Yesus Ni mangsiduk ka nonri ni wayat nof soranyar
9:1-27
1 Ni botuan e yakw ye Yesus Ni mangsiduk ma to tomwate fen lese ma nfarete yakw.
Ma yakw kswalan desar Yesus ninr Mangnrure lo.
Ma ka minremi feti kmi monuk milele Yesus fali ningw karyayar ber ninr Mangnrur Silai ne.
2 Boloka tomwat walyetar to ryoding feti yakw ye Yesus Ni mangsiduk,
nempa kmi e ka myoding feti yakw ye Yesus Ni mangsiduk.
Fali yakw ye ma kufwibar Ibar Ngamone ber a kmi nwayat ma kmi milele Yesus ninr Mangnrure.
Ma iane nfatutu feti yakw kweluk Ni mangsiduk.
3 Mpa ber tomwatar ma to ryoding feti yakw ye Yesus Ni Mangsiduk keta kfwalak ber sir farye:
4 Yakw ye kweluk Yesus Ni mangsiduk ma kufwibar Ibar Ngamone mpa bise motak ma ktwak enu tnyame kof safe ma yakw kose ber a kmi a ne.
5 Yakw bise motak ma kufsau kor batar sa ma nalele Yesus,
ma kor i na ningw mpampane dalam.
Iane feleles farlan Yesus Ni mangsiduk walyetar,
Yesus ninr Mangnrure wanir,
ma Petrus.
6 Nre kete mdyaun feti lan madu Barnabas ma ka mkarya nema bise ma mtame menum e?
Safo kam feleles mor Yesus Ni mangsiduk walyetar a ne ma mafmpwane Ratu Ni karyayar a nbal.
7 Contoh farye:
Noak ma suldadwar sa nose ma naprang,
to nal ni dotyar la nselir ni perluar a ne.
Ma to tomwate fen lese ma ntanam anggur na ni lete,
ma to nane bunir a ne.
Farlan tomwate ma npiare domba nbal,
keta bise motak ma nenum domba ne ni susu.
8 Safe ma kfwalak ye to nof lan tomwatar nir andanwar,
nempa tetetkar ma Ratu nal ber Musa ne nfalak farane nbal.
9 Fali rarengi na tetetkar ma Ratu nal ber Musa ne farye:
“Noak ma sapi natai gandum ma isnir a rbie,
ka kete mkyete sukany nema bise ma ntame.”
Ratu nfalak farane,
iane feti I nsalan lan sapyar e?
Tate nre!
10 Nempa safe ma nfalak a ne ber tomwatar kit a nbal.
Tomwate ma ntanam gandum ma tomwate ma nusir gandum ne,
rdaun feti keta ronri nir wayat rof nir karyayar a ne,
fali iane ma diat.
11 Ma kam ye farlan tomwatar ma ryefar fini.
Kam mafwibar Ratu Ni ngribatnir ber a kmi lo,
mpa farlan kam malele feti myal safe-safe monuk ma kam mperlu ma neluk mamy sewe ne,
iane diat.
12 Tomwat walyetar ma rafwibar Ibar Ngamone ber a kmi a ne,
sir bise ma rtak sewe rof a kmi.
Mpa keta kam mlengan mof sir a nbal,
fali kam mafwibar Ibar Ngamone baluan ber a kmi.
Boloka farane kam to mtak sasaf mof a kmi,
ma koko kam mabare safe-safe monuk ma mperlu a ne.
Kam mose farane nema kabanir a ne kete rfarangal kam noak ma mafwibar Ibar Ngamone na Yesus ninr Ray Silai.
13 Wangur,
kmi mifai feti tomwatar ma rkarya na Ratu Ni Das Silai keta rtame renum rof ain a ne.
Ma tomwatar ma rkarya na snyomp ain,
keta ronri nir wayat rof tnyamar ma rloik neluk snyompe na ain a ne.
14 Farlan a nbal tomwatar ma rafwibar Ibar Ngamone.
Luryain e ninr Mangnrur Silai naftutu kit lo feti,
sir ma rafwibar Ibar Ngamone ne ka rtame renum rof tomwatar ma rdengar ibar a ne.
15 Boloka farane to lain sa ma ktwak kof a kmi.
Ma yakw kurengi farye iane to feti ktwak safe-safe ma ka myal ber yakw ne.
Ni ngafele e yakw kmwat nlengan nof ma ktwak kabanir a ne kof a kmi.
Fali to tomwate fen lese ma nose ma dalangw a nsenang,
lan feti ma kufwibar Ibar Ngamone ber a kmi ma to sewe.
16 Mpa farlan yakw kufwibar Ibar Ngamone,
to bise ma kufdas yakw na safe ma kose ne.
Fali Ratu nsiduk yakw ma ka kufwibar Ibar Ngamone.
Ma ni botuan e yakw kwoman suse silai desar farlan to kufwibar Ibar Ngamone.
17 Farlan yakw kufwibar Ibar Ngamone klwarat ningw mpempeang,
ni botuan e ka konri sewe ne.
Nempa yakw kweluk Ratu Ni mangkaryae fali klwarat Ni mpempeang.
Ma I ye ma nsiduk yakw ma kufmpwane karyayar ye.
18 Farlan farane keta konri safe ma neluk ningw sewe.
Ningw sewe ne iane feti:
yakw bise ma kufwibar Ibar Ngamone ma to sewe,
ma yakw nbal to ktwak sasaf desar kof a kmi.
19 Yakw to kweluk kawar ber se nre se.
Boloka farane yakw kose felangw ma kweluk kawar ber tomwatar monuk.
Yakw kose farane nema yakw bise ma ktwulung tomwatar yadin ma ralele Yesus ninr Ray Silai.
20 Mpa farlan yakw kor tomwat Yahudyar yakw kmworip a kbwalak sir.
Yakw kose farane nema bise ma ktwulung sir ma ralele Yesus ninr Ray Silai.
Ma boloka to kose klwarat tetetkar ma Ratu nal ber Musa,
nempa noak ma kmworip kor tomwatar ma rlarat tetetkar a ne,
yakw kose klwarat tetetkar a ne nbal.
Yakw kose farane nema bise ma ktwulung sir ma ralele Yesus ninr Ray Silai.
21 Noak ma kmworip kor tomwatar ma to Yahudi sir,
yakw kmworip a kbwalak sir ma to klwarat tetetkar ma Ratu nal ber Musa ne.
Yakw kose farane nema bise ma ktwulung sir ma ralele Yesus ninr Ray Silai.
Nempa iane to feti to klwarat Ratu Ni faretar.
Ni botuan e,
dedesar ma klwarat ninr Ray Silai Ni faretar.
22 Ma noak ma kmworip kor tomwatar ma to ramkoran ma ralele Yesus,
yakw kmworip a kbwalak sir a nbal nema bise ma ktwulung sir ma ramkoran ma ralele Yesus.
Mpa kureke ma kmworip kbwalak tomwatar monuk ma klwangun sir a ne,
nema neluk dalamtene ber yakw ma bise ma ktwulung tomwatar ketnir ma ralele Yesus.
23 Yakw kose safe-safe monuk a ne,
nema tomwatar yadin rdengar Ibar Ngamone na Yesus.
Ma nof ma ralele Ibar Ngamone ne,
yakw nbal e bise ma konri berkat ma Ratu nyoding ber kit a ne.
24 Wangur,
kmi mifai lo nre!
Farlan rose pertandingan falae ka tomwatar monuk rlarat pertandingan a ne ma rafla.
Nempa lan tomwate lese ma nonri hadiah.
Farlan farane ka mifla misnyalik nema myonri hadiah ne.
25 Tomwate ma rlarat pertandingan,
ka nlati ma ntayan nal tenany na safe-safe monuk.
I nose farane nema bise ma nmenang ma nonri hadiah.
Ma hadiah ne to dodo e,
nayatak lo.
Nempa hadiah ma kit tonri e,
to bise ma nayatak,
iane hadiah nof surga.
Mpa ka tareke ma tlati ma tayan teninrar nema bise ma tonri hadiah ne.
26 Iane ma yakw kureke ma kose.
Yakw ye farlan tomwate ma nafla mpa keta to kufla lamain nema kmwenang.
Yakw farlan tomwate ma nlarat pertandingan tinju nbal,
mpa keta to kbwabal lamain ningw lawan a ne nempa kureke ma kbwabal a ktwuni i,
nema kmwenang.
27 Yakw kureke ma klwati nema ktwayan kal tenangw na safe-safe monuk.
Farlan yakw to kose farane noak ma kufwibar monuk Ibar Ngamone ber tomwatar,
Ratu to nlangun yakw mpa to konri hadiah.