Ka tafsenange tomwatar ma kete tdaun lan teninrar
15:1-13
1 Wangur,
kit ma tamkoran ma talele Yesus,
ka tulung tomwatar ma ralele Yesus ror dalmir tubun a ne nema rtafal ma ralele I.
Ma kete tose lan kabanir ma tafsenange tbali kit.
2 Nempa ka tose kabain ngamonar ber waninrar ma ralele Yesus fen nir ngamone,
nema rtafal ma ramkoran ma ralele Yesus.
3 Fali ninr Ray Silai nbal e,
to nose kabanir la nafsenange nbali I.
Nempa nlarat motak ma nkoman suse,
fali nlarat Ratu Ni mpempeang.
Iane farlan ma rarengi na Kitap Lelerap dalam na Yesus ninr Ray Silai:
“Safe ma tomwatar rfalak ma rarikan Ratu ne,
lere ye nir ngribatnir a ne diat Yakw lo.”
4 Mpe safe-safe ma luryain e rarengi na Kitap Lelerap dalam a ne,
la nfatutu kit.
Safe ma rarengi na Kitap Lelerap dalam a ne nfatutu kit nema noak ma tkoman suse dalminrar ramkoran ma tsabar ma tabare suse ne.
Kitap Lelerap a ne nfatutu kit a nbal ma tdaf dedesar safe ma Ratu nyoding ber kit a ne.
5 Lan Ratu ma nose ma tamkoran noak ma tkoman suse ma nafkoran dalminrar.
Iane nwayat ma ktwak desar kof I nema ka weni nose ma kmi dalmir lese mlyarat Yesus ninr Ray Silai Ni wewelmpampane.
6 Yakw ktwak Ratu ma nose farane nema miktem dalmir lese ma mdyangin Ratu.
Ratu ye Yesus ninr Ray Silai ma neluk Mangnrure Amany.
7 Mpa wangur,
ka sa nlangun sa fen ngamone feleles farlan ma Yesus ninr Ray Silai nlangun kit a nbal.
Kmi myose farane nema tomwatar rdangin Ratu.
8 Yakw kfwalak farane fali Ray Silai nma saryamprene lo ma ntulung tomwat Yahudyar kit.
I nose farane la nfatutu feti Ratu dedesar ma nose nlarat safe ma I nyoding ber empninrar nusninrar ma to namlufe.
9 Ma Yesus nma saryamprene nbal,
nema nusar monuk bise ma rdangin Ratu.
Sir rdangin Ratu fali I nfatutu Ni dalamy ngamone ber sir.
Iane farlan ma rarengi na Kitap Lelerap dalam,
“Iane nwayat ma keta kor nusar monuk ma rdangin Ratu,
keta yakw kbweu bew dadangin la kdwangin Ngaram.”*
10 Ma rarengi nbal na Kitap lelerap dalam farye:
“Hei nusar monuk a kmi,
mifburat a kmi myor Ratu Ni tomwatar ma I nfil a nkese sir a ne ma mimpumpuki kmi myor sir.”*
11 Rarengi nbal farye:
“Nusar monuk a kmi,
mya ma mdyangin Ratu mir Mangnrure,
ma tomwatar rof nusar monuk mya ma mdyangin mir Mangnrure.”
12 Ma luryain e,
nabi Yesaya nfalak,
“Tomwatar sa nof Isai ni dasdalam keta nma
ma nfarete nusar monuk ma keta rtikloi ma ralele lan I”
13 Yakw kswampayang nema weni Ratu ma tikloi ma talele I a ne,
nose ma dalmir a rsenang.
Ma nose nbal ma tmorip e tangamon fali talele Ratu.
Yakw kswampayang farane nema dedesar ma mtyikloi ma milele Ratu fali Ni Smwangtany nafkoran dalmir.
Paulus narengi na ni karyae
15:14-21
14 Wangur mir kateman,
yakw kulele feti mir momorip nangamon.
Ma kmi mkyaul myal botuan Ratu Ni anftutwar.
Ma kmi bise nbal ma sa naftutu sa na safe ma botuan.
15 Boloka farane,
yakw to kmweat ma kswurat a kmi na kabanir ketnir ye nema ka minremi.
Yakw to kmweat ma kswurat a kmi fali Ratu nfatutu Ni dalamy ngamone ber yakw ma nal karyae ne ber yakw.
16 Ratu nfil yakw ma kweluk Yesus ninr Ray Silai Ni mangkaryae,
ma nsiduk yakw la ktwulung tomwatar ma rof nus walyetar.
Ma yakw kwarya ber Ratu ma kweluk mangsompe,
ma kufwibar Ibar Ngamone ber tomwatar ma rof nus walyetar a ne.
Yakw kose farane nema bise ma kor sir ber Ratu,
nema Ratu nlangun sir farlan snyompar sa.
Ratu nlangun sir fali Ni Smwangtany nfil a nkese sir ma reluk Ni tomwatar.
17 Iane nwayat ma yakw kswenang fali dalangw lese kor Yesus ninr Ray Silai lo ma kwarya ber Ratu.
18 Mpa yakw to kbwaran ma kfwalak na kabain walyetar.
Ma kbwaran ma kfwalak na lan ngriar ma yakw kose kor Yesus ninr Ray Silai Ni kuase.
Fali nof safe ma kwarya ma kuftutu ber tomwatar ma rof nus walyetar a ne nwayat ma rlarat desar Ratu.
19 Ma sir rlarat desar Ratu nbal fali ngrimpasalnar ma nlie nlengan ma yakw kose kor Ratu Smwangtany Ni kuase ne.
Yakw ktwi monuk mpenempen ma kufwibar Ibar Ngamone na Yesus ninr Ray Silai lo.
Ma yakw kufwibar Ibar Ngamone ne nof kote Yerusalem terik propinsi Ilirikum.
20 Ma lan lese ma yakw kmpweang dedesar,
iane feti kufwibar Ibar Ngamone ber tomwatar ma to rafai Yesus ninr Ray Silai fuky a ne na mpenempen.
Yakw kose farane nema tomwatar kete rfalak feti yakw kuloran motak karyayar ma tomwatar rkarya lo.
Ma farlan yakw kose farane keta yakw feleles farlan tomwate ma nafdiri das na fanderen ma tomwat walyetar rose lo.
21 Iane feleles farlan ma kufdiat safe ma rarengi na Kitap Lelerap dalam farye:
“Tomwatar ma to rlangun Ibar Ngamone na I a fuky,
keta rafai I,
ma tomwatar ma to rdengar na I a fuky keta rkaul ral ibar a ne.”
Paulus nmpeang ma nti Roma
15:22-33
22 Yakw dedesar ma ktwi mpenempen ma kufwibar Ibar Ngamone ber tomwatar ma to rdengar ibar a ne fuky.
Iane nwayat ma to let ber yakw ma ktwi kukmat a kmi a fuky.
23 Nempa lere ye kose ksworu ningw karyayar na mpenempen lo.
Ma ngarkar fir ye lo yakw kmpweang desar ma ktwi kukmat a kmi.
24 Mpe ktwetak ma ktwi Spanyol.
Nempa kdwaun feti farlan ktwi e,
kwelat ma kswalan a kmi a fuky,
ma bise ma tabut kit nema far dalangw a nsenang.
Ma farlan dalangw a nsenang lo,
kulele feti kmi bise ma mtyulung yakw ma kuloran ningw mpampane far Spanyol.
25 Nempa to bise ma ktwi kukmat a kmi,
fali lere ye yakw ktwi Yerusalem a fuky.
Yakw kose ma ktwi Yerusalem ma konr doit ma soranyar a rabutin a ne ber Ratu Ni tomwatar na iano.
26 Ratu Ni tomwatar ma rawatan yadin ma ramin Yerusalem.
Mpa soranyar na propinsi Makedonia ma Akhaya rabutin nir dotyar lo ma rtulung Ratu Ni tomwatar ma rawatan na Yerusalem a ne.
27 Sir ryoding ma rose farane ror dalmir senange.
Ma sir rdaun feti rtulung soranyar ma rawatan na Yerusalem a ne iane diat.
Fali sir a ne tomwatar ma to Yahudi sir nempa tomwat Yahudyar rose ma sir bise ma rdengar Ibar Ngamone na Yesus.
Mpa farlan tomwatar ma to Yahudi sir,
rbalas tomwat Yahudyar nir ngamone ma rtulung sir iane diat.
28 Mpa ka yakw ktwi Yerusalem a fuky ma konr doit ma tomwatar rabutin ber Ratu Ni tomwatar na iano.
Lama kose ksworu ningw karyae ne betno ktwi Spanyol,
nempa keta kwelat ma kswalan a kmi a na Roma fuky.
29 Ma kufai feti keta ktwi kukmat a kmi e,
konr berkat yadin kof Yesus ninr Ray Silai ber a kmi.
30 Mpa wangur,
yakw ktwak desar kof a kmi ma msyampayang ber yakw nema Ratu norang yakw na ningw karyae ye.
Ka myose farane fali dalminrar lese tor Yesus ninr Ray Silai ma neluk ninr Mangnrure ne.
Ma ka myose farane nbal fali Ratu Smwangtany nkarya na dalminrar nwayat ma kit bise takamis kit.
31 Ma msyampayang ber yakw nema Ratu najake yakw nof tomwatar ma to ralele Yesus ninr Ray Silai ma ramin propinsi Yudea ne.
Ma msyampayang a nbal nema Ratu Ni tomwatar na Yerusalem bise ma rlangun doit ma konr ber sir a ne ror dalmir senange.
32 Kmi msyampayang ber yakw farane nema farlan Ratu nlarat e,
yakw bise ma kukmat a kmi kor dalangw senange.
Ma noak ma kor a kmi e,
keta dalangw namkoran.
33 Lan Ratu ma nal maline ber kit,
mpa ktwak Ratu ma dedesar e,
norang a kmi monuk.
Amen.