Paulus dalamy loloi fali tomwat Yahudyar to rmpeang ma ralele Yesus
9:1-5
1 Wangur mir kateman,
safe ma yakw kfwalak ye nof dalangw kateman ma to klwepusuk,
fali dalangw lese kor Yesus ninr Ray Silai.
Ma Ratu Smwangtany nafai dalangw feti safe ma kfwalak ye botuan.
2 Yakw kmpweang ma kfwalak feti yakw dalangw loloi ma suse desar fali tomwat Israelar to rmpeang ma ralele Yesus.
3 Mpa kwinrang motak ma Ratu nukun yakw la klikur sir,
ma nose ma to dalangw lese kor Yesus ninr Ray Silai lo,
lan feti Ratu nfair waingw Israelar a ne.
4 Fali Ratu nal kabain ngamonar yadin ber sir.
I nfil sir ma reluk Ni tomwatar,
ma nal sir a neluk angkir.
Ma nfatutu Ni kuase ma nlie nlengan ber sir.
I nose Ni yoyoding nor sir lain fir a ne lo.
Ma I nal Ni tetetkar ber sir,
ma nfatutu sir feti felan farpe ma rsatngur ber I.
Ma lain yadin e,
I nafdiat safe ma nyoding ber sir a ne lo.*
5 Sir ye empnir nusnir ber Abraham,
Ishak ma Yakub.
Ma ramtoranbabe Yesus ninr Ray Silai nof nir dasdalam,
fali noak ma neluk tomwate e,
I nof dasdalam Israel.
I Ni kuase silai nlengan nof safe-safe monuk,
ma I ye Ratu ma ka tomwatar rdangin I terik ma dedesar.
Amen.
Ratu to nfil nof Abraham ni dasdalam monuk ma ronri Ni yoyoding
9:6-18
6 Boloka tomwat Israelar yadin to rmpeang ma ralele Yesus nempa iane to feti Ratu to nafdiat Ni yoyoding ber sir.
Fali to tomwatar monuk ma rof dasdalam Israel ma Ratu nfil sir ma reluk Ni tomwatar.
7 Ma nof Abraham ni dasdalam e,
to angkir monuk ma keta ronri safe ma Ratu nyoding.
Fali Ratu nfalak ber Abraham:
“Lan angkam Ishak ni dasdalam ma keta ronri safe ma kyoding.”*
8 Iane feti nof Abraham angkir a ne to monuk-monuk ma Ratu nal sir neluk angkir.
Lan sir ma ramtoranbabe sir a rlarat safe ma Ratu nyoding a ne ma keta reluk angkir.
9 Fali noak a ne Ratu nose Ni yoyoding ber Abraham na Ishak farye:
“Na ngarak ma nma ye,
na lere ma feleles farye nbal,
keta Yakw kmwa,
ma na lere ne keta Sara namtoranbabe kanak merwan sa.”*
10 To lan iane nempa kit bise ma tsalan contoh sa nbal ma Ratu nfil Ni tomwatar.
Ribka ye namtoranbabe kanak merwan lakruar ma amnir ber nusninrar Ishak.
11-12 Noak ma Ribka to namtoranbabe angkir du a ne fuky,
Ratu nafbotin ber i lo feti,
“Kanak keyai keta neluk kawar ber kanak famudi,”
Noak ma Ratu nafbotin farane kangkir du a ne to ramtoranbabe sir a fuky,
mpa to rafai feti rose ngamone nre yatak.
Nempa noak a ne Ratu nfatutu lo feti ise ma keta nonri Ni berkat.
I nose farane ma nfatutu feti I nfil Ni tomwatar ma ronri Ni berkat,
to nlarat nir adat,
nempa nlarat safe ma ntetak lo.*
13 Na Kitap Lelerap dalam rarengi nbal farye:
“Yakw kwamis Yakub,
ma kwedan Esau.”*
14 Farlan farane nre kete tomwatar ketnir nof a kmi rfalak feti Ratu to namlonry fali I nfil ketnir ma ketnir e,
tate.
To farane desar.
15 Fali Ratu nfalak ber Musa,
“Farlan ktwetak ma klwompang tomwatar sa keta klwompang i,
ma farlan ktwetak ma dalangw nangamon ber tomwatar sa keta kfwatutu dalangw ngamone ber i.”*
16 Mpa Ratu nfil tomwatar sa to nof ma nlarat tomwate ne ni mpempeang nre kabain ngamonar ma i nose,
nempa nof lan Ratu Ni dalamy ngamone ma ber i.
