ey, sikabung taut kua go nogo, tebok genang. Yang! Woy Dem Yesus lo nguok go nebut kua kay!’ Nemot lo ngge kalik so mo pen-ngam, ‘Mot nogo taut sedue lo iti go ngga yakay genang. No, sikabung meno no taut iti go-a, kangok dega so mot nogo yakay mea pung.’ ”
36 Nebutmang ngge, naklay pen gono, Paulus ey, Epesus sik sogo woy-woy ey, segabuem unuik go, dewi gemang pu-nenawon. 37 Dewi yam so pu gono, nemotnang Paulus ey taluik go, u kangok so gemang kluo-nenawon. 38 Seni so, nemotnang u kluo go, ngge kalik Paulus lo pu go sik so, “Genam tandali go motnang ya kua ikum.” Nggano, nemotnang lo Paulus wawi go klong go bayi no gemang klak.