1 Korintus i

Paulus ni surat pertama ber soranyar na

Korintus

Ngribatin Luryain

Paulus ye ma nafwibar Ibar Ngamone na Korintus. I namin iano doan ngarak lese lian ma naftutu sir. Iane nwayat ma tomwatar na Korintus a ne ralele Yesus ma reluk Ratu Ni soranyar. Noak ma Paulus narengi ni surat pertama ye i namin kote Efesus. I narengi surat ye fali ngriar yadin ma diat soranyar. Korintus ye neluk ibu kota na propinsi Akhaya ma namin Roma ni ain farete. Tomwatar rof nusar felnir mpane ramin kote ye. Kote ye nsor monuk mpenempen fali tomwatar yadin rafenry kabain na iano. Ma agamar felnir mpane ramin mpa nir adat ma nir wewelmpampane to nangafel.

Paulus nsurat sir fali rose ngriar ma farye: Sir rmorip e rakes rasam sir, raosangri, ma rose ngriar na fasawe, to rafai feti mpe ma diat ma mpe ma sale, to rose rlarat soranyar nir yayatrwar, rabangal a na fakoran ma Ratu Smwangtany nal ber sir, ma sir rabangal a nbal na mangmwatar ma rmorip a rbali. Paulus nfatutu Ratu Ni Ibar Ngamone ma nfalyole ber sir nema bise ma rafbweberi nir momorip.

Na (13) Paulus nfalak na felan farpe ma tomwatar ka rakamis sir. Ma pasal ye ma nsor nlengan nof pasal walyetar na kitap ye.

Surat ye isiny

1:1-9 Paulus ni ngribatin luryain

1:10; 4:21 Soranyar rakes rasam sir

5:1; 7:40 Raosangri ma dasdalmir nir momorip

8:1; 11:1 Tomwatar ma rsatngur ber Ratu ma tomwatar ma to rsatngur ber Ratu

11:2; 14:40 Soranyar nir yayatrwar noak ma rsampayang ber Ratu

15:1-58 Yesus ninr Ray Silai nmorip a nbali nof Ni mamate ma tomwatar ma ralele I a ne rmorip a rbali nbal

16:1-4 Soranyar rabutin doit ber tomwatar ma ralele Yesus na Yudea

16:5-24 Paulus ni snyurtar ma penutup.