Paulus ni surat ber soranyar na
Roma
Salam
1:1-7
1 Ye surat nof yakw Paulus, ber soranyar monuk na kote Roma. Yakw ye Yesus ninr Ray Silai Ni mangkaryae. Ratu nfil yakw ma kweluk mangsiduk, ma nal karyae ber yakw ma kufwibar Ibar Ngamone. 2 Ratu nyoding Ibar Ngamone ber Ni nabyar nof luryain lo, ma nluan sir ma rarengi Ibar a ne na Kitap Lelerap dalam. 3-4 Ibar Ngamone ne iane ibar na Ratu Anaky. I a ne Yesus ninr Ray Silai ma neluk ninr Mangnrure. Noak ma I neluk tomwate, ramtoranbabe I nof ray Daud ni dasdalam. Ma I a nbal e, neluk Ratu Anaky ma nanglerap feleles farlan Ratu. Ratu nafmorip a nbali I nor Smwangtany, la nfatutu feti Yesus ye ma Ni kuase ma nlie nlengan. 5 Yesus ninr Ray Silai Ni dalamy ngamone ber yakw, mpa Ratu nfil yakw ma kweluk Yesus Ni mangsiduk. Ratu nose farane nema kuftutu tomwatar monuk rof nusar mpane ma ralele Yesus, ma rose rlarat Ni mpempeang, nema tomwatar monuk rdangin I. 6 Ma kmi ma mimin Roma nbal, Ratu nfil a kmi ma myeluk Yesus ninr Ray Silai Ni tomwatar. 7 Iane nwayat ma kurengi surat ye ber a kmi a na Roma. Ratu nkamis a kmi ma nfil a kmi ma myeluk Ni tomwatar. Yakw ktwak ma ka weni Amninrar Ratu ma Yesus ninr Ray Silai ma neluk ninr Mangnrure ma rfatutu Nir dalamy ngamone ma ral maline ber a kmi.
Paulus nsampayang ma nose alang ber Ratu
1:8-15
8 Wangur to kuloran ma kurengi surat ye fuky e, yakw kose alang ber Ratu ma kswatngur ber I a ne, fali safe ma Yesus ninr Ray Silai nose ber a kmi. Ma kose alang a nbal fali tomwatar na mpenempen rdengar ibar feti kmi mimkoran ma milele Yesus ninr Ray Silai. 9 Ma kwarya ber Ratu kor dalangw kateman ma kufwibar Ibar Ngamone na Anaky. Ratu ma kwarya ber I a ne nafai dalangw feti dedesar ma kunremi kmi a na ningw sampayang. 10 Ma kswampayang dedesar ma ktwak nema farlan Ratu nlarat e, ka weni nal let ngamonar sa nema bise ma ktwi kukmat a kmi. 11 Fali kmpweang desar ma kutungan kor a kmi, ma ktwak Ratu Smwangtany ma nberkat a kmi, nema dedesar ma milele Yesus ninr Ray Silai. 12 Ma fali taktem a talele Yesus mpa kmi bise ma mifkoran yakw, ma yakw bise ma kufkoran a kmi nbal nema taktem a tafal ma talele Yesus. 13 Wangur, yakw kmpweang ma mifai feti lain yadin e, kose ma ktwi kswalan a kmi, nempa terik lere ye to let ma ktwi a fuky. Yakw kmpweang ma ktwi kukmat a kmi ma ktwulung tomwatar ketnir nof a kmi a ne ma rtafal ma ralele Yesus ninr Ray Silai farlan ma ktwulung tomwatar ma to Yahudi sir na ain walyetar.* 14 Yakw kmpweang ma ktwi kukmat a kmi fali kdwaun feti Ratu nsiduk yakw ma ka kufwibar Ibar Ngamone ber tomwatar monuk. Sir a ne ma ramin kotar ma pnuar, ma ber sir ma rafai resi, ma sir ma to rafai sasaf a nbal. 15 Iane nwayat ma kmpweang desar ma kufwibar Ibar Ngamone ber kmi a nbal na kote Roma.
Ibar Ngamone ni kuase ma nfair tomwatar
1:16-17
16 Wangur, yakw to kmweat ma kufwibar Ibar Ngamone fali kulele feti Ibar Ngamone ye ni kuase ma nfair tomwatar ma ralele ibar a ne. Sir a ne to lan tomwat Yahudyar nempa tomwatar ma to Yahudi sir a nbal.* 17 Fali na Ibar Ngamone ne Ratu nfatutu feti felan farpe ma I nafdiat tomwatar na sounlury. Iane feti ka talele dedesar Ratu, farlan ma rarengi na Kitap Lelerap dalam, “Tomwatar ma rmorip e rafsenange dalangw, sir keta dedesar ma rmorip fali ralele Yakw.”*
Tomwatar monuk rose sale na Ratu sounlury
1:18-32
18 Ratu ma namin surga nfatutu feti keta nukun tomwatar ma rose salar ma rose kabain yatkar, fali kabain yatkar ma sir rose ne, nose nteri tomwatar nwayat ma to rkaul ral Ratu Ni anftutw botunar. 19 Ratu nukun sir fali sir rafai Ratu Ni adat ma botuan. Ma sir rafai Ni adat fali Ratu koko I ma nfatutu Ni adat a ne ber sir. 20 Ntabw ma Ratu nose saryamprene, tomwatar to bise ma rsalan souny feti felan farpe. Nempa sir bise ma rsalan Ratu Ni kuase ma nlie nlengan ma to terik, ma sir bise ma rafai Ni adat nof safe ma I nose. Mpa to bise ma rfalak, “Kam to mafai Ratu.” 21 Sir rafai feti ka rdangin Ratu, ma rose alang ber I nempa sir to rdangin I ma to rose alang ber I. Sir to rdaun Ratu nempa rdaun lan kabanir ma to ubnir. Ma nir andanwar a raktem nwayat ma to rafai feti impe ma botuan.* 22 Sir rdaun feti nir anfai silai, safo ni botuan e, rmod desar. 23 Ratu Ni dadangin a ne to terik. Nempa sir rlikur Ratu ma rsatngur ber waltwar far tomwatar, safo tomwatar a ne keta rmat. Sir rose waltwar a ne far tomwate, mangkyar, binatngar ma emnir fat ma binatngar ma rlar.*
24 Iane nwayat ma Ratu nsalan lonri motak ma sir rose kabain yatkar rlarat nir makeus ma ranronr, nwayat ma sa nafmweat sa. 25 Sir to rose rlarat Ratu Ni anftutw botunar, nempa sir rlarat anftutw lepuskwar. Sir a nbal to rsatngur ber Ratu nempa rsatngur ber kabanir ma Ratu nose, safo ni botuan e, sir ka rsatngur ber Ratu ma nose kabanir monuk a ne, terik ma dedesar. Amen. 26 Sir rose farane nwayat ma Ratu nsalan lonri sir ma dedesar e, rlarat lan nir makeus yatkar ma rose kabanir la rafmweat a rbali sir. Mpa batar ma rafsau lo to rmpeang ma rkoil sawnir nempa rkoil bat walyetar. 27 Feleles farlan merwanar ma rafsau lo, sir to rmpeang ma rkoil sawnir a nbal, nempa nir makeus a nres ma rkoil merwan walyetar. Sir rose farane nwayat ma keta Ratu nukun sir nlarat kabain yatkar ma rose ne. 28 Sir to rmpeang ma rafai Ratu, mpa I nsalan lonri ma rlarat dedesar nir andaun yatkar a ne, nwayat ma sir rose kabanir ma to rangafel. 29 Sir rdaun lan kabain yatkar na nir momorip. Kabain yatkar a ne farye: rose suse tomwatar, rose nir adat yatkar, rkampres, rose yatak tomwatar, rdaun feti silai sir rlengan rof tomwat walyetar, rafen, rkafre, rlepusuk ma rkedan tomwatar. 30 Ma sir a nbal e, rmpeang lan ma rasompun, rarikan tomwatar, to rmpeang Ratu, nir adat nayatak desar, rtengkai, rafdas sir, rafai resi ma rose kabain yatkar, ma rbangal enir amnir. 31 Ratanuk e, to nir andaun, to rose rlarat nir yoyoding, to rkamis tomwatar, ma to nir lolompang ber tomwatar. 32 Sir rafai feti nof Ratu Ni tetetkar e, tomwatar ma rose kabanir a ne keta Ratu nukun a nfen sir. Nempa dedesar ma rose kabain yatkar, ma nlengan e, ryoding a nbal ma tomwat walyetar rose kabain yatkar.