Kit bise ma tangamon a tbali tor Ratu fali Yesus ninr Ray Silai
5:1-11
1 Wangur,
lere ye Ratu nafdiat kit fali talele Yesus nir Ray Silai.
Iane nwayat ma tangamon a tbali tor Ratu fali safe ma Yesus ninr Ray Silai nose ber kit a ne.
2 Ma nof safe ma Yesus ninr Ray Silai nose ne iane neluk dalamtene ber kit ma tangamon a tbali tor Ratu fali talele I.
I nose farane nema bise ma tkoman Ratu Ni dalamy ngamone ma nfatutu ber kit a ne.
Iane nwayat ma tsenang resi fali talele feti keta nait e,
kit bise ma tonri Ratu Ni dadangin.
3 To lan iane nempa kit tsenang a nbal boloka tkoman suse,
fali tafai feti suse ma tkoman a ne nose ma dalminrar ramkoran.
4 Ma farlan tamkoran ma tabare suse,
keta nose ma boninrar ral anteman ma diat kit.
Ma iane nwayat ma tafal ma tikloi ma talele Ratu.
5 Ma farlan kit tikloi ma talele Ratu,
keta dalminrar to suse fali Ratu nkamis resi kit.
I nkamis kit a mpa I nal Ni Smwangtany ma nkarya na dalminrar.
Ma Ni Smwangtany a ne ma nfatutu Ni dalamy ngamone ma nlie nlengan ber kit.
6 Kit tafai feti Ratu nfatutu Ni dalamy ngamone ber kit fali I nfair kit ma to nukun kit.
Ni botuan e,
ka Ratu nukun kit fali ninr salar yadin ma to bise ma tafdiat kit a na sounlury.
Nempa noak a ne Yesus ninr Ray Silai nmat la nlitan tomwat yatkar kit.
Ma Ratu ntetak lere ma Yesus nmat ber kit a ne lo.
7 Fali masumput desar ber tomwate ma nmat la nlitan tomwatar sa boloka tomwate ne nmorip e,
namlonry.
Nempa ber tomwatar sa ma nmorip e nangamon,
nre kete tomwatar sa ma nmpeang motak ma nmat ma nlitan i.
8 Nempa safe ma Ratu nose,
nlengan nof a ne nbal,
fali noak ma tose salar yadin,
Ratu nfatutu Ni dalamy ngamone,
ma nanrenre Yesus ninr Ray Silai ma nmat la nlitan kit nof ninr salar.
9 Ratu nafdiat kit a na sounlury fali Yesus ninr Ray Silai nmat ma darany a ntarbui ber kit lo.
Ma nlengan a nbal e,
lere ye kit tafai feti keta ninr Ray Silai nalin kit nof Ratu Ni resar na lere ma nma ne.
10 Fali noak ma kit to tangamon tor Ratu fuky e,
I nal Anaky ma nmat la nlitan kit nema bise ma tangamon a tbali tor Ratu.
Ma nlengan a nbal e,
lere ye kit tangamon tor Ratu lo,
mpa kit tafai feti Yesus ninr Ray Silai keta nalin kit nof Ratu Ni resar na lere ma nma ne fali Anaky nmorip a nbali lo.
11 Ma to lan iane.
Kit tsenang a nbal fali Yesus ninr Ray Silai ma neluk ninr Mangnrure ne,
nose ma tangamon a tbali tor Ratu.
Safe ma Adam nose ma Yesus nose to feleles
5:12-21
12 Wangur,
tomwatar sa nfufw far sale dalam lo nwayat ma ka nmat.
Ma sale ma nose ne nwayat ma tomwatar monuk rose sale mpa famudi e,
ka rmat monuk.*
13 Noak ma Ratu to nal tetetkar ber Musa fuky e,
tomwatar rose sale lo.
Nempa Ratu to nfayaki nir salar ne fali tetetkar to ramin a fuky.
14 Boloka farane mamate nkuase tomwatar monuk ntabw nof are Adam terik Musa.
Iane nwayat ma tomwatar monuk rmat boloka sir to rlangas Ratu Ni faretar farlan Adam ma nlangas Ratu Ni faretar.
Ma Adam ye ketla feleles nor tomwat sa ma keta nma na ler famudi iane Yesus.
Fali nof safe ma Adam nose ne,
tomwatar monuk keta ronri nir wayat.
Ma nof safe ma Yesus ninr Ray Silai nose ne,
keta tomwatar monuk ronri nir wayat a nbal.
15 Nempa safe ma Adam nose ma Yesus nose ne to feleles,
fali Ratu Ni dalamy ngamone silai nlengan nof sale ma Adam a nose.
Sale ma tomwatar sa nose ne nwayat ma tomwatar monuk rmat,
nempa Ratu nfatutu Ni dalamy ngamone ma nlengan nof a ne nbal.
I nose farane nalyole tomwatar sa,
I a ne Yesus ninr Ray Silai.
16 Ratu Ni dalamy ngamone silai nlengan nof sale ma Adam nose ne,
fali noak ma i nlangas Ratu Ni faretar,
Ratu ntetak ma ka nukun Adam.
Nempa Ratu dedesar ma nfatutu Ni dalamy ngamone ber tomwatar yadin ma rlangas Ni faretar a ne nema Ratu bise ma nafdiat sir a na sounlury.
17 Botuan feti tomwatar sa nose sale nwayat ma mamate nsor tomwatar monuk.
Nempa nlengan a nbal e,
safe ma tomwatar sa ma nose ne,
I a ne Yesus ninr Ray Silai.
Fali Ratu nfatutu Ni dalamy ngamone ma nlie nlengan nalyole Yesus ninr Ray Silai mpa tomwatar rangamon a rbali ror Ratu ma keta sir raktem Yesus ninr Ray Silai rfarete.
18 Mpa tomwate lese nlangas Ratu Ni faretar nwayat ma Ratu nukun tomwatar monuk.
Farlan a nbal tomwatar sa nose nlarat Ratu Ni mpempeang nwayat ma Ratu bise ma nafdiat tomwatar monuk na sounlury,
nema rmorip dedesar ror I.
19 Mpa fali tomwatar sa to nose nlarat Ratu Ni faretar,
nwayat ma tomwatar monuk rose sale.
Farlan a nbal tomwatar sa nose nlarat Ratu Ni faretar,
nwayat ma Ratu bise ma nafdiat tomwatar monuk na sounlury.
20 Ratu nal tetetkar ber Musa nema tomwatar bise ma rsalan desar feti nir salar rtafal ma yadin.
Nempa boloka nir salar rtafal ma yadin,
Ratu ntafal ma nfatutu Ni dalamy ngamone ma nlie nlengan ber sir.
21 Luryain e,
salar rkuase tomwatar monuk nwayat ma Ratu nukun monuk sir ma rmat.
Nempa lere ye Ratu Ni dalamy ngamone ma nkuase ninr momorip.
Iane ma nwayat ma Ratu nafdiat kit a na sounlury,
ma nal momorip dedesar ber kit,
nalyole safe ma Yesus ninr Ray Silai ma neluk ninr Mangnrure ne nose.