Mpa yakw ktwak ma ka mlyarat ningw wewelmpampane,
farlan ma klwarat Yesus ninr Ray Silai Ni wewelmpampane.
Snyurat ber batar ma merwanar na sampayang faburat
11:2-16
2 Wangur,
yakw kswenang resi kor a kmi fali na safe-safe motak e minremi yakw,
ma dedesar ma myose mlyarat safe ma kuftutu ber a kmi a ne.
3 Nempa kmpweang ma kfwalak kabar sa nbal ber a kmi feti,
Yesus ninr Ray Silai ne neluk ulun ber merwanar,
ma merwanar reluk ulun ber sawnir,
ma Ratu neluk ulun ber Yesus ninr Ray Silai.
4 Mpa farlan merwanar sa nsampayang nre nafbotin snyurat nof Ratu ber tomwatar,
ma nteri uluny nor maloli,
iane nafmweat Yesus ninr Ray Silai ma neluk ulun ber i a ne.
5 Nempa farlan batar sa ma nsampayang nre nafbotin snyurat nof Ratu ber tomwatar,
ka nteri uluny nor maloli.
Farlan to nose farane iane feti nafmweat sawany ma neluk ulun ber i.
I feleles farlan bate ma rfakir uluny la rafmweat i.
6 Mpa bate ma to nteri uluny ni ngafele e ka nbok uluny.
Nempa bate ma rfakir uluny iane feleles farlan ma rafmweat i,
mpa ni ngafele e ka nteri uluny.
7 Merwanar ka kete rteri ulnir noak ma rsampayang fali Ratu nose sir farlan I felany nema ralyole sir tomwatar rdangin I.
Nempa batar e ka rteri ulnir nema ralyole sir,
tomwatar ralang sawnir.
8 Fali luryain e Ratu to nose merwane nof bate,
nempa I nose bate nof merwane ruskwany.
9 Ma I to nose merwane ma ntulung bate,
nempa I nose bate ma ntulung merwane.
10 Mpa batar ka rteri ulnir ma rfatutu feti sawnir a rkuase sir.
Nema malaektar ma rsalan a ne dalmir a rsenang.
11 Boloka farane ka minremi feti,
bate nre merwane ma dalmir lese ror Yesus ninr Mangnrure to bise ma koko sir a rmorip,
fali ka ratulung sir.
12 Luryain e Ratu nose bate nof merwane,
nempa ntabw nof a ne batar ramtoranbabe sir.
Mpa bate merwane Ratu nose monuk sir.
13 Wangur no mdyaun,
farlan batar ma rsampayang ber Ratu na sampayang faburat ma to rteri ulnir e nangafel nre tate?
14 Kit tafai feti merwanar ulnir melawas e to nangafel fali keta tomwatar to releng sir.
15 Nempa batar e ka ulnir melawas nema tomwatar releng sir.
Ma Ratu nose ulun bukrir ma melawas la rteri ulnir.
16 Farlan tomwatar ketnir raale sir a na ngriar a ne keta kfwalak ber sir farye:
noak ma rsampayang na sampayang faburat,
batar ka rteri ulnir.
Lan iane ma biase Ratu Ni soranyar rose na mpenempen ma to kabain walyet ma sir rose.
Yayatrwar na tnyam faburat la ranremi Yesus Ni mamate
11:17-34
17 Wangur,
yakw kmpweang ma kfwalak kabanir sa nbal ber a kmi,
nempa yakw to bise ma kdwangin a kmi na kabanir a ne.
Fali noak ma mifburat a kmi ma msampayang iane to nonry ngamone nempa nonry yatak ber a kmi.
18 Ngribaluan e,
yakw kdwengar feti noak ma mifburat a kmi ma msyampayang e mibangal,
nwayat ma mikes misam a kmi.
Ma kdwaun feti ibar ma kdwengar a ne botuan owo.
19 Ma farlan mikes misam a kmi e,
iane diat,
nema nof ngriar a ne keta kam msalan desar feti nof a kmi ye mpear ma ralele botuan Ratu.
20 Noak ma mifburat a kmi ma mine tnyam faburat la minremi Yesus ninr Mangnrure Ni mamate,
kmi to myose la minremi ngriar a ne.
21 Fali noak ma mine tnyam faburat la minremi Yesus Ni mamate,
ketnir a rane nir tnyamar baluan,
nwayat ma to dengan mpa ketnir a ramlafar.
Ma ketnir a nbal e ranabuk.
22 Myose desar farane e!
Ali to bise ma mtyame myenum a na mir dasar e?
Nre myose ma Ratu Ni soranyar ma tomwatar ma rawatan a ne rmeat e?
Mpa keta kfwalak safe ber a kmi?
Kdwangin a kmi e?
Tate nre keta to kdwangin desar a kmi.
23 Ma lere ye kuftutu ber a kmi safe ma Yesus ninr Mangnrure naftutu ber yakw.
Iane feti na nronram ma Yudas nfenri Yesus,
I nal roti,
24 ma nose alang ber Ratu betno napuse ma nal ber Ni manglartar.
Ma I nfalak,
“Roti ma kal ber a kmi ye,
iane Yakw tenangw ma kal ber a kmi la ktwebus mir salar.
Mpa ka myose farye noak ma mine roti,
nema minremi Yakw.”
25 Lama rtame monuk,
I nal kompi ma anggur namin a ne ma nfalak,
“Anggur ye Yakw darangw ma ntarbui na katutun sangwalu.
Ma iane neluk faniak feti Ratu nyoding Ni Yoyoding Beberi ber a kmi.
Mpa ka myose farye noak ma myenum anggur,
nema minremi Yakw.”
26 Mpa lerar mpane ma mine roti ma myenum anggur,
iane feti kmi mifwibar ninr Mangnrur Silai Ni mamate ber tomwatar,
terik ma nma nbali saryamprene.
27 Mpa ise ma nose ni adat ma to nangafel noak ma nane roti ma nenun anggur na tnyam faburat la ranremi ninr Mangnrur Silai Ni mamate,
iane feti i nose sale ber ninr Mangnrur Silai lo,
fali to nalang tenany ma darany.
28 Mpa tomwatar mpane ka ratenak na dalmir a fuky betno rane roti ma renum anggur na tnyam faburat dalam.
29 Fali ise ma nane roti ma nenum anggur nempa to nalang Yesus tenany,
keta Ratu nukun i noak ma ntame nenum a ne.
30 Iane nwayat ma tomwatar yadin rof a kmi a ne rafanas,
tenir to ramkoran ma ketnir a nbal e rmat.
31 Nempa farlan tatenak na dalminrar keta ninr Mangnrur Silai to nukun kit.
32 Ma farlan ninr Mangnrur Silai nukun kit,
iane farlan makenar sa nukun anaky.
Iane feti I naftutu kit ma tate ninr salar nema na lere ma nma ne I to nukun kit tor tomwatar ma to ralele Ratu.
33 Mpa wangur,
farlan mifburat a kmi ma mine tnyam faburat la minremi Yesus Ni mamate,
ka midafe kmi betno mtyame ma myenum.
34 Farlan tomwatar sa namlafar,
ka ntame baluan na ni das.
Nema noak ma nane tnyam faburat e i to nose kabanir ma nwayat ma ninr Mangnrur Silai nukun i.
Ma ngriwalyetar ma myenrat a ne,
kmwa la betno kfwalyole ber a kmi.