Tomwatar ma rmorip a rlarat Ratu Smwangtany Ni mpempeang
8:1-17
1 Wangur,
kit dalminrar lese tor Yesus ninr Ray Silai lo mpa lere ye Ratu to nukun kit.
2 Ma fali dalminrar lese tor Yesus ninr Ray Silai mpa Ratu Smwangtany Ni kuase ma nal momorip beberi ber kit.
Ratu Smwangtany Ni kuase nbal ma nalin kit nof sale ma nkuase dalminrar nwayat ma tmat dedesar.
3 Ma tetetkar ma Ratu nal ber Musa to bise ma nalin kit nof sale ma nkuase kit a ne.
Fali dedesar ma tlarat makeus yatak ma namin kit a ne.
Mpa Ratu nsiduk Anaky ma nma saryamprene ma neluk tomwate.
Ma I tenany na saryamprene ye farlan tomwatar kit a nbal,
nempa I to nose sale farlan ma biase kit tose.
Ma Ratu Anaky a ne nmat la nalin tomwatar kit nof ninr salar,
nema nof Anaky Ni mamate ne Ratu nafufu sale ma nkuase dalminrar.
4 Ratu nose farane nema kit tmorip a tlarat Ratu Smwangtany Ni mpempeang,
ma to tlarat ninr makeus yatkar.
Mpa boninrar ral ma tose tlarat Ni mpempeang farlan ma rarengi na tetetkar ma I nal ber Musa.
5 Tomwatar ma rmorip a rlarat nir makeus yatkar keta rdaun lan nir makeus yatkar.
Nempa tomwatar ma rmorip a rlarat Ratu Smwangtany Ni mpempeang keta rdaun lan kabanir ma rlarat Ratu Smwangtany Ni mpempeang.
6 Fali tomwatar ma rdaun lan nir makeus yatkar keta Ratu nukun sir ma rmat dedesar.
Nempa tomwatar ma rmorip a rlarat Ratu Smwangtany Ni mpempeang keta ronri momorip dedesar ma rmorip e,
rangamon ror Ratu.
7 Tomwatar ma rdaun nir makeus yatkar keta dedesar ma rbangal Ratu.
Ma tomwatar ma farane,
sir to rmpeang ma rose rlarat Ratu Ni tetetkar fali ni botuan e,
to bonir ral ma rose rlarat Ratu Ni tetetkar a ne.
8 Tomwatar ma rmorip e rose rlarat nir makeus yatkar,
keta to bise ma rafsenange Ratu dalamy.
9 Nempa kmi e,
to myorip a mlyarat mir makeus yatkar lo.
Ma myorip a mlyarat Ratu Smwangtany Ni mpempeang fali I dedesar ma namin dalminrar.
Farlan Ratu Smwangtany to namin dalminrar iane feti kit to teluk ninr Ray Silai Ni tomwatar.
10 Nempa farlan ninr Ray Silai namin dalmir,
keta Ratu Smwangtany nafmorip a nbali kmi,
boloka mir salar rwayat ma tenmir a rmat.
Ma Ratu Smwangtany nafmorip a nbali kmi fali Ratu nafdiat a kmi lo na sounlury.
11 Ratu Smwangtany ma nafmorip a nbali Yesus nof Ni mamate.
Mpa farlan Ratu Smwangtany namin dalmir,
keta I nafmorip a nbali tenmir ma rmat a ne.
Ratu nose farane fali Ni Smwangtany a ne namin dalmir.*
12 Mpa wangur,
kit ye farlan tomwate ma ka nbaras ni utang.
Ratu Smwangtany namin dalminrar mpa ka tmorip a tlarat Ratu Smwangtany Ni mpempeang,
iane ninr utang ma ka tbaras a ne.
Ma ka kete tmorip a tlarat ninr makeus yatkar.
13 Fali farlan tmorip a tlarat ninr makeus yatkar keta Ratu nukun kit ma tmat dedesar.
Nempa farlan tmorip a tlarat Ratu Smwangtany Ni mpempeang,
keta ntulung kit ma to tose tlarat ninr makeus yatkar lo.
Ma iane ma nwayat ma keta tmorip dedesar tor Ratu.
14 Tomwatar monuk ma Ratu Smwangtany nrure nir momorip,
sir a ne ma keta reluk Ratu angkir.
15 Luryain e,
kit tose tlarat Ratu Ni tetetkar,
mpa farlan to tose tlarat tetetkar a ne kit tamtaut feti keta Ratu nukun kit.
Nempa lere ye kit to tamtaut fali Ratu nal Ni Smwangtany ber kit lo.
Ma Ni Smwangtany a ne ma nose ma kit teluk Ni angkir.
Ma Ratu Smwangtany Ni kuase ma nose ma bise tar I feti,
“O Amo,
Ko ye Amyamar Ratu ber Ko!”*
16 Ratu Smwangtany koko I a nkarya na dalminrar ma nose ma tkaul tal feti kit ye teluk Ratu angkir.
17 Ma Ratu angkir ber kit mpa la tonri ninr wayat ma nau ber Ni angkir.
Ma keta tonri ninr wayat ma feleles farlan ma Ratu nal ber Yesus ninr Ray Silai,
fali kit tkoman suse tbalak I mpa keta tomwatar rdangin kit farlan ma rdangin I a nbal.
Kabain ngamonar ma keta tonri na lere ma nma ne keta nlie nlengan susar ma tkoman na lere ye
8:18-30
18 Wangur,
yakw kulele desar feti Ratu keta nal momorip ma nangafel desar ber kit.
Momorip ma Ratu nal a ne nlie nlengan nof susar monuk ma kit tkoman lere ye.
19 Safe-safe ma Ratu nose na langit ma saryamprene ye,
rdaf dedesar ni tewat ma Ratu nafbotin Ni angkir.
20 Luryain e,
Ratu nukun safe-safe monuk ma ramin saryamprene ye nwayat ma to ubnir sasaf mpa to rafdiat safe ma Ratu ntetak ber sir nof luryain a ne.
Ma Ratu nukun sir farane to nlarat nir mpempeang nempa nlarat koko I Ni mpempeang farlan ma ntetak a ne. *
21 Iane nwayat ma safe-safe monuk ma ramin saryamprene rdaf dedesar ni tewat ma Ratu nalin sir nof kuase ma nafyatak sir a ne.
I nose farane nema keta raktem Ratu angkir rmorip ma nangafel.
22 Kit tafai feti nof luryain terik lere ye safe-safe monuk ma ramin saryamprene ye rkoman suse.
Suse ma sir rkoman a ne feleles farlan batar sa ma nkoman maninik noak ma namtoranbab.
23 To lan safe-safe na saryamprene ye ma rkoman suse,
nempa kit a nbal.
Luryain e,
Ratu nal Smwangtany ber kit neluk faniak feti keta I nal safe-safe ma nyoding ber kit a ne.
Iane nwayat ma kit dedesar ma tdaf ni tewat ma Ratu nafbotin feti angkir ber kit.
Na lere ne keta I nal teninrar beberi ma keta to rmat.
24 Na lere ye kit talele feti Ratu nfair kit lo,
ma dedesar ma tdaf feti keta nafdiat safe ma nyoding ber kit a ne.
Nempa farlan I nafdiat safe ma nyoding ber kit a ne lo,
keta to tdaf lo.
Fali tomwatar to rdaf kabanir ma ronri lo.
25 Nempa farlan talele kabar sa ma to tonri fuky,
keta dedesar ma tsabar la tdaf kabar sa ne.
26 Ma Ratu Smwangtany ntulung kit a nbal noak ma to tamkoran,
ma to tafai feti tose safe na ninr momorip.
Ma Ratu Smwangtany koko I ma nlikur kit ma nsampayang ber Ratu,
noak ma to tafai ma tfalak ninr ngribatnir ber Ratu mpa tsanau melawas motak.
27 Mpe Ratu nafai tomwatar dalmir,
ma nafai nbal safe ma Smwangtany koko I a ntak nof I a ne.
Fali Ratu Smwangtany nsampayang ber Ratu Ni tomwatar nlarat Ni mpempeang.
28 Wangur,
kit tafai feti safe-safe monuk ma diat kit boloka iane yatak nre ngamone,
Ratu bise ma npaki monuk-monuk a ne ber ninr ngamone.
Ratu nose farane ber kit ma tkamis I.
Ma ber kit ma nfil kit a ne nema tose tlarat Ni mpempeang.
29 Fali Ratu nafai nof luryain lo na tomwatar monuk ma keta nfil sir a ne.
Ma I ntetak nof luryain lo feti keta nir adat feleles farlan Anaky Yesus,
nema Yesus neluk Keyai ber tomwatar monuk ma ralele Ratu.
30 Mpa tomwatar ma Ratu ntetak nof luryain a ne,
I nfil sir ma neluk angkir.
Ma sir ma nfil sir a ne,
I nafdiat sir a nbal na sounlury,
ma keta ndangin sir a nbal.
Ratu nfatutu Ni dalamy ngamone ma nlie nlengan ber kit nalyole Yesus ninr Ray Silai
8:31-39
31 Wangur,
farlan tanremi safe-safe monuk ma Ratu nose ber kit a ne,
kit tafai botuan feti Ratu dedesar ma nor kit,
nwayat ma to tomwate fen lese ma nbangal nal kit.
32 Ma koko I Anaky desar e,
to nlompang I ma nkoman suse,
nempa nanrenre I ma nmat la nlitan kit.
Mpa farlan I nanrenre Anaky ber kit e,
botuan feti keta I nal safe-safe ma nyoding ber kit a ne.
33 Ratu nfil kit lo mpa ise ma bise ma nfasale kit?
To tomwate fen lese.
Fali I nlure ninr salar ma nafdiat kit a na sounlury.
34 To tomwate fen lese ma bise nfasale kit fali Yesus ninr Ray Silai ma nafdiat kit.
I nmat la nlitan kit ma to lan iane nempa I nmorip a nbali.
Ma lere ye I namtoran Ratu seriny fian ma ntulung kit nof tomwatar ma rfasale kit a ne.
35 To sasaf ma nose nteri Yesus ninr Ray Silai ma nkamis kit.
Boloka tomwatar rtean kit nre rose ma tkoman suse,
nre rsil a rbabal kit,
nre tamlafar,
nre to ninr rabit.
Ma boloka rose ma rfen kit ma ketla tmat,
nre rfen kit ma tmat,
nempa Yesus ninr Ray Silai dedesar ma nkamis kit.
36 Kit lolone tkoman kabanir monuk a ne farlan ma rarengi na Kitap Lelerap dalam farye,
“Lerar monuk tomwatar rose ma rfen kam fali mlarat Ko.
Sir rose kam farlan dombayar ma rose ma rfen sir.”*
37 Boloka safe-safe monuk a ne diat kit,
nempa to nose ma tsue kit.
Ma iane nose ma tafal ma tamkoran fali Yesus ninr Ray Silai nkamis desar kit.
38-39 Yakw kfwalak farane fali yakw kulele feti Ratu nkamis desar kit.
Boloka tmat nre tmorip e,
dedesar ma I nkamis kit.
Ma malaektar nre smwangtar a nbal to bise ma rose rteri Ratu ma nkamis kit.
Ma safe-safe monuk ma diat kit na lere ye nre na lere ma nma ne,
ma safe-safe ma rkuase na langit ma na saryamprene,
nre kabain safar motak,
to bise ma rakese kit ror Ratu Ni ankamis.
Ratu nfatutu Ni ankamis nalyole safe ma Yesus ninr Ray Silai ma neluk ninr Mangnrure ne nose ber kit.