Farlan tmat ma tmorip a tbali tor Yesus ninr Ray Silai e, to tose sale lo
6:1-14
1 Wangur,
Ratu nlure ninr salar fali nfatutu Ni dalamy ngamone ber kit.
Mpa ka tose farpe?
Ka dedesar ma tose sale nema Ratu ntafal ma nfatutu Ni dalamy ngamone ber kit e?
2 Tate desar nre!
Fali noak ma talele Yesus e,
tnau kalin ninr salar a ne,
iane feleles farlan teninrar rmat lo.
Mpa keta na ninr momorip e,
to bise ma tose salar dedesar.
3 Wangur,
kmi mifai lo nre,
feti farlan radiris kit,
iane feti dalminrar lese tor Yesus ninr Ray Silai,
ma iane feti tmat tor I lo.
4 Ma noak ma radiris kit,
iane farlan ma tmat ma rafonak kit tor Yesus ninr Ray Silai.
Ma radiris kit ma farane nema tmorip a tbali feleles farlan Amninrar Ratu ma nafmorip a nbali Yesus ninr Ray Silai nof mamate nor Ni kuase ma nlie nlengan a ne.
I nose farane nema kit tmorip a tbali ma tmorip a na momorip beberi.*
5 Mpa farlan dalminrar lese tor Yesus ninr Ray Silai nwayat ma tmat tor I,
botuan feti keta Ratu nafmorip a nbali kit a nbal feleles farlan ma nafmorip a nbali Yesus.
6 Luryain e,
dedesar ma kit tose salar nempa lere ye kit tafai feti rsangwalu ninr momorip wangim ne ror Yesus nir Ray Silai na katutun sangwalu,
nema kete tlarat ninr makeus yatak ma nose ma tfufw far sale dalam.
Nof a ne salar a ne to rkuase dalminrar lo.
7 Fali farlan tomwatar sa nmat iane feti sale to nkuase i lo.
8 Mpa farlan tmat tor Yesus ninr Ray Silai,
ka talele feti keta tmorip tor I a nbal.
9 Kit talele feti Ratu nafmorip a nbali Yesus ninr Ray Silai nof mangmwatar,
mpa keta I to nmat lo.
Ma mamate to nkuase I lo.
10 Ma Yesus ninr Ray Silai nmat lan lain lese ma nafufu salar nir kuase,
ma iane dengan lo.
Nempa lere ye I nmorip dedesar nema tomwatar rdangin Ratu.
11 Feleles farlan kmi a nbal.
Ka mdyaun motak feti kmi myat lo ma salar to rkuase kmi.
Ma lere ye kmi myorip a mlyarat Ratu Ni mpempeang fali dalmir lese myor Yesus ninr Ray Silai lo.
12 Mpa kete myinrang ma salar rkuase tenmir saryamprene ma keta rmat a ne,
nema kete myose mlyarat mir makeus yatkar a nbal.
13 Ka kete myinrang salar rkuase tangmir,
emir,
nre safe-safe ma ramin tenmir a ne,
nema kete myose kabain yatkar.
Nempa ka myal safe-safe ma ramin tenmir a ne ber Ratu nema npaki la nose kabain ngamonar nlarat Ni mpempeang.
Fali Ratu nfair a kmi nof mamate ma nal momorip beberi ber a kmi.
14 Mpa salar to rkuase kmi lo.
Fali kmi to mpyerlu ma mlyarat tetetkar a ne nbal nema Ratu nfair a kmi,
nempa I nfair a kmi fali Ni dalamy ngamone ma ber a kmi.
Ka kete salar rakawar kit
6:15-23
15 Ratu nafdiat kit fali Ni dalamy ngamone ber kit,
ma to nof ma tlarat tetetkar ma Ratu nal ber Musa.
Ratu Ni dalamy ngamone ber kit,
nempa kete tdaun feti bise ma tose sale dedesar.
Tate desar.
16 Kmi mifai lo nre,
feti farlan kmi mkyarya ber tomwat sa,
iane feti keta dedesar ma myose mlyarat tomwate ne ni faretar.
Ma iane feti tomwate ne nakawar a kmi lo.
Feleles farlan salar a nbal,
farlan dedesar ma myose sale,
iane feti sale ne nakawar a kmi lo,
ma iane nwayat ma myat dedesar.
Nempa farlan kmi dedesar ma myose mlyarat Ratu Ni mpempeang,
iane feti kmi myal tenmir ber Ratu ma myeluk Ni mangkaryae,
ma keta nafdiat a kmi a na sounlury.
17 Luryain a ne kmi to milele Ratu mpa salar rakawar a kmi.
Nempa lere ye milele Ratu lo mpa myose mlyarat Ratu Ni anftutw botunar ma kuftutu ber a kmi a ne myor dalmir kateman.
Iane nwayat ma kose alang ber Ratu!
18 Ma Ratu nalin a kmi nbie nof salar ma rakawar a kmi a ne,
ma lere ye myal tenmir ber Ratu ma myeluk Ni mangkaryayar ma myose mlyarat Ni mpempeang.
19 Wangur,
yakw kal contoh na tomwatar sa ma nakawar tomwat walyetar,
ma tomwate ma neluk kawar.
Yakw kal contoh farane nema merawe ber a kmi ma mkyaul myal safe ma kuftutu ne.
Luryain a ne salar rakawar a kmi nwayat ma dedesar ma myose mlyarat mir makeus yatkar,
mpa mtyafal ma myose kabain yatkar a nbal.
Nempa lere ye kmi myal tenmir ber Ratu nema dedesar ma myose mlyarat Ratu Ni mpempeang.
20 Yakw kfwalak farane fali noak ma salar lolone rakawar a kmi,
kmi to bise ma myose kabain botunar mlyarat Ratu Ni mpempeang.
21 Ma myonri ubany safe myof mir momorip luryain a ne?
To ubany sasaf!
Fali safe ma myose luryain a ne nose ma lere ye kmi myeat,
ma iane nwayat ma na ler famudi e,
myat dedesar.
22 Nempa lere ye Ratu nalin a kmi nbie nof salar ma rkuase a kmi a ne.
Ma kmi myeluk Ratu Ni mangkaryayar lo.
Ma kmi myorip farane ma ubany ber a kmi,
fali Ratu nfil a nkese kmi lo ma myeluk Ni tomwatar,
nema na ler famudi e,
myonri momorip dedesar.
23 Fali tomwatar monuk ma rose salar a ne keta ronri nir wayat.
Ma nir wayat a ne iane feti keta rmat.
Nempa Ratu nfatutu Ni dalamy ngamone ber kit,
mpa nal momorip dedesar ber kit.
I nose farane fali kit dalminrar lese tor Yesus ninr Ray Silai ma neluk ninr Mangnrure.