Suldadwar ror Paulus far Roma
27:1-12
1 Gubernur Festus nal tetetak feti ka kam mti Italia,
mpe nanrenre Paulus numur napyar ketnir ber suldadwar nir ulun sa ngarany Yulius.
Yulius ye ulun ber suldadu kompi lese ma rtar feti Kaisar ni Suldadwar.
2 Ne mfangat kaplar sa ma nof kote Adramitium.
Kabal a ne nose ma nal far loloyanir na propinsi Asia.
Ne maflolwain mor kabal a ne maktem tomwat Makedoniar sa ngarany Aristarkhus nof kote Tesalonika.
3 Ni bobole e,
kam mait kote Sidon.
Ma Yulius nose ngamone Paulus ma ninrang i ma nti nakmat tbwarnir na iane nema bise ral safe kabain ma nperlu a ne.
4 Nof a ne maloran mamy mpampane.
Nempa to msangal mal mnaur nof lury,
mpa malyole yampren Siprus ni ruap terik.
5 Ne mlanre kote Kilikia ma kote Pamfilia tila mait kote Mira na yampren Likia.
6 Na iane suldadwar nir ulun nsalan kabal nof Aleksandria nose ma nal far Italia,
mpa nfalak ma mti mfangat kabal a ne.
7 Mpe maflolwain nempa to manglwai mal fali msangal mnaur ma nawar kam desar ma lerar fir a ne betno mkeban kote Knidus.
Mpa maflolwain mof yampren Kreta balisya trangan ma malyole tutun Salmone.
8 Boloka malyole tutun a ne nempa lolone msangal mnaur ma nawar kam,
tila mait loloyanir sa nlosir kote Lasea,
ngarany Loloyain ma Nangafel.
9 Kam maflolwain dodo desar,
ma tomwat Yahudyar nir ler silai puase omp lo.
Iane nuse mengarat lo nwayat ma raflolwain e,
to nangafel.
Mpa Paulus nsurat sir farye,
10 “Tbwarngur,
kdwaun feti farlan taloran e,
keta tungan suse maberat ma kabanir na kabal ye rti letkape.
Fali keta to lan kabal numur muatnar ma rti bab,
nempa keta tmat a tbal.”
11 Nempa suldadwar nir ulun a ne to nalele Paulus,
ma nalele lan mangomat wilin ma tomwate ma ni kabal a ne.
12 Loloyain a ne to nangafel fali nait ma nuse mengarata e,
kaplar to rloi na iane.
Ma mangkaryayar na kabal a ne yadin ma ryoding ma raflolwain far kote Feniks ma ