Ratu keta nukun tomwatar nor malonri
3:1-8
1 Mpa wangur,
tomwat Yahudyar kit ye ma tomwatar ma to Yahudi sir a ne,
kit monuk feleles na Ratu sounlury.
Mpa ubany safe ber kit ma teluk tomwat Yahudyar?
Ma ubany safe ma rsunat kit tlarat tetetkar a ne?
2 Botuan feti kit teluk tomwat Yahudyar e,
iane ubany silai.
Fali luryain e,
Ratu nfil tomwat Yahudyar kit baluan ma nal Ni ngribatnir ber kit.
3 Ma tomwat Yahudyar ketnir a ne to rose rlarat safe ma sir ryoding ber Ratu.
Farlan rose farane e,
keta Ratu to nose nlarat safe ma nyoding ber sir a ne e?*
4 Tate desar nre!
Boloka tomwatar monuk rlepusuk nempa Ratu dedesar ma nfalak kabain botunar.
Iane farlan ma ray Daud nfalak na Kitap Lelerap dalam,
“O Ratu,
safe ma Ko mfwalak a ne botuan,
ma boloka tomwatar rtetak Nim ngriar ma rfasale Ko,
nempa famudi e,
ryoding feti safe ma Ko mfwalak a ne botuan.”*
5 Nempa tomwat Yahudyar kit tose kabain yatkar,
mpa tomwatar rtafal ma rafai feti Ratu ye ma botuan.
Ma kete mdyaun feti farlan Ratu nukun tomwat salar e,
I to namlonry.
(Fali iane tomwatar nir andanwar motak).
6 Safe ma tomwatar rdaun a ne iane sale desar.
Fali farlan tfalak feti Ratu to namlonry,
iane feti I to bise ma ntetak tomwatar na saryamprene ye nir ngriar.
7 Nempa nre kete tomwat Yahudyar ketnir rdaun feti kit tfalak kabain lepuskwar motak.
Safo farlan tfalak kabain lepuskwar e,
keta tomwatar rtafal ma rdangin Ratu fali I to nlepusuk.
Mpa farlan farane e,
safema I lolone nukun kit nof ninr salar a ne?
8 Farlan sir rdaun farane iane feleles farlan ma rfalak feti mya ma tose kabain yatkar,
nema kit bise ma tsalan kabain ngamonar tof safe ma kit tose ne.
Ma tomwatar ketnir rfalak yatak na yakw feti kuftutu anftutwar ma farane.
Mpa tomwate ma nfalak farane la Ratu nukun i,
iane ma diat.
Tomwatar monuk rose sale lo
3:9-20
9 Mpa wangur,
ka kete mdyaun feti tomwat Yahudyar kit tangafel a tlengan tof tomwatar ma to Yahudi sir.
Tate desar.
Iane farlan ma kfwalak ber a kmi a ne feti sale nkuase tomwatar monuk dalmir lo boloka Yahudyar sir nre to Yahudyar sir.
10 Iane farlan ma rarengi na Kitap Lelerap dalam,
“To tomwate fen lese nbal ma nmorip e,
namlonry na Ratu sounlury.*
11 To tomwate fen lese nbal ma nkaul nal safe ma nangafel,
Ma to tomwate fen lese nbal ma nareke ma nafai Ratu Ni mpempeang.
12 Tomwatar monuk ratliur Ratu lo,
ma nir momorip to ubany lo.
Ma to tomwate fen lese nbal ma nose kabain ngamonar,
ma to tomwate fen lese nbal.”
13 Sir bise ma rfen tomwatar ror nir ngribatin yatkar farlan kubur ma ntakbanril la ndaf ma rnau tomwatar na dalam.
Ma suknir rtarful ma rlepusuk tomwatar,
ma nir ngribatnir farlan kasi ni racun ma bise ma nfen tomwatar.*
14 Sir dedesar ma rangoak tomwatar.*
15 Manrilak desar ma rsiksa ma rfen tomwatar.
16 Sir rti mpenempen motak e,
dedesar ma rose suse tomwatar ma rose mimiri.
17 Sir to rafai ma rmorip e,
rangamon ror tomwatar.*
18 Ma to ralang desar Ratu.*
19 Kit tafai tof tetetkar ma Ratu nal ber Musa ne feti to tomwate fen lese ma nose kabain botunar.
Ma kit tafai desar feti safe ma rarengi na tetetkar a ne iane ber tomwat Yahudyar,
sir a ne ma rose rlarat tetetkar a ne.
Mpa to tomwate fen lese ma bise ma nafdiat a nbali i,
ma Ratu ka nukun tomwatar monuk.
20 Ma keta to tomwate fen lese ma Ratu nafdiat i a na sounlury fali nose nlarat tetetkar ma Ratu nal ber Musa ne.
Fali nof tetetkar a ne tomwatar rtafal ma rafai feti rose sale.*
Ratu nafdiat tomwatar fali ralele Yesus
3:21-31
21 Lere ye Ratu nafbotin feti felan farpe ma I nafdiat tomwatar na sounlury.
Ma nafbotin ngriar a ne na tetetkar ma nal ber Musa,
ma nabyar nir kitpar.
Na kitpar a ne I nfalak feti nafdiat tomwatar na sounlury to nof ma rlarat tetetkar a ne.
22 Nempa Ratu nafdiat tomwatar na sounlury nof ma ralele Yesus ninr Ray Silai.
I nose farane ber tomwatar monuk,
ma to nasalan sou fali na sounlury e,
sir monuk feleles.*
23 Ma tomwatar monuk rose sale lo mpa to bise ma rfatutu Ratu Ni dadangin.
24 Ratu nafdiat tomwatar na sounlury fali I nfatutu Ni dalamy ngamone ber sir ma to rperlu ma rbayar sasaf.
I nafdiat sir fali Yesus ninr Ray Silai nmat la ntebus tomwatar nof nir salar.
25 Ratu nsiduk Yesus ma nmat la ntebus tomwatar nof nir salar nema sir ma ralele I a ne bise ma rangamon a rbali ror I.
I nose farane la nfatutu feti I namlonry,
fali luryain e,
Ratu nsabar motak ma to nukun tomwatar ma nsalan lonri ma sir rose sale.
26 Ma nof Yesus Ni mamate ne Ratu nfatutu feti I nukun tomwatar ma rose sale nor malonri,
ma lan I ma diat.
Ma I nafdiat sir ma ralele Yesus ne na sounlury a nbal.
27 Farlan farane kit to bise ma tafdas kit feti tangamon a tbali tor Ratu fali tose tlarat tetetkar ma nal ber Musa,
nre fali kabain ngamonar ma kit tose.
Tate desar.
Kit bise ma tangamon a tbali tor Ratu tof lan ma talele Yesus.
28 Fali yakw kulele feti Ratu nafdiat tomwatar na sounlury nof ma ralele Yesus,
ma to nof ma rlarat tetetkar a ne.
29 Farlan to farane nre kete mdyaun feti Ratu ye ber lan tomwat Yahudyar kit.
Safo ni botuan e,
Ratu ye neluk Ratu nbal ber tomwatar ma to Yahudi sir.
Au,
botuan.
I ye neluk Ratu nbal ber tomwatar ma to Yahudi sir.
30 Fali Ratu lan lese.
Ma I nafdiat tomwatar na sounlury fali ralele Yesus.
Ma I nafdiat tomwatar ma to Yahudyar sir a nbal fali ralele Yesus.*
31 Mpa Ratu nafdiat kit a nbal na sounlury fali talele Yesus.
Nempa iane kete nwayat ma tdaun feti tetetkar ma Ratu nal ber Musa ne to ubany lo,
tate desar nre!
Fali farlan talele Yesus,
iane nwayat ma tafal ma tose tlarat tetetkar a ne fen ngamone.