Paulus nose salam ber soranyar na Roma
16:1-16
1 Wangur mir kateman, na surat ye yakw kmpweang ma kufbwotin urninrar Febe ber a kmi. Febe ye batar sa ma nangamon ma nalele Ratu. Ma i nkarya ma ntulung soranyar na kote Kengkrea. 2 Noak ma i nti nsalan a kmi e, ka mlyangun i fen ngamone farlan biase ma Ratu Ni tomwatar rlangun tomwat walyetar, fali iane ma diat. Ma farlan nperlu safe-safe e, ka mtyulung i a na ni perluar a ne, fali i ntulung tomwatar yadin lo ma i ntulung yakw nbal.
3 Ma mfyalak ber Priskila ma sawany Akwila feti kwirim salam ber sir. Sir ye ma maktem a mkarya ber Yesus ninr Ray Silai lo. 4 Ma luryain e, sir ketla rmat fali rmpeang ma rtulung yakw. Mpa kose terima kasih ber sir. Ma to lan yakw, nempa soranyar ma to Yahudi sir a ne rose terima kasih nbal. 5 Yakw kwirim salam a nbal ber soranyar ma rafburat sir a na Priskila ma sawany Akwila nir das ma rsampayang.
Yakw kwirim salam a nbal ber Epenetus ma kwamis i. I ye tomwatar sa nof propinsi Asia ma nalele baluan Yesus ninr Ray Silai. 6 Yakw kwirim salam a nbal ber Maria. I ye nkarya ma nmat a nlai desar ber a kmi. 7 Yakw kwirim salam a nbal ber Andronikus ma Yunias. Sir ye tomwat Yahudyar farlan yakw nbal. Noak ma yakw to kulele Yesus ninr Ray Silai fuky e, sir ralele I baluan lo. Ratu Ni mangsidkwar ralang sir. Ma luryain e, rnau maktem a na sel.
8 Yakw kwirim salam a nbal ber Ampliatus ma kwamis resi i, fali dalamy lese nor Yesus ninr Mangnrure farlan yakw nbal. 9 Yakw kwirim salam a nbal ber Urbanus. I ye ma maktem a mkarya ma mlangun Yesus ninr Ray Silai. Ma kwirim salam ber Stakhis a nbal ma kwamis i. 10 Yakw kwirim salam a nbal ber Apeles. I ye ma nkoman susar yadin nempa dedesar ma nalele Yesus ninr Ray Silai. Ma kwirim salam a nbal ber tomwatar monuk ma ralele Yesus ma ramin Aristobulus ni das. 11 Yakw kwirim salam a nbal ber Herodion. I ye tomwat Yahudi i farlan yakw nbal. Ma kwirim salam a nbal ber tomwatar monuk ma ralele Yesus ma ramin Narkisus ni das.
12 Yakw kwirim salam a nbal ber Trifena ma Trifosa. Sir ye ma rkarya ma rmat a rlai desar ber Yesus ninr Mangnrure. Ma kwirim salam a nbal ber Persis ma kwamis i. I ye ma nkarya ma nmat a nlai desar ber ninr Mangnrure nbal. 13 Yakw kwirim salam a nbal ber Rufus nor enany. Rufus ye tomwatar ralang i fali nkarya ber Yesus ninr Mangnrure nor dalamy kateman. Ma Rufus enany nkamis resi yakw mpa kal i a kweluk enangw. 14 Yakw kwirim salam a nbal ber Asinkritus, Flegon, Hermes, Patrobas, Hermas, ma waninrar ma ralele Yesus ma ror sir a ne. 15 Yakw kwirim salam a nbal ber Filologus ma Yulia, ber Nereus ma urany, ma ber Olimpas, ma ber Ratu Ni tomwatar ma ror sir a ne. 16 Ma noak ma mifburat a kmi ma msyampayang e, miomat lim mpane la mfyatutu feti dalmir lese. Ma soranyar monuk ma ralele Yesus ninr Ray Silai na ye rkirim salam ber kmi a nbal.
Paulus nsurat soranyar na Roma
16:17-24
17 Wangur mir kateman! Yakw kswurat a kmi nema ka mijake kmi myof tomwatar ma rwayat ma mikes misam a kmi. Sir ye ma rose ma tomwatar ketnir rof a kmi a ne to ralele Ratu nbal. Sir raftutu nir anftutwar ma to feleles nor anftutwar ma kuftutu ber a kmi a ne lo. Mpa ka kete mitbwarin myor sir. 18 Yakw kfwalak farane fali tomwatar ma farane to rlangun Yesus ninr Ray Silai ma neluk ninr Mangnrure ne. Sir rlarat lan nir makeus ma rafsenange rbali tenir. Sir rfule tomwatar ma to rkaul ral sasaf, ror nir ngribatin ngafelar. 19 Wangur, tomwatar monuk rdengar ibar na kmi lo feti kmi myose mlyarat botuan Ibar Ngamone nof Ratu. Kmi myose farane nwayat ma kswenang resi. Nempa kmpweang ma myal mir andaun ngamone nema dedesar ma myose lan kabain ngamonar, ma mlyiak a kmi myof kabain yatkar. 20 Yakw ktwak ma ka weni Ratu nal maline ber a kmi. Ma weni I nafufu smwangat yatkar nir ulun ni kuase ma nose ma nyouk ber a kmi. Ma yakw ktwak ka weni Yesus ma neluk ninr Mangnrure ne dedesar ma nfatutu Ni dalamy ngamone ber a kmi.
21 Timotius ye, tbwaringw ma maktem a mkarya. I nkirim salam ber a kmi a nbal. Ma Lukius, Yason, ma Sosipater rkirim salam ber a kmi a nbal. Sir ye tomwat Yahudyar farlan yakw nbal.
22 Ma yakw ye Tertius. Yakw ye ma kurengi surat ye klwarat safe ma Paulus a nfalak. Yakw kwirim salam a nbal ber a kmi, fali taktem a talele ninr Mangnrure.
23 Ma Gayus nkirim salam ber a kmi a nbal. Yakw kumin i ni das. Ma biase soranyar rafburat sir a na ni das ma rsampayang. Ma Erastus nkirim salam ber a kmi a nbal. I ye mangomat doit na kote Roma. Ma waninrar Kwartus, nkirim salam ber a kmi.
24 [Yakw ktwak ma ka weni Yesus ninr Ray Silai ma neluk ninr Mangnrure ne nfatutu Ni dalamy ngamone ber a kmi. Amen.]
Ka tdangin Ratu ninr Mangnrure
16:25-27
25 Wangur mir kateman! Mya ma tdangin Ratu ma neluk ninr Mangnrure. I ye ma Ni kuase ma nafkoran a kmi nema kmi dedesar ma milele I. Kmi dedesar ma milele I fali kmi mdyengar Ibar Ngamone na Yesus ninr Ray Silai ma kufwibar ber a kmi a ne lo. Iane Ibar a ne ma kufwibar. Ibar a ne ma ngarkar rose ngarkar tomwatar to rafai fuky. 26 Nempa lere ye Ratu nafbotin ibar a ne ber kit lo. Luryain e, I nafbotin ibar a ne ber nabyar. Ma nluan sir ma rarengi ibar a ne nema tomwatar rof nusar monuk rafai ibar a ne. Sir rafai ibar a ne mpa ralele Yesus ninr Ray Silai ma rose rlarat Ratu ma namin dedesar a ne Ni mpempeang. 27 Mya ma tdangin Ratu. Ratu ye lan lese. Ma lan I ma Ni anfai silai na safe-safe monuk. Mpa ka tdangin I terik ma dedesar, fali safe ma Yesus ninr Ray Silai nose ne lo. Amen. Salam nof yakw Paulus. Yakw ye Yesus ninr Ray Silai Ni Mangsiduk.