Tnyamar ma tomwatar rloik neluk snyompe ber ratwawatar
8:1-13
1 Wangur,
lere ye yakw kmpweang ma kfwalyole ber a kmi,
na tnyamar ma tomwatar rloik neluk snyompe ber ratwawatar.
Tomwatar ketnir rfalak farye:
“Kit ma talele Yesus ye tkaul tal monuk Ratu Ni anftutw botunar.”
Ma iane botuan.
Nempa yakw kdwaun feti safe ma kmi mifai ne nose ma mifdas a kmi.
Ni botuan e,
kete tafdas kit nempa ka tkamis waninrar ma ralele Yesus.
Kit tose farane nema tafkoran dalmir ma rtafal ma ralele Yesus.
2 Tomwate ma nafdas i ma ndaun feti nafai safe-safe monuk,
ni botuan e,
to nafai monuk a fuky.
3 Nempa tomwate ma nkamis Ratu nor dalamy kateman,
la Ratu nafai i a nbal.
4 Wangur,
kmpweang ma kfwalyole na tnyamar ma mlyoik neluk snyompe ber ratwawatar.
Kit tafai feti ratwawatar ye to ratu sir ma Ratu ma botuan ye lan lese.
5 Tomwatar ketnir rsampayang ber ratwawatar ma ramin langit ma saryamprene.
Botuan feti ratwawatar yadin ma rose reluk nir ratu ma mangnrure.
6 Nempa kit e talele feti Ratu ye lan lese ma neluk Amninrar.
I ye ma nose safe-safe monuk,
ma kit tmorip ber lan I.
Ma ninr Mangnrur Silai ye lan lese,
I a ne Yesus ninr Ray Silai.
Ratu nwayat ma ninr Ray Silai nose safe-safe monuk.
Ma I a nbal ma nose ma tmorip.
7 Boloka farane,
tomwatar ketnir ma ralele Yesus ne,
sir to rafai feti ratwawatar a ne to ratu sir ma to nir kuase sasaf.
Luryain e,
tomwatar ketnir ma ralele Yesus ne rsampayang ber ratwawatar a ne.
Ma farlan rane tnyamar ma rloik neluk snyompe ber ratwawatar,
sir lolone rdaun feti iane feleles farlan ma rsampayang ber ratwawatar.
Mpa farlan sir rane tnyamar a ne,
sir rdaun feti rose sale lo,
fali to ramkoran ma ralele Ratu.
8 Ni botuan e,
Ratu to nlangun kit nof tnyamar ma tane.
Mpa farlan tane nre to tane e,
feleles motak fali iane to ubany sasaf ber kit.
9 Nempa ka minremi!
Waninrar ketnir to ramkoran ma ralele Yesus a fuky.
Mpa boloka bise motak ma rane tnyamar a ne,
ka kete myose ma sir rlarat a kmi.
Farlan sir rlarat a kmi iane feti myayat ma sir rfufw far sale dalam.
10 Yakw kfwalak farane fali farye:
kmi mifai feti farlan mine tnyamar ma rloik neluk snyompe ber ratwawatar iane to sasaf.
Nempa farlan tomwatar ma to ramkoran ma ralele Yesus,
rsalan kmi ma mine tnyamar a ne na ratwawatar nir snyomp anir,
iane nose ma keta sir rmpeang a nbal ma rane tnyamar a ne.
11 Farlan farane safe ma kmi mifai ne nose ma tomwatar ma to ramkoran ma ralele Yesus ne rmpan sale.
Safo Yesus ninr Ray Silai nmat la ntebus sir a nbal.
12 Mpa safe ma kmi myose ne sale fali myose ma waninrar ma to ramkoran ma ralele Yesus a ne rfufw far sale dalam.
Ma iane feleles farlan ma myose sale ber Yesus ninr Ray Silai nbal.
13 Mpa farlan yakw kune tnyamar ma rloik ber ratwawatar a ne nose ma wangur rose sale,
keta terik ma kmwat e to kune tnyamar a ne.
Yakw kose farane nema ka kete wangur a rfufw far sale dalam.