Ratu nafdiat Abraham fali nalele I
4:1-12
1 Wangur,
no msyalan nusninrar Abraham a ne.
Safe nwayat ma Ratu nafdiat i a na sounlury?
2 Ma farlan Ratu nafdiat Abraham nof ni wewelmpampan ngamonar,
keta nafdas i a na sounlury.
Nempa ni botuan e,
to sasaf ma nose ma nafdas i na Ratu sounlury.
3 Ma rarengi na Kitap Lelerap dalam,
“Abraham nalele Ratu.
Ma fali i nalele Ratu,
nwayat ma Ratu nlangun i ma nafdiat i a na sounlury.”*
4 Tomwate ma nkarya ka nonri sewe,
ma kete tfalak feti iane hadiah motak ber i.
Fali ni botuan e,
iane ni wayat ma ka nonri nof ni karyae ne.
5 Nempa to tomwate fen lese ma Ratu nafdiat i fali koko i a nareke ma nose kabain ngamonar.
Mpa ka nalele Ratu fuky,
betno Ratu nafdiat i a na sounlury.
Fali boloka kit ye tomwat yatkar,
nempa Ratu nafdiat kit a na sounlury,
nof lan ma talele I.
6 Luryain e,
rai Daud nfalak farane ne nbal.
I nfalak feti ngamone ber tomwate ma Ratu nafdiat i,
to nof safe ma i nose.
7 I nfalak farye nbal:
“Ngamone ber tomwatar ma Ratu nlure nir salar ma nkes kalin nir salar a ne.
8 Ngamone ber sir a ne fali Ratu to nfayaki nir salar a ne nbal.”*
9 Ngamone ma Daud nfalak luryain a ne to ber lan tomwat Yahudyar ma rsunat sir rlarat agame ni yayatrwar,
nempa ber tomwatar ma to Yahudi sir ma to rsunat sir a ne nbal.
Yakw kfwalak farye fali kal Abraham neluk contoh ber a kmi lo feti Ratu nlangun ma nafdiat i a na sounlury fali i nalele Ratu.
10 Bengfir a betno Ratu nafdiat Abraham?
Noak ma to rsunat i nre rsunat i lo?
Farlan kit tbaca na Kitap Lelerap e,
Ratu nafdiat Abraham a ne noak ma to rsunat i a fuky.
Ma Ratu to nafdiat Abraham noak ma rsunat i lo.
11 Mpa Abraham nalele Ratu fuky betno rsunat i.
Ma sunat a ne neluk faniak feti Ratu nafdiat Abraham na sounlury fali nalele Ratu.
Iane nwayat ma Abraham ye neluk ame ber tomwatar monuk ma ralele Ratu ma to rsunat sir,
nema Ratu nafdiat sir a nbal na sounlury.*
12 Abraham ye neluk ame nbal ber tomwatar ma rsunat sir.
Ma i neluk ame ber sir to nof lan ma rsunat sir nempa nof ma ralele Ratu nbal.
Iane farlan ma Abraham nalele Ratu noak ma to rsunat i a fuky.
Abraham nalele safe ma Ratu nyoding ber i
4:13-25
13 Ratu nyoding ber Abraham nor ni dasdalam feti keta nal saryamprene ye ber sir.
Ratu nyoding farane to feti Abraham nlarat tetetkar ma Ratu nal ber Musa.
Ratu nyoding farane ber Abraham fali nalele Ratu,
nwayat ma Ratu nafdiat i a na sounlury.*
14 Fali farlan mdyaun feti lan tomwatar ma rlarat tetetkar ma Ratu nal ber Musa ma keta ronri safe ma Ratu nyoding,
mpe keta to ubany ma talele Ratu,
ma safe ma Ratu nyoding a ne to ubany desar.*
15 Yakw kfwalak farane fali to tomwate fen lese ma nose nlarat monuk tetetkar ma Ratu nal ber Musa ne.
Iane nwayat ma keta Ratu nukun sir.
Nempa farlan to tetetak ma tomwatar bise ma rose rlarat,
iane feti keta to rlangas sasaf.
16 Ratu nose Ni yoyoding ber tomwatar fali ralele I,
mpa iane lan Ni dalamy ngamone ma nal berkat ber tomwatar nlarat safe ma nyoding.
Iane nwayat ma berkat ma Ratu nyoding a ne I nal ber Abraham ni dasdalam monuk.
Ratu nal berkat to ber lan sir ma rlarat tetetkar a ne,
nempa ber sir a nbal ma ralele Ratu,
farlan Abraham ma nalele Ratu.
Iane nwayat ma na Ratu sounlury e,
Abraham ye neluk ame ber kit monuk.*
17 Iane feleles farlan ma Ratu nfalak ber Abraham na Kitap Lelerap dalam farye:
“Yakw kfwil ko ma mweluk ame ber nusar monuk.”
Ratu nyoding farane ber Abraham,
ma Abraham nalele safe ma Ratu nyoding a ne.
Fali i nafai feti Ratu ye ma nafmorip a nbali mangmwatar.
Ma i nafai nbal feti Ratu nose safe safe ma to ramin ma ramin,
nlarat safe ma nfalak.*
18 Noak a ne Abraham to nalele feti keta anaky nempa dedesar ma nalele safe ma Ratu nyoding ber i feti keta i neluk ame ber nusar monuk.
Iane farlan ma rarengi na Kitap Lelerap dalam,
“Keta nim dasdalam yadin desar.”*
19 Abraham nafai feti namaken lo ma ni ngarkar ketla nait rati mpa keta to anaky,
ma sawany Sara e,
nmakw nbal.
Boloka farane Abraham dedesar ma nalele Ratu ma to natliur I.*
20 Ma i to dalamy suse na safe ma Ratu nyoding ber i a ne nempa ntafal ma nalele Ratu nor dalamy kateman,
ma dedesar ma ndangin Ratu.
21 Ma i nalele desar feti Ratu Ni kuase ma nose nlarat safe ma nyoding a ne.
22 Iane nwayat ma Ratu nlangun ma nafdiat i a na sounlury.
23 Ratu nfalak na Kitap Lelerap dalam na Abraham feti Ratu nafdiat i a na sounlury.
Safe ma Ratu nfalak na Abraham a ne to ber lan Abraham,
24 nempa ber kit a nbal.
Ratu nafdiat kit a na sounlury,
ma nlangun kit ma teluk tomwat malondyar,
fali kit talele feti Ratu nafmorip a nbali Yesus nof mangmwatar.
Yesus ye ninr Ray Silai ma neluk ninr Mangnrure.
25 Ratu nanrenre Yesus ninr Ray Silai ma nmat la nlitan kit tof ninr salar ma nafmorip a nbali I.
I nose farane nema bise ma nafdiat kit ma nlangun kit ma teluk tomwat malondyar.*