Tomwatar ma ralele Yesus nir fasawe
7:1-16
1 Wangur,
lere ye yakw kmpweang ma kfwalyole ber a kmi na safe ma myenrat myof yakw na surat dalam a ne feti,
farlan merwanar to rafsau iane nangafel e?
Au,
iane nangafel.
2 Nempa lere ye kit tafai feti tomwatar yadin ranronr.
Mpa ni ngafele e,
merwanar ma batar ka rafsau ror lan sawnir,
nema kete ranronr.
3 Ma merwane ma nafsau ka nkoil sawany ma sawany a ne nlarat motak.
Feleles farlan bate ma nafsau ka nkoil sawany ma sawany a ne nlarat motak a nbal fali iane fasawe ni wayat.
4 Fali bate ma nafsau to bise ma nfalak feti tenany a ne koko i nie,
nempa sawany i nie.
Feleles farlan merwane ma nafsau nbal,
i to bise ma nfalak feti tenany a ne koko i nie,
nempa sawany i nie.
5 Mpa ber mangafsawar a kmi,
farlan mpyeang ma mikoil a kmi,
ka bate nre merwane ne nlarat motak.
Ma farlan to mpyeang ma mikoil a kmi,
ka midu a mfyat ma lese nempa kete dodo.
Kmi myose farane nema let ber a kmi ma msyampayang.
Lama myose farane monuk ka mibut a kmi ma mikoil a mbyali kmi,
nema smwangat yatkar nir ulun kete nteman a kmi ma mfyufw far sale dalam,
fali kmi to bise ma mtyayan myal tenmir.
6 Yakw kfwalak farye iane to feti klwuan a kmi ma kete mikoil a kmi,
nempa iane la kswurat motak a kmi nema let ber a kmi ma mikatar a kmi a fuky betno mibut a kmi a mbyali.
7 Ni botuan e,
yakw kmpweang ma tomwatar monuk to rafsau farlan yakw.
Nempa Ratu nal fakoran mpane ber kit e,
to feleles.
Ketnir e,
I nal fakoran ber sir ma to rafsau,
ma ketnir e,
bise ma rafsau.
8 Ma ber bat somar,
ma tomwatar ma to rafsau fuky,
mdyengar ma kfwalak:
ni ngafele e,
kete mifsau mbyali,
ma koko kmi a myorip mbyalak yakw.
9 Nempa farlan to mtyayan myal tenmir,
ni ngafele e,
mifsau motak.
Fali farlan to mifsau e,
keta mdyaun dedesar mir makeus a ne.
10 Ber tomwatar ma rafsau lo,
mdyengar farete ma kfwalak ye.
Farete ye to nof yakw nempa nof ninr Mangnrur Silai feti:
Bate ma nafsau lo ka kete nyebas sawany.
11 Ma farlan i nyebas sawany,
ka kete nafsau lo.
Farlan to farane ka nbali i ber sawany.
Ma merwane ma nafsau lo,
ka kete nyebas sawany a nbal.
12 Ma ber tomwat walyetar a kmi monuk mdyengar safe ma kfwalak ye.
Ye koko yakw ma kfwalak ma ninr Mangnrur Silai to nfalak.
Snyurat a ne farye:
farlan merwanar sa ma nalele Yesus ma sawany to nalele Yesus,
ma bate ne nmpeang ma radu a rmorip,
merwane ne ka kete nyebas i.
13 Ma farlan batar sa ma nalele Yesus,
ma sawany to nalele Yesus,
ma merwane ne nmpeang ma radu a rmorip,
bate ne ka kete nyebas i.
14 Boloka merwane ne to nalele Yesus,
nempa fali nafsau nor bate ma nalele Yesus mpa Ratu nfil a nkese merwane ne ma neluk Ni tomwate.
Feleles farlan bate ne nbal,
boloka to nalele Yesus,
nempa fali nafsau nor merwane ma nalele Yesus mpa Ratu nfil a nkese bate ne ma neluk Ni tomwate.
Farlan to farane,
Ratu keta to nfil a nkese angkimir a nbal.
Nempa lere ye Ratu nlangun kangkir a ne fali enir nre amnir a ne ralele Yesus lo.
15 Nempa farlan tomwate ma to nalele Yesus,
nmpeang ma nyebas sawany ma nalele Yesus,
ka i nsalan lonri motak sawany ma to nalele Yesus a ne.
Farlan i nose farane iane nfatutu feti to sasaf ma nkete nir fasawe.
Fali Ratu nfil a kmi ma myorip myor maline.
16 Fali batar a kmi ma milele Yesus,
to mifai feti keta bise nre tate ma mtyulung sawmir ma to ralele Yesus a ne nema bise ma ralele Yesus.
Feleles farlan merwanar a kmi ma milele Yesus a nbal.
Kmi to mifai feti keta bise nre tate ma mtyulung sawmir ma to ralele Yesus a ne nema bise ma ralele Yesus.
Ka myorip a mlyarat Ratu Ni mpempeang
7:17-24
17 Wangur,
Ratu nal fakoran mpane ber kit e to feleles,
mpa yakw ktwak ma kit mpane ka tmorip a tlarat safe ma Ratu ntetak ber kit noak ma I nfil kit ma talele Yesus luryain a ne.
Iane ma kuftutu ber soranyar monuk na mpenempen nbal.
18 Contoh sa farye:
Farlan tomwatar sa ma rsunat i lo,
betno Ratu nfil i ma nalele Yesus,
ka kete namudim feti rsunat i lo.
Ma tomwatar sa ma to rsunat i a fuky,
nempa Ratu nfil i lo ma nalele Yesus,
ka kete ntak ma rsunat i.
19 Fali sunat nre to sunat iane to ubany.
Lan feti tose tlarat Ratu Ni faretar iane ma ubany.
20 Mpa ni ngafele e,
tomwatar mpane ka rmorip rlarat safe ma Ratu ntetak nof luryain noak ma betno nfil sir ma ralele Yesus.
21 Contoh sa nbal farye:
Farlan tomwatar sa ma neluk kawar noak ma Ratu nfil i ma nalele Yesus,
iane to sasaf.
Nempa farlan let ngamone ber i ma to neluk kawar lo,
ka nlarat motak.
22 Boloka kmi myeluk kawar nre to myeluk kawar,
na Ratu sounlury e,
kmi feleles motak.
Fali Ratu nfil sir ma reluk kawar a ne,
ma dalmir lese ror Yesus.
Mpa nfair a kmi monuk myof mir salar.
Ma kmi ma to myeluk kawar,
ma kmi ma milele Yesus ne,
ka minremi feti myeluk mangkaryae ber Yesus ninr Ray Silai lo.
23 Kmi mifai feti Yesus ninr Ray Silai ntebus ma nbaras monuk a kmi lo.
Mpa kete mlyarat tomwatar na saryamprene nir mpempeang farlan ma myeluk kawar ber sir.
24 Mpa wangur,
yakw kfwalak a nbal ma tomwatar mpane,
ka rmorip rlarat safe ma Ratu ntetak nof luryain noak ma betno nfil sir ma ralele Yesus.
Snyurat ber tomwatar ma to rafsau fuky
7:25-40
25 Lere ye yakw kmpweang ma kfwalak ber a kmi na batdarar.
Ratu to nfalak ma kswurat a kmi na ngrie ye,
nempa koko yakw ma kswurat a kmi.
Ma I nfatutu Ni dalamy ngamone ber yakw mpa kmi bise ma milele safe ma kfwalak ye.
26 Yakw kdwaun feti ni ngafele e,
kmi ma to mifsau kete mifsau ma farane motak fali lere ye kit tkoman susar yadin.
27 Ma merwanar ma rafsau ka kete ryebas sawnir.
Nempa farlan to rafsau a fuky e,
ka kete ranriak batar ma rafsau.
28 Nempa farlan mpyeang ma mifsau iane to sale.
Ma farlan bate nbal ma to nafsau ma nmpeang ma nafsau,
iane to sale.
Nempa tomwatar ma rafsau keta rkoman susar yadin na nir momorip.
Mpa yakw kswurat a kmi farye nema bise ma mlyiak a kmi myof susar a ne.
29 Wangur,
ningw andaun farye:
kmi mifai feti saryamprene ye namsos mpane lo,
ma let lan rufuky ber kit.
Mpa ntabw nof lere ye tomwatar ma rafsau ka rlangun Yesus ninr Mangnrure ma kete rdaun lan sawnir.
30 Tomwate ma ntasing kete ndaun lan ni suse ne.
Ma tomwate ma nmalip kete ndaun lan ni senange.
Ma tomwate ma nselir kabanir kete ndaun kabanir ma nselir a ne.
31 Tomwate ma nalmate lan kabain saryamprenar ka kete nalele kabanir a ne,
fali saryamprene nor ni mparetar ma ramsos mpane ye lo.
32 Wangur,
yakw kmpweang ma kete dalmir suse na mir momorip.
Tomwate ma to nafsau i ndaun lan Ratu Ni karyayar fali nmpeang ma nafsenange Ratu dalamy.
33 Nempa merwane ma nafsau i ndaun lan kabain saryamprenar fali nmpeang ma nafsenange sawany.
34 Iane nwayat ma to nafai feti keta nafsenange Ratu nre sawany.
Nempa bat somar ma batdarar a ne,
sir rkarya ber lan Ratu ror dalmir kateman.
Ma ral nir momorip ber Ratu fali rareke ma rafsenange dalamy.
Nempa batar ma rafsau sir rdaun lan kabain saryamprenar fali rmpeang ma rafsenange sawnir.
35 Yakw kfwalak kabanir monuk ye fen mir ngamone ma to kose ktweri kmi kor yayatrwar ma kuftutu ne.
Yakw kmpweang ma myose kabain botunar la mifsenange Ratu dalamy.
Kmi myose farane nema to sasaf ma rose rteri kmi ma bise ma mlyangun ninr Mangnrur Silai myor dalmir kateman.
36 Farlan merwanar sa nyoding ber ni tnyiman ma radu a rafsau.
Nempa ndaf e dodo a mpa i bise ma nose kabanir ma to nangafel ber ni tnyiman a ne,
ma ni tnyiman a ne ni ngarkar rlengan lo.
Mpa ni ngafele e rafsau motak,
fali iane ma nangafel ma to sale.
37 Nempa farlan merwanar sa ntetak dalamy ma to nafsau nor ni tnyiman,
ma ntayan nal tenany ma to nafsau e,
iane to sasaf.
Ma safe ma nose ne nangafel,
lan feti i nose nlarat ni mpempeang ma tomwatar to ribut i.
38 Mpa tomwate ma nafsau nor ni tnyiman iane nangafel.
Ma tomwate ma to nafsau nor ni tnyiman iane nangafel a nlengan a nbal.
39 Bate ma nafsau,
ka nmorip dedesar nor sawany a ne noak ma sawany lolone nmorip.
Nempa farlan sawany nmat,
keta to sasaf a nkete i lo,
mpa bise ma nafsau nbali nor ise motak nlarat ni mpempeang,
lan feti merwane ne nalele Yesus.
40 Nempa yakw kdwaun feti ni ngafele e,
to nafsau a nbali.
Ma yakw kulele feti safe ma kfwalak ye to lan koko yakw ma kfwalak nempa nof Ratu Smwangtany.