17 Na Kitap Lelerap dalam a nbal e,
Ratu nfalak ber Firaun:
“Yakw kfwil ko ma mweluk ray,
nema nof safe ma kose ber ko a ne,
Yakw bise ma kfwatutu Ningw kuase,
mpa tomwatar monuk na saryamprene rdangin ngarangw.”*
18 Mpa Ratu nfatutu Ni lolompang ber tomwatar sa,
ma nose ma tomwatar sa ma ulun arwaluk.
I nose farane nlarat Ni mpempeang.
Ratu nukun tomwatar ketnir nempa nfatutu Ni lolompang ma ber ketnir a nbal
9:19-24
19 Wangur,
botuan feti keta tomwatar ketnir nof a kmi a ne rfalak farye:
“Farlan farane safema Ratu dedesar ma nfasale tomwatar ma rose sale?
To tomwate fen lese ma nbangal Ratu Ni mpempeang nre!”
20 Ka kete mfyalak farane.
Kit ye tomwate kit motak ma Ratu nose kit.
Mpa to bise ma tfasale Ratu ma tfalak,
“Safema Ko mose kam farye?”*
21 Ni botuan e,
tomwate ma nose ngusi ne,
bise ma nose safe motak nof ompak nlarat ni mpempeang.
Ma nof ompak batin a ne,
bise ma nose ngusyar du.
I keta nose ngusyar sa ma nangafel resi,
ma nose ngusyar sa nbal ma biase motak.
22 Iane farlan ma Ratu nose ber kit a nbal.
I Ni kuase ma nose ber kit nlarat Ni mpempeang.
Ni botuan e,
nmpeang ma nfatutu Ni resar ber tomwatar ma rose sale,
fali rose ma I nares.
Ma keta I nfatutu Ni kuase ma nukun sir.
Nempa I bise nbal ma nfatutu feti nsabar ber tomwatar ma ketla nukun sir a ne.
23 I nose farane nema tomwatar rsalan Ni dadangin ma nlie nlengan.
Sir a ne tomwatar ma nkamis sir.
Ma I nfil sir nof luryain lo ma nfatutu Ni lolompang ber sir nema ronri Ni dadangin.
24 Kit ye ma Ratu nfil kit lo ma tonri Ni dadangin a ne.
I to nfil lan tomwat Yahudyar nempa nfil tomwatar ma to Yahudi sir a nbal.
Ratu nfil tomwatar ma to rof nus Israel ma reluk Ni tomwatar
9:25-29
25 Luryain e,
Ratu nfalak ber nabi Hosea ma narengi na ni kitap farye:
“Sir ma luryain e to reluk Ningw tomwatar,
keta ktwar sir ma reluk Ningw tomwatar.
Ma tomwatar ma to kwamis sir a ne keta kfwatutu Ningw ankamis ber sir.”*
26 Luryain e,
Ratu nfalak ber sir feti:
“Kmi to myeluk Ningw tomwatar,
Nempa nait ni tewat e,
I nfalak ber tomwatar a ne feti:
Yakw ye Ratu ma nmorip dedesar ne angkir ber a kmi.”*
27 Ma nabi Yesaya nfalak na tomwat Israelar feti:
“Tomwat Israelar a ne yadin sir farlan knryai na dol nempa boloka farane lan ketnir nof sir ma keta Ratu nfair sir.”
28 Fali botuan feti Ratu keta nukun tomwatar monuk na saryamprene ye ma to dodo a nbal e,
i nukun sir lo.
29 Nabi Yesaya nfalak na tomwat Israelar a nbal feti:
“Farlan Ratu ma nkuase na safe-safe monuk ne to nau tomwatar ketnir nof ninr dasdalam e,
botuan feti kit ye tmat monuk lo farlan tomwatar na Sodom ma Gomora.”*
Tomwat Israelar yadin to rmpeang ma ralele Yesus
9:30-33
30 Mpa wangur,
yakw kdwaun farye:
tomwatar ma rof nus walyetar to rareke ma Ratu nafdiat sir a na sounlury.
Nempa Ratu nafdiat sir a ne fali ralele I.
31 Ma tomwat Israelar e,
to farane.
Nof luryain e sir rareke ma Ratu nafdiat sir a na sounlury nof ma rlarat tetetkar ma nal ber Musa.
Nempa sir to ronri safe ma rareke ma rose ne.
32 Sir to ronri safe ma rareke ma rose ne fali sir rose rlarat tetetkar a ne ma rafdiat sir.
Nempa to rareke ma ralele Ratu.
Sir to rareke ma ralele Ratu mpa sir farlan tomwatar ma rtutuk sir a na bati.
33 Safe ma diat sir a ne feleles farlan ma rarengi na Kitap Lelerap dalam feti:
“Yakw kfwalak ber a kmi,
ni botuan e,
knwau bati na Sion lo
tomwatar yadin rtutuk sir a na bati ne nwayat ma rfufw,
Nempa tomwatar ma ralele I keta ntulung sir.”*