Ratu nsidang ma nukun tomwatar monuk
2:1-16
1 Wangur,
ali mpear a kmi mampe mfyasale tomwatar ma mdyaun feti to mir sal ye?
Farlan kmi mfyasale tomwatar iane feti kmi mfyasale mbyali kmi,
fali kmi myose kabain yatkar farlan sir a nbal.*
2 Ma kit tafai feti farlan Ratu ntetak ma nukun tomwatar ma rose kabain yatkar ma farane,
keta I ntetak nir ngriar nor malonri.
3 Mpa kete mtyetak tomwat walyetar nir ngriar ma mtyak Ratu ma nukun sir.
Safo kmi desar e,
myose ngriar ma farane nbal,
mpa kete mdyaun feti keta Ratu to nukun a kmi.
4 Ma kete mdyaun feti Ratu Ni dalamy ngamone ma nlie nlengan ma nfatutu ber a kmi a ne to ubany.
Ma kete mdyaun feti I nsabar la ndaf a kmi.
Mpa ka mifai feti Ratu nfatutu Ni dalamy ngamone ber a kmi a ne nema mtyate mir salar.
5 Nempa ulmir arwaluk ma to mpyeang ma mtyate mir salar.
Iane nwayat ma Ratu nukun a kmi ntafal ma maberat desar.
Na lere ma Ratu nfatutu Ni resar keta nukun tomwatar nor malonri.
6 Ma keta I nbalas ber tomwatar rlarat safe ma sir rose ne.*
7 Ratu nal momorip dedesar ber tomwatar ma dedesar e,
rose kabain ngamonar.
Sir rose kabain ngamonar nema Ratu ndangin sir,
nalang sir,
ma keta ronri momorip dedesar.
8 Nempa tomwatar ma rdaun lan tenir,
to rose rlarat Ratu Ni mpempeang,
rose kabain yatkar,
keta Ratu nfatutu Ni resar ma nukun sir.
9 Ma tomwatar ma na nir momorip e,
dedesar ma rose kabain yatkar keta rkoman suse silai desar.
Sir a ne tomwat Yahudyar ma tomwatar ma to Yahudi sir a nbal.
10 Nempa tomwatar ma dedesar ma rose kabain ngamonar keta Ratu ndangin sir,
nalang sir,
ma nose nbal ma rmorip e,
rangamon motak.
Sir a ne tomwat Yahudyar ma tomwatar ma to Yahudi sir a nbal.
11 Fali Ratu to nasalan sou.*
12 Ratu keta nukun tomwatar monuk ma rose sale boloka Yahudi sir nre to Yahudi sir.
Ratu keta nukun tomwat Yahudyar ma rose sale ne nlarat tetetkar ma nal ber Musa.
Ma tomwatar ma to Yahudi sir a ne,
boloka to rafai tetetkar ma nau ber Musa,
keta Ratu nukun sir noak ma rose sale,
nempa to nukun sir nlarat tetetkar ma nau ber Musa ne.
13 Fali Ratu keta to nafdiat tomwatar ma rdengar motak tetetkar ma nal ber Musa ne,
nempa nafdiat sir ma rdengar ma rose rlarat tetetkar a ne.
14 Ma botuan feti tomwatar ma to Yahudi sir a ne to rafai tetetkar ma luryain e,
Ratu nal ber Musa ne.
Nempa farlan rmpeang ma rose rlarat tetetkar a ne,
iane nfatutu feti tetetkar a ne ramin dalmir a ne lo boloka to rafai tetetkar a ne fuky.
15 Safe ma sir rose ne iane nfatutu feti tetetkar a ne namin dalmir.
Tetetkar ma namin dalmir a ne nwayat ma bise ma rtetak feti safe ma sir rose ne diat nre sale.
16 Ma nait ni tewat ma Ratu nukun saryamprene,
keta I nal kuase ber Yesus ninr Ray Silai ma ntetak tomwatar nir ngriar monuk ma ramudim na dalmir a ne.
Iane ma kfwalak dedesar,
noak ma kufwibar Ibar Ngamone.
Tomwat Yahudyar rafai tetetkar ma luryain Ratu nal ber Musa nempa dedesar ma rlangas tetetkar a ne
2:17-24
17 Wangur,
kmi mfyalak feti Yahudyar a kmi ma Ratu nfil a kmi baluan neluk Ni tomwatar.
Ma kmi milele feti kmi myose mlyarat Ratu Ni tetetkar ma luryain e,
I nal ber Musa mpa I to nukun a kmi.
Ma mifdas a kmi fali mdyaun feti lan a kmi ma mifai Ratu.
18 Ma kmi mfyalak feti Yahudyar kmi a ne,
ma mifai Ratu Ni mpempeang.
Ma kmi mifai nbal feti mpe ma diat ma mpe ma sale,
fali tomwatar raftutu tetetkar a ne ber a kmi.
19 Kmi mdyaun feti kmi feleles farlan tomwate ma nkolat matbole.
Ma kmi farlan tomwate ma nonry ngaodir ma ber tomwate ma namin makrokap dalam.
20 Ma mdyaun feti mifai monuk anftutw botunar na tetetkar ma luryain e Ratu nal ber Musa ne,
mpa bise ma miftutu tomwatar ma to rafai sasaf na Ratu.
Ma mdyaun a nbal feti kmi bise ma miftutu tomwatar ma to rafai feti impe ma diat ma impe ma sale.
21 Mpa farlan bise ma miftutu tomwat walyetar ni botuan e,
ka koko kmi a miftutu mbyali kmi.
Kmi miftutu tomwat walyetar ma kete ramnang nempa koko kmi e,
mimnang.
22 Kmi miftutu tomwatar ma kete ranronr,
nempa koko kmi e,
minronr.
Ma mfyalak feti kmi to msyampayang ber ratwawatar,
safo ketnir nof a kmi ramnang kabanir rof ratw wawatar nir snyomp anir.
23 Kmi mifdas a kmi a na tetetkar ma luryain Ratu nal ber Musa,
safo koko kmi a mlyangas tetetkar a ne ma mirikan Ratu.
24 Iane farlan ma rarengi na Kitap Lelerap dalam farye,
“Fali adat yatkar ma tomwat Yahudyar a kmi myose ne,
mpa nus walyetar rarikan Ratu.”*
Tomwat Yahudyar rsunat sir rlarat tetetkar ma Ratu nal ber Musa nempa dedesar ma rlangas tetetkar a ne
2:25-29
25 Farlan kmi myose mlyarat tetetkar ma Ratu nal ber Musa ne,
keta sunat ma kmi myose ne ubany ber a kmi.
Nempa farlan mlyangas tetetkar a ne,
keta sunat a ne to ubany ber a kmi.
26 Mpa farlan tomwatar ma to Yahudi sir a ne to rsunat sir,
nempa rose rlarat tetetkar ma Ratu nal ber Musa ne,
keta na Ratu sounlury e,
sir farlan tomwatar ma rsunat sir.
27 Mpa farlan farane tomwatar ma to Yahudi sir ma to rsunat sir a ne keta rafmweat tomwat Yahudyar a kmi.
Fali rsunat a kmi rlarat safe ma rarengi na tetetkar ma Ratu nal ber Musa ne,
nempa kmi mlyangas tetetkar a ne.
Ma sir e,
to rsunat sir nempa rose rlarat tetetkar ma luryain e Ratu nal ber Musa ne.
28-29 Tomwat Yahudi botuan ma reluk Ratu Ni tomwatar a ne,
iane feti sir ma to rfatutu feti Yahudi sir ma to ramtoranbabe sir reluk Yahudyar.
Ma to rsunat sir rlarat tetetkar ma Ratu nal ber Musa,
nempa rsunat sir na lan dalmir.
Sunat na dalmir,
isiny feti Ratu Smwangtany nafbweberi dalmir ma iane sunat ma botuan.
Tomwatar ma farane ma Ratu ndangin sir.
Boloka tomwatar to rdangin sir nempa Ratu dedesar ma ndangin sir.*