Ka kete mfyasale wamir ma ralele Yesus
14:1-12
1 Wangur mir kateman, tomwatar ketnir nof kit a ne ralele Yesus ror dalmir tubun motak, mpa to rkaul ral feti safe ma sir rose ne botuan nre tate. Ka mlyangun tomwatar a ne ma nangafel. Boloka nir wewelmpampane to feleles nor a kmi, kete mibangal myor sir a na nir wewelmpampanar a ne. 2 Contoh farye, tomwatar ketnir ma ralele Yesus ror dalmir kateman rfalak feti sir bise ma rane tnyam safe-safe motak. Nempa ketnir ma ralele Yesus ror dalmir tubun a ne rfalak feti Ratu to nmpeang ma rane daging, mpa rane lan sayorar. 3 Tomwatar ma bise rane tnyam safe-safe motak kete releng sir ma rane lan sayorar, fali Ratu nlangun sir lo. Ma tomwatar ma rane lan sayorar, ka kete rfasale sir ma rane safe-safe motak fali Ratu nlangun sir a nbal e lo. 4 Kmi monuk to bise ma mfyasale tomwat walyetar ma mfyalak feti rose sale lo. Fali kit monuk ye teluk Ratu Ni mangkaryayar. Mpa lan I ma bise ntetak feti safe ma Ni mangkaryayar rose ne diat nre sale. Nempa Ratu Ni kuase ma ntulung Ni mangkaryayar a ne nema bise ma rose safe ma botuan.
5 Contoh sa nbal farye tomwatar ketnir rdaun feti lere lese ubany nlengan nof ler walyetar. Nempa tomwatar ketnir a nbal rdaun feti lerar monuk a ne feleles motak. Ni botuan e, tomwatar mpane ka ralele botuan feti safe ma sir rose ne diat na Ratu sounlury. 6 Tomwatar ma rdaun feti lere lese ubany nlengan nof ler walyetar, sir rose farane la ralang Ratu. Ma tomwatar ma rane safe-safe motak a ne sir a nbal ralang Ratu, fali noak ma sir rane e, rose terima kasih ber Ratu. Ma tomwatar ma rane lan sayorar, sir a nbal rane la ralang Ratu, fali sir rose terima kasih nbal ber Ratu. 7 Fali ni botuan e, to tomwate fen lese ma nmorip nlarat koko i ni mpempeang. Ma to tomwate fen lese ma nmat nlarat koko i ni mpempeang a nbal. 8 Fali boloka tmorip nre tmat e, iane tlarat lan Ratu Ni mpempeang. Mpa tmorip nre tmat e, dedesar ma teluk Ratu Ni tomwatar. 9 Iane nwayat ma Yesus ninr Ray Silai nmat ma nmorip a nbali nema I neluk Mangnrur Silai ber mangmorpyar ma mangmwatar. 10 Mpa ka kete mfyasale nre mirikan wamir ma ralele Yesus. Fali keta ni tewat e, kit monuk tamdir Ratu sounlury ma nsidang kit. 11 Fali na Kitap Lelerap dalam e, rarengi
“Ratu ninr Mangnrure nfalak farye:
‘Ni botuan e, tomwatar mpane keta rsatngur na soungwlury,
ma tomwatar mpane keta ryoding feti Yakw ye Ratu.’”
12 Mpa keta kit mpane tyoding na Ratu sounlury na safe-safe ma kit tose na saryamprene lo.
Kete myayat ma wamir ma ralele Yesus rose sale
14:13-23
13 Mpa wangur, ka kete sa nfasale sa. Nempa ni ngafele e, msyalan fen ngamone mir wewelmpampane nema kete myose kabanir ma rwayat ma wamir ma ralele Yesus rose sale. 14 Ma yakw dalangw lese kor Yesus ninr Mangnrure lo mpa kulele feti to tnyame fen lese ma ramoli. Nempa farlan tomwatar sa nane tnyame ma ndaun feti namoli, keta tnyame ne namoli desar ber i. 15 Farlan mine kabanir sa na wamir ma ralele Yesus sonirlury, ma rsalan feti kabanir ma mine ne sir ramoli, iane feti myose ma dalmir maninik ma to mfyatutu feti to mkyamis sir. Mpa ka mdyaun fen ngamone safe ma kmi myose. Ma kete mine nre myenum safe-safe ma wamir a rdaun feti iane ramoli, fali iane ma nwayat ma sir rose sale ma to ralele Ratu lo, safo Yesus ninr Ray Silai nmat ber sir a nbal.
16 Mpa farlan mdyaun feti safe ma kmi myose ne nangafel, nempa kabanir ma myose ne nwayat ma wamir to ralele Ratu, ni ngafele e, ka kete myose desar kabanir a ne, nema wamir kete rfasale kmi a na kabanir a ne. 17 Fali farlan Ratu neluk Rai ma nfarete tomwatar nir momorip e, keta enu tnyame to ubany a nbal. Nempa ma ubany a ne kabanir ma farye: ka tmorip a tlarat Ratu Ni mpempeang, tmorip e tangamon tor tomwatar, ma ka dalminrar rsenang resi fali Ratu Smwangtany nkarya na dalminrar. 18 Fali tomwatar ma rlarat Yesus ninr Ray Silai ma rmorip farane, sir a ne ma rafsenange Ratu dalamy, ma keta tomwatar ralang sir a nbal.
19 Mpa ka tareke ma tose kabain ngamonar na ninr momorip nema bise ma tmorip e, tangamon tor tomwatar. Ma tareke nbal ma tulung waninrar ma ralele Yesus nema rtafal ma ralele I. 20 Ratu nkarya na tomwatar dalmir nwayat ma ralele I, mpa kete mifyatak Ni karyayar na tomwatar a ne nir momorip. Farlan kmi mine tnyamar ma ramoli, iane kmi myayat ma wamir ma ralele Yesus ne rose sale lo. Botuan feti to tnyame fen lese nbal ma ramoli, nempa farlan mine tnyamar ma wamir a rdaun feti ramoli, iane feti kmi myose sale lo, fali kmi mtyeman sir ma rane tnyamar a ne nwayat ma keta rose sale. 21 Ni ngafele e, kete mine daging, nre myenum anggur, nre myose safe-safe motak ma nwayat ma wamir ma ralele Yesus rose sale. 22 Farlan milele feti safe ma mine ma myenum a ne to nwayat ma myose sale, ka mnyau na dalmir motak ma lan Ratu ma nafai, ma kete mfyatutu ber tomwat walyetar. Ngamone ber a kmi farlan mifai desar feti kabanir ma myose ne diat, ma iane to nwayat ma myose sale. 23 Noak ma mine kabanir sa nempa lolone mdyaun feti nre kete kabanir ma mine ne ramoli e, iane feti myose sale. Kmi myose sale fali to mlyarat safe ma mdyaun feti iane diat. Kmi myose safe-safe monuk a ne, nempa to mifai feti safe ma myose ne diat nre sale, iane feti myose sale.