Paulus ka ramin Malta
28:1-10
1 Noak ma mait da e,
kam mangamon motak.
Ma betno mafai feti iane yampren Malta.
2 Tomwatar na yamprene ne rangamon desar ma rlangun kam.
Ma rsuni au ber kam fali noak a ne udan ma nuse nrinririn.
3 Ne Paulus nabutin katutnwar ma nau na au dalam.
Metryat e,
kasi nbie ma ntuk limany fali au mefanas.
4 Noak ma tomwatar rsalan ma kasi ne ntikloi Paulus limany,
rafalak ber sir,
“Au,
botuan feti tomwate ye nfen tomwatar sa lo.
Boloka to sasaf diat i a na dol,
nempa keta dewa bate ma rtar feti Dewa Malonri to ninrang ma nmorip.”
5 Nempa Paulus naspepat kasi ne far au dalam ma to nkoman maninik.
6 Mpe rafliak feti keta limany a nbar nre metryat ma nfufw ma nmat.
Sir rnengar dodo lo ma rsalan e,
to sasaf diat i.
Mpa rfalak a rbali feti Paulus ye dewayar sa i.
7 Na iano tomwat sa ngarany Publius.
I nose gubernur na yamprene ne,
ma ni ompak to dodo nof ain ma mamin a ne.
I nangamon resi ma nlangun kam ma mamin ni das lerar tel.
8 Noak a ne Publius amany nmanririn ma mute fendere diat i.
Mpe Paulus nti kamar dalam ma nsalan i,
ma nsampayang betno nau limany na i,
ne nangamon desar.
9 Lama tomwatar monuk rafai ngrie ne ror mangafansar na nuse ne rma ma rakmat Paulus ma nafngamone sir a nbal.
10 Sir ralang resi kam ma mose ma mfangat kabal e,
sir ronry kabanir yadin ma kam mperlu a ne.
Paulus ka raflolwain rof Malta far Roma
28:11-15
11 Kam mamin yampren Malta bulnar tel,
betno maflolwain mor kaplar sa mof kote Aleksandria.
Kabal a ne nloi iane noak ma mengarat.
Na kabal a ne lury e rgambar,
“Dewa lakruar Kastor ma Poluks walnir a na.”
12 Mpe mwelat kote Sirakusa ma mamin a ne lerar tel.
13 Nof a ne mafla malyole laran tila mait kote Regium.
Ni bobole ne mnaur nanrir nof trangan,
nwayat ma mafla lerar du motak e,
mait kote Putioli lo.
14 Na iane matungan mor tomwatar ketnir ma ralele Yesus,
ne rtak ma mamin iane.
Mpa mamin iane minggu dalam betno mti kote Roma.
15 Tomwatar ma ralele Yesus ma ramin Roma rdengar feti kam mose ma mti iano.
Mpa sir rma ma rlangun kam a na Pasar Apius ma ketnir a nbal rma pnu Tres Taberne.
Noak ma Paulus nsalan sir,
nose alang ber Ratu mpe dalamy namkoran.
Paulus naftutu na Roma
28:16-31
16 Noak ma mait Roma,
mangfaret Romar rinrang Paulus ma koko i a namin das ma suldadwar sa najake i.
17 Lerar tel rsak,
Paulus ntar mangfaret Yahudyar ma rafburat sir.
Lama rafburat sir e nfalak,
“Wangur!
Yakw to kose sale ber ninr nuse,
ma to klwangas nusninrar ninr ngritinawar ma ral ber kit a ne.
Nempa sir romat yakw na Yerusalem betno ranrenre yakw ber tomwat Romar.
18 Lama rsidang yakw e,
rose ma rtate yakw fali to kose sale ma bertyan nor tetetak mamate.
19 Nempa tomwat Yahudyar to ryoding,
mpa kureke ma ka Kaisar Roma ntetak ningw ngrie ye.
Boloka farane to ningw andaun ma kbwangal waingw Yahudyar.*
20 Iane nwayat ma ktwak ma tafburat kit ma taale andaun.
Ma kmpweang ma kufbwotin ber a kmi feti ral rewe la rkete yakw fali kulele Ray Silai ma keta nma,
feleles farlan ma tomwat Israelar kit talele ne.”
21 Ne sir rfalak ber Paulus,
“Kam to mlangun surat sasaf nof propinsi Yudea na ko,
ma to tomwate fen lese nbal nof propinsi Yudea ma nfalak nim yatak.
22 Nempa mpeang ma mdengar safe ma muftutu ne,
fali kam mdengar monuk lo feti na mpenempen e,
tomwatar rbangal nim anftutu ne.”
23 Mpene rtetak lerar sa ma ratungan a rbali.
Ni lere ne yadin sir rti rakmat Paulus na das ma namin a ne.
Ne nof bobolisin terik lere da e,
nfalyole ber sir na Ratu neluk Rai ma nfarete tomwatar.
Ma nareke ma sir rkaul ral safe ma rarengi na Musa ni tetetkar ma nabyar nir kitpar nema ralele Yesus.
24 Nof sir a ne ketnir ralele safe ma Paulus a nfalak,
nempa ketnir e,
to ralele.
25 Iane nwayat ma rabangal,
ma rbali sir e,
rakes rasam sir.
Mpa Paulus a nfalak,
botuan desar safe ma luryain e,
Ratu Smwangtany nfalak ber nusninrar nabi Yesaya ma narengi na ni kitap dalam farye:
26 “Mtwi mfwalak ber nuse ye feti kmi keta dedesar ma mdyengar safe ma Yakw kfwalak,
nempa to mkyaul myal.
Ma dedesar ma msyalan safe ma Yakw kose,
nempa to mifai.”
27 Fali repat matnir ma tlingnir ma dalmir e,
ramkoran lo nema kete rsalan ma rdengar.
Sir rose farane nema kete rbali sir ber Yakw,
ma kufngamone sir.*
28 Ne Paulus a nfalak a nbal,
“Tbwarngur,
ka mifai feti lere ye tomwatar ma to Yahudi sir a ne rdengar ibar na Ratu nfair tomwatar nof nir salar lo,
ma keta ralele desar.”
29 [Lama Paulus a nfalak farane,
tomwat Yahudyar rti a rtate ain a ne ma rabangal.]