Paulus ni surat ber soranyar na
Roma
Ngribatin Luryain
Noak ma Paulus to nti nakmat soranyar a na Roma fuky e, i narengi surat ber sir. I narengi surat ber sir nema sir bise ma rasusan sir la rdaf i. Paulus nose ma namin iano lerar fir a ne ma nkarya nor tomwatar ma ralele Yesus na iane. Mpene sir keta rtulung i a na ni mpampane far Spanyol. Paulus narengi surat ye ma nfalyole ni andanwar ber sir. Iane feti tomwatar ma ralele Yesus ka rose safe na nir momorip.
Lama narengi monuk e, i nose salam ber soranyar na kote Roma. Ma i nfalak a nbal feti i dedesar ma nsampayang ber sir. Ne Paulus narengi ngrie ma ubany desar na ni surat ye dalam feti, “Nof Ibar Ngamone ma i nafwibar a ne tomwatar bise ma rangamon a nbali ror Ratu. Sir bise ma rangamon a rbali ror Ratu farlan dedesar ma ralele I.”
(1:17 ) Paulus nfalyole feti tomwatar monuk ka rangamon a rbali ror Ratu boloka tomwat Yahudi sir nre to tomwat Yahudi sir, fali tomwatar monuk rose sale lo. Ma tomwatar monuk bise ma rangamon a rbali ror Ratu farlan sir ralele Yesus ninr Ray Silai. Ne Paulus nfalyole nbal feti noak ma tomwatar dalmir lese ror Yesus ninr Ray Silai keta Ratu nafbweberi nbali nir momorip. Sir ronri momorip beberi fali sir ralele Ratu ma Ni Smwangtany ma nkarya na dalmir. Tomwatar ma ralele Yesus lo, keta rmorip rangamon ror Ratu, ma Ratu Smwangtany nfair sir nof sale ma mamate ni kuase.
Na 5; 8 Paulus nfalyole na Ratu Ni tetetkar, ma Ratu Smwangtany ma nkuase tomwatar ma ralele I a ne nir momorip. Paulus nfalyole nbal feti Ratu ntetak lo ma keta tomwat Yahudyar ma tomwatar ma to Yahudi sir a ne reluk Ni tomwatar. Mpa Ratu keta to nfair lan tomwat Yahudyar nempa nfair tomwatar ma to Yahudi sir a nbal. Paulus nfalak a nbal feti Ratu ntetak lo ma tomwat Yahudyar keta rasipur Yesus. Nempa i nalele feti tomwat Yahudyar rasipur Yesus nwayat ma Ratu nfatutu Ni dalamy ngamone ber tomwatar ma to Yahudi sir. Paulus nalele feti keta to tomwat Yahudyar monuk ma rasipur Yesus. Ma narengi nbal feti tomwatar ma ralele Yesus a ne ka rmorip farpe, ma nlengan e ka rmorip e, rakamis sir.
Mpa Paulus narengi ni andanwar na surat ye farye: 1. Tkarya ber Ratu, 2. Safe ma ka tomwatar ma ralele Yesus rose ber nir mangfaretar ma ber soranyar walyetar 3. Ma felan farpe ma rtetak feti mpe ma diat ma mpe ma sale. 4. Na surat mangtan famudi ye Paulus nal ni snyurtar yadin ma ndangin Ratu.
Surat ye isiny
1:1-17 Paulus ni ngribatin luryain