Tetetkar ma Ratu nal ber Musa ne to nkete kit lo
7:1-6
1 Wangur,
yakw kmpweang ma kfwalyole na tetetkar ma Ratu nal ber Musa.
Kmi mkyaul desar na tetetkar a ne lo nre!
Kmi mifai feti tetetkar a ne nkete kit lan noak ma lolone tmorip.
Nempa noak ma tmat e,
tetetkar a ne to nkete kit lo.
2 Contoh farye:
Batar sa ma nafsau lo,
noak ma sawany lolone nmorip keta fasawe ni yayatrwar nkete i nor sawany.
Nempa farlan sawany nmat lo,
keta fasawe ni yayatrwar to nkete i nor sawany a nbal.
3 Mpa noak ma sawany lolone nmorip ma bate ne nafsau nor merwan walyete nbal,
iane feti nanronr.
Nempa farlan sawany nmat lo,
tetetkar a ne to rkete i,
mpa farlan i nafsau nbali iane feti to nanron.
4 Wangur,
iane feleles farlan kit a nbal.
Luryain e,
tetetkar ma nal ber Musa ne nkete kit.
Nempa kit tmat tor Yesus ninr Ray Silai lo mpa to tose tlarat tetetkar a ne nbal nwayat ma tetetkar a ne to rkete kit lo.
Tetetkar a ne to rkete kit fali noak ma tmat tor Yesus ninr Ray Silai na katutun sangwalu,
iane feleles farlan ma tafsau tor I mpa teluk Ni tomwatar lo.
I a ne ma Ratu nafmorip a nbali I,
mpa farlan kit dalminrar lese tor I,
keta kit tose kabain ngamonar ma ubany ber Ratu.
5 Luryain noak ma to talele Yesus ninr Ray Silai fuky e,
kit tmorip tlarat ninr makeus yatkar mpa dedesar e,
tpaki teninrar ye ma tose kabain yatkar.
Kit tafai feti tetetkar ma Ratu nal ber Musa ne nose nteri kit ma tose salar,
nempa noak ma tafai tetetkar a ne iane nwayat ma tafal ma tmpeang ma tose sale.
Kit tose tlarat ninr makeus yatkar ma dedesar ma tose sale,
nwayat ma Ratu nukun kit ma tmat dedesar.
6 Nempa lere ye Ratu nalin kit nof tetetkar ma nkete kit a ne fali tmat tor Yesus ninr Ray Silai lo.
Mpa lere ye kit tlangun Ratu to nof ma tlarat safe ma rarengi na tetetkar farlan ma luryain e,
kit tose ne.
Nempa Ratu Smwangtany nkarya na dalminrar,
ma nafbweberi ninr momorip ma ntulung kit ma tlangun Ratu.
Tlangas tetetkar ma Ratu nal ber Musa ne nwayat ma tafai desar feti tose salar yadin
7:7-13
7 Tetetkar ma Ratu nal ber Musa ne nwayat ma tmpeang ma tafal ma tose sale.
Farlan farane bise ma tfalak feti tetetkar a ne to nangafel e?
Tate desar.
Nempa tetetkar a ne nangafel fali nof tetetkar a ne kit bise ma tafai feti safe ma tose ne,
iane sale.
Contoh farye:
Na tetetkar a ne nfalak feti “Ka kete mimkeus tomwatar nir kabanir.”
Farlan na tetetkar a ne to nfalak farane,
keta to kufai feti kumkeus tomwatar nir kabanir a ne iane sale.*
8 Mpa noak ma tetetkar a ne rfalak feti kumkeus tomwatar nir kabanir iane sale,
iane nwayat ma sale ma namin yakw ne nose ma ktwafal ma kumkeus tomwatar nir kabanir.
Mpa farlan tetetkar a ne to nfatutu feti kose sale,
keta to kufai feti iane sale,
mpa sale to ni kuase sasaf na ningw momorip.
9 Luryain e,
to kufai tetetkar a ne fuky,
mpa kdwaun feti yakw ningw momorip nangafel ma to ningw sal.
Nempa lama kufai tetetkar a ne,
yakw ktwafal ma kmpweang ma kose salar a nbal.
10 Mpa kfwenai feti ningw salar yadin nwayat ma kmwat dedesar.
Ni botuan e,
farlan klwarat tetetkar a ne,
keta Ratu nal momorip dedesar ber yakw.
Nempa to bise ma kose klwarat monuk tetetkar a ne,
nwayat ma Ratu nukun yakw ma kmwat dedesar.
11 Noak ma kufai tetetkar ma Ratu nal ber Musa ne,
ktwafal ma kmpweang ma kose sale.
Ma iane let ma sale nfule yakw mpa kdwaun feti farlan klwarat tetetkar a ne keta Ratu nfair yakw.
Nempa noak ma klwarat tetetkar e,
dedesar ma kose sale mpa keta Ratu nukun yakw ma kmwat dedesar.*
12 Boloka farane to feti tetetkar ma luryain e Ratu nal ber Musa ne to nangafel.
Ma Ratu Ni faretar monuk ma rarengi na tetetkar a ne nangafel ma namlonry.
13 Nempa ka kete mdyaun feti tetetkar ma nangafel a ne nose ma kmwat dedesar.
Tate desar.
Sale ma nkuase dalangw a ne ma nose ma dedesar e kose sale,
nwayat ma kmwat dedesar.
Fali noak ma kufai tetetkar a ne ktwafal ma kmpweang ma kose sale,
mpa iane let ma sale nfule yakw ma dedesar ma kose sale.
Mpa nof tetetkar a ne kufai desar feti sale nkuase dalangw,
ma kufai nbal feti sale ne kabain yatak desar.
Kit to bise ma tose tlarat tetetkar monuk fali sale ma nkuase dalminrar a ne
7:14-25
14 Kit tafai feti tetetkar ma Ratu nal ber Musa ne nangafel fali iane nof Ratu Smwangtany.
Nempa yakw ye tomwate motak yakw ma dedesar ma kose sale fali sale nakawar yakw lo.
15 Koko yakw desar e,
to kufai feti safema kose farane.
Ni botuan e kmpweang ma kose ngamone,
nempa dedesar ma kose yatak na safe ma to kmpweang ma kose ne.*
16 Mpa farlan kose ningw adat yatak ma to kmpweang a ne,
iane feti yakw kyoding tetetkar ma Ratu nal ber Musa ne nangafel.
17 Mpa yakw kose ningw adat yatak,
iane to nof koko yakw ningw andaun,
nempa iane nof sale ma nkuase dalangw a ne.
18 Yakw kufai feti yakw ye tomwate yakw motak ma dedesar ma kose sale,
mpa to sasaf ma nangafel ma namin yakw.
Iane nwayat ma yakw kmpweang ma kose ningw adat ngamonar nempa to boangw kal ma kose.
19 Fali yakw to kose ningw adat ngamonar ma kmpweang ma kose,
nempa kose ningw adat yatak ma to kmpweang ma kose.
20 Mpa farlan yakw kose adat yatak ma to kmpweang,
iane to nof koko yakw ningw andaun,
nempa nof sale ma nkuase dalangw a ne.
21 Mpa yakw kufai feti ningw adat a ne farye:
Boloka yakw kmpweang ma kose kabain ngamonar nempa famudi e,
kose lan kabain yatkar.
22 Ma na dalangw ye yakw kmpweang desar ma klwarat Ratu Ni tetetkar.
23 Nempa famudi e,
to kose klwarat Ratu Ni tetetkar a ne fali makeus yatak ma namin yakw ne nwayat ma kose sale.
Ma ningw makeus a ne to nordeng nor Ratu Ni tetetkar ma kmpweang desar ma klwarat a ne.
Makeus ma kfwalak ye,
iane sale ma nkuase dalangw.
Sale ne nkuase yakw mpa dedesar ma kose kabain yatkar.
24 Suse desar ber yakw!
Ise bise ma ntulung yakw nema sale to nkuase dalangw?
Fali farlan to tomwate fen lese ma ntulung yakw,
keta Ratu nukun yakw ma kmwat dedesar.
25 Iane nwayat ma kose alang ber Ratu fali I nalin yakw nof sale ma nkuase dalangw a ne,
nalyole Yesus ninr Ray Silai ma neluk ninr Mangnrure.
Mpa na dalangw ye yakw kmpweang desar ma kose klwarat Ratu Ni tetetkar,
nempa sale dedesar ma nkuase dalangw mpa kose klwarat makeus yatak ma namin yakw ne.