Ratu nfatutu Ni ngamone ber tomwat Israelar ketnir nwayat ma ralele I
11:1-10
1 Wangur mir kateman! Yakw kfwalak desar feti, to lain sa ma Ratu natliur Ni tomwatar a fuky. Fali Israel yakw nbal, ma empungw nusingw ber Abraham, ma kof dasdalam Benyamin. 2 Ratu to natliur Ni tomwatar ma luryain e, nfil sir a ne. Minremi nre tate safe ma rarengi na Kitap Lelerap dalam na Elia. Noak a ne i nmangadu wainy Israelar nir adat ber Ratu na ni sampayang, ma nfalak, 3 “O Ratu Mangnrure Ko, sir rfen Nim nabyar lo. Ma rafyatak snyomp anir ma biase rloik snyompar ber Ko a ne. Ma bait lan yakw ye lo ma kmworip, nempa rareke ma rfen yakw nbal.” 4 Nempa Ratu nfalak ber Elia, “Yakw kfwil tomwatar ribun itw ma to lain sa ma rsatngur ber dewayar Baal.” 5 Iane farlan lere ye nbal, Ratu nfil a nkese tomwat Yahudyar ketnir ma reluk Ni tomwatar fali Ni dalamy ngamone ber sir. 6 Ratu nfil a nkese sir fali Ni dalamy ngamone ber sir, ma I nfil sir to nlarat safe ma sir rose. Fali farlan nfil sir nlarat safe ma sir rose ne, to bise ma tfalak feti I nfatutu Ni dalamy ngamone ber sir. 7 Mpa keta farpe? Tomwat Israelar rareke ma Ratu nafdiat sir a na sounlury nempa to bise ma ronri safe ma rareke ne. Lan tomwatar ketnir ma Ratu nfil sir a ne lo. Ma I nose ma tomwat Israel walyetar a ne ulnir arwaluk. 8 Iane farlan ma rarengi na Kitap Lelerap dalam farye,
“Ratu nose ma sir farlan tomwatar ma nir andanwar a ratngup.
Ma I nose matnir ma to rakeban ma nose nbal tlingnir ma to radengar terik lere ye.”
9 Daud nfalak a nbal feti:
“Yakw kswampayang ber Ratu nema noak ma raosfesta metryat e, susar diat sir farlan ma kekete ntey babi.
Ma weni nir adat yatak a ne nwayat ma rmpan sale ma Ratu nukun sir. Ratu nukun sir a ne iane feti nbalas nir adat yatak a ne.
10 Ma ka weni Ratu nose ma nir andanwar a raktem, nema to rkaul ral kabain botunar.
Ma nose nbal ma radungun fali dedesar ma rabare kabain mabertar.”
Ratu nfair nus walyetar ma to Yahudi sir
11:11-24
11 Iane nwayat ma kfwalak desar feti tomwat Yahudyar rmpan sale fali to ralele Yesus farlan tomwatar ma rtutuk sir ma rfufw ma to bise ma ramdir. Boloka farane keta dedesar ma rmpan sale e? Tate nre! Fali nof salar ma sir rose ne Ratu bise ma nfair tomwatar rof nus walyetar ma ralele Yesus. Iane nwayat ma tomwat Yahudyar a ne dalmir maninik sir. 12 Mpa nof salar ma tomwat Yahudyar rose, iane neluk dalamtene ber Ratu ma nberkat nus walyetar ma nlie nlengan. Mpa farlan tomwat Yahudyar rtate nir salar ma rangamon a rbali ror Ratu, keta ntafal ma nberkat nus walyetar ma nlie nlengan.
13 Nempa lere ye yakw kfwalak ber wangur ma to Yahudi kmi! Ray Silai nsiduk yakw ma kweluk Ni mangsiduk ber tomwatar ma to Yahudi sir. Ma kureke ma kwarya ma nangafel fali kufai feti ningw karyae ne ma ubany desar. 14 Yakw kulele feti nof ningw karyae ne nose ma ningw nuse ne dalmir maninik nus walyetar fali Ratu nfair sir. Ma ise nafai feti nof ma yakw kose farane Ratu nfair tomwatar ketnir nof sir a nbal. 15 Fali noak ma Ratu to nlangun tomwat Yahudyar, iane neluk let ngamone ber nus walyetar na saryamprene ma rangamon a rbali ror Ratu. Ma nlengan a nbal e, farlan Ratu nlangun waingw Yahudyar e, iane ntafal ma nangafel a nbal. Iane feleles farlan rmat lo nempa rmorip a rbali rof nir mamate.
16 Tomwat Yahudyar farlan roti. Farlan tomwatar sa npus baluan roti rufuky ma nsompe ber Ratu, keta roti lian a ne Ratu nie lo. Ma sir farlan katutnwar sa nbal. Farlan tomwatar rsompe katutun a ne wakrir ber Ratu, iane feti katutun a ne sangnir Ratu nie nbal. 17 Tomwat Yahudyar farlan katutun zaitun a nbal ma Ratu ntanam ma npiare. Nempa Ratu npet katutun a ne sangnir betno nal katutun walyetar sangnir ma nacangkok na katutun zaitun sangnir ma npet a ne. Mpa katutun sangnir ma racangkok a ne keta ronri tnyame nof katutun sangany ma rpiare ne. Mpe tomwatar ma to Yahudi kmi, kmi farlan katutun sangnir ma racangkok a ne. Mpa keta myonri berkat ma luryain e, Ratu nyoding ber tomwat Yahudyar empnir nusnir a ne nbal. 18 Nempa ka kete mifdas a kmi ma myeleng tomwat Yahudyar ma Ratu to nlangun sir farlan katutun sangnir ketnir ma ryebas sir a ne. Farlan mifdas a kmi e, ka minremi feti kmi ye farlan katutun sangnir motak. Fali katutun sangnir a ne to ral tnyame ber wakrir nempa wakrir a ne ma ral tnyame ber sangnir. 19 Nre kete tomwatar sa ma to Yahudi i nfalak, “Botuan, nempa tomwat Yahudyar farlan katutun sangnir. Ma yakw ma to Yahudi yakw ye farlan katutun walyete sangany. Ratu npet kalin katutun sangnir, ma npet katutun walyetar sangnir a nbal, betno nacangkok na katutun a ne tenany. Mpa yakw ye farlan katutun walyete sangany ma rlatan na katutun a ne tenany.” 20 Safe ma mfyalak a ne botuan! Nempa ka minremi feti Ratu nyebas sir fali to ralele Yesus. Ma Ratu nlangun a kmi fali milele I. Mpa ka kete mifdas a kmi ber tomwat Yahudyar nempa ka mifufu mbyali kmi ma mimtaut Ratu. 21 Tomwat Yahudyar farlan katutun zaitun ma rpiare. Ma tomwatar ma to Yahudi sir a ne farlan katutun walyetar sangnir ma rlatan na katutun zaitun a ne tenany. Mpa farlan Ratu to nlompang ma nyebas tomwat Yahudyar, keta nlengan e, tomwatar ma to Yahudi kmi, fali ni botuan e I to nlompang desar ma nyebas a kmi. 22 Mpa lere ye kit tsalan desar feti Ratu Ni dalamy ngamone ber tomwatar, nempa bise ma nukun sir a nbal nor malonri. I nukun desar tomwatar ma rose sale. Nempa I nfatutu Ni dalamy ngamone ma ber a kmi, lan feti myorip dedesar myor Ni dalamy ngamone ne. Farlan to myorip farane, keta nyebas a kmi. 23 Ma farlan tomwat Yahudyar ma Ratu nyebas sir a ne ralele rbali I, keta I nlangun sir fali Ni kuase ma nose farane. Iane feleles farlan katutun sangnir ma npet ma nyebas sir a ne, keta nal a nbali ma nacangkok na katutun a ne tenany. 24 Tomwatar ma to Yahudi kmi ye, farlan katutun zaitun sangnir ma ral rof katutun ma to rpiare, betno racangkok na katutun ma rpiare i a ne. Ma ni botuan e, farlan tomwatar ral katutun ma to rpiare ne, ma racangkok ror katutun ma rpiare i a ne, keta to naordeng. Boloka farane Ratu nlangun a kmi. Mpa kmi ma to Yahudi kmi motak e, Ratu nlangun a kmi, ma keta nlengan e, tomwat Yahudyar a ne. Sir farlan katutun zaitun ma tomwatar rpiare ma rpet kalin sir a ne ma ryebas. Mpa farlan ral ma racangkok a rbali na katutun a ne tenany, iane naordeng.
Ratu nfatutu Ni dalamy ngamone ber tomwatar monuk
11:25-32
25 Wangur a kmi ma myof nus walyetar, yakw kmpweang ma kufbwotin safe ma Ratu nmpeang ma nose nof luryain ma tomwatar to rafai fuky. Yakw kufbwotin ber a kmi farane, nema kete mifdas a kmi ma mdyaun feti mifai safe-safe monuk. Safe ma Ratu nmpeang ma nose ber tomwatar a ne farye: Ratu nose ma tomwat Israelar ketnir ulnir arwaluk, nempa ulnir arwaluk a ne keta to dodo. Ma Ratu nfil tomwatar ma rof nus walyetar ma nfair sir a nbal. Mpa keta sir monuk a ne ralele Yesus a fuky, betno tomwat Israelar ralele Yesus. 26 Nof a ne Ratu keta nfair tomwat Yahudyar monuk, iane feleles farlan ma rarengi na Kitap Lelerap dalam farye:
“Ray Silai keta nma nof Sion
Ma I keta nlure Yakub ni dasdalam nir salar.
27 Ma keta kose Ningw yoyoding kor sir
feti noak a ne keta klwure nir salar.”
28 Fali tomwat Yahudyar to rlangun Ibar Ngamone nof Ratu, mpa sir reluk Ratu Ni muswar. Iane neluk let ngamone ber tomwatar ma to Yahudi sir a ne ma Ratu nfair sir. Boloka farane Ratu dedesar ma nkamis tomwat Yahudyar sir a ne, fali nfil sir nof luryain lo, nlarat Ni yoyoding ber empnir nusnir. 29 Fali farlan Ratu nfil ma nberkat tomwatar lo, keta I nose nlarat safe ma nyoding ber sir a ne, ma to nal a nbali berkat a ne nof sir. 30 Tomwatar ma to Yahudi kmi, luryain e, kmi to milarat liry ber Ratu. Nempa lere ye I nfatutu Ni dalamy ngamone ber a kmi lo fali tomwat Yahudyar to ralarat liry ber I. 31 Iane farlan tomwat Yahudyar a nbal. Lere ye sir to ralarat liry ber Ratu, nempa sir ka rose farane nema I bise ma nfatutu Ni dalamy ngamone ber sir farlan ma I nfatutu Ni dalamy ngamone ma ber kmi a nbal. 32 Fali Ratu nsalan lonri tomwatar ma to ralarat liry ber I. I nose farane nema bise ma nfatutu Ni dalamy ngamone ber tomwatar monuk.
Mya ma tose alang ma tdangin Ratu
11:33-36
33 Ratu Ni dalamy ngamone desar ber kit. Ma Ratu Ni anfai silai ma andaun ngamone ma nlie nlengan desar. Ma to tomwate fen lese ma bise ma nfalyole feti I ntetak tomwatar nir ngriar farpe. Ma to tomwate fen lese nbal ma bise ma nkaul nal Ni karyayar ma I nose.
34 Fali rarengi na Kitap Lelerap dalam farye:
“To tomwate fen lese ma nafai Ratu ni andaun!
Ma to tomwate fen lese ma bise nsurat I.
35 Ma to tomwate fen lese ma nal safe kabain ber Ratu,
nwayat ma ka I nbalas ma nal a nbali ber tomwate ne.”
36 Ma safe-safe monuk ma ramin saryamprene ye lan I ma nose. Ma Ni kuase nbal ma nayatur safe-safe monuk a ne. Ma I nose safe-safe monuk a ne ber I. Mpa mya ma tdangin Ratu terik ma dedesar. Amen.