Ka dedesar ma tose tlarat sir ma reluk mangfaretar
13:1-7
1 Wangur,
tomwatar mpane ka dedesar ma rose rlarat sir ma reluk mangfaretar ber kit,
fali to mangfarete fen lese ma nfarete,
farlan Ratu to nal kuase ber i.
Ma mangfaretar ma rfarete kit lere ye,
Ratu ma ntetak ma sir reluk mangfaretar.
2 Mpa ise ma nbangal mangfarete,
iane nbangal safe ma Ratu ntetak ber tomwatar lo.
Ma tomwate ma nbangal mangfarete ne keta Ratu nukun i.
3 Tomwate ma nose kabain ngamonar,
keta to namtaut ma mangfaretar rukun i.
Lan tomwate ma nose kabain yatkar ma namtaut mangfaretar ma rukun i.
Mpa farlan kmi mimtaut ma mangfaretar rukun a kmi,
ka myose kabain ngamonar.
Kmi myose farane mpe keta mangfaretar rdangin a kmi.
4 Fali tomwatar mpane ma reluk mangfaretar,
sir a ne Ratu Ni mangkaryayar ma rkarya fen mir ngamone.
Nempa farlan myose kabain yatkar e,
botuan feti ka mimtaut sir,
fali Ratu nal kuase ber sir ma rukun tomwatar ma rose sale.
Mangfaretar a ne Ratu Ni mangkaryayar ma rkarya ber I,
ma ral tetetak ma rukun tomwatar ma rose salar.
5 Mpa ka dedesar ma myose mlyarat sir ma reluk mangfaretar nema Ratu to nukun kmi.
Kmi myose mlyarat sir,
iane to feti mimtaut lan ma Ratu nukun a kmi.
Nempa myose farane fali mifai myof dalmir lelerap desar feti myose farane iane ma diat.
6 Iane nwayat ma ka mbyayar ulbati ber mangfaretar a nbal,
nema sir bise ma rafmpwane karyayar ma Ratu nal ber sir a ne.
7 Mpa ka myal ber tomwatar monuk na safe-safe ma ka myal ber sir.
Ka mbyayar ulbatyar nre ulbati walyetar ber sir ma ka rlangun ulbatyar a ne,
ma ka mimtaut ma myalang tomwatar ma reluk mangfaretar a ne.
Ka tmorip e takamis kit
13:8-14
8 Ka kete miutang myof se nre se motak.
Ma lan lese ma ka myose dedesar,
iane feti ka mikamis a kmi.
Fali farlan mikamis a kmi,
iane feti kmi myose mlyarat tetetkar ma Ratu nal ber Musa ne.
9 Fali na tetetkar a ne rarengi farye:
“Kete milalin,
kete mifen,
kete mimnang,
ma kete mimkeus tomwatar nir kabanir.”
Ma ni botuan e,
tetetkar monuk a ne ma tetetak walyetar a nbal ramin lan na faretar lese ye,
iane feti “Ka tkamis tomwat walyetar farlan ma tkamis kit a nbal.”
10 Fali tomwate ma nkamis tomwat walyetar,
keta i to nose yatak ber sir.
Mpa farlan tomwatar sa nkamis tomwat walyetar iane feti i nose nlarat tetetkar monuk ma Ratu nal ber Musa ne lo.
11 Ka myose fen ngamone safe ma betno kfwalak ber a kmi a ne,
fali lere ye kmi mifai lo safe ma diat ma ka myose ne.
Ma iane feleles farlan tomwate ma narwa ma betno npote i,
mpa mpyote kmi lo ma mngyabo ma mkyarya.
Fali lere ma betno talele ninr Mangnrure ne nlie desar lo,
nempa lere ma I nfair kit e,
sesedin lo.
12 Kit tmorip a na saryamprene ye to dodo lo.
Iane farlan nronram a nlie lo ma ketla bobolisin.
Mpa ka tate kabain yatkar ma tose kabain ngamonar la tafufu smwangat yatkar nir ulun.
Iane farlan tomwatar ma luryain e,
rmorip a na makrokap dalam nempa lere ye rmorip a na ngaodir dalam lo.
Sir rmorip a na ngaodir dalam farlan suldadwar ma romat mingkar ma raprang la rbangal nir muswar.
13 Mpa nof lere ye ka myorip fen ngamone farlan tomwatar ma rmorip a na ngaodir dalam.
Ma kete miosfesta ma nlie nlengan nwayat ma minabuk.
Ma kete minronr ma myose mlyarat mir makeus yatkar.
Ma kete mkyafre nre dalmir maninik tomwatar ma rlengan a kmi.
14 Ka myose mlyarat Yesus ninr Ray Silai Ni wewelmpampane.
Kmi myose farane iane neluk teteri ber a kmi nema tomwatar to bise ma rfasale kmi.
Ma kete myose mlyarat tomwatar ma nir adat yatkar a ne nbal.
Sir a ne ma dedesar rlarat lan nir makeus yatkar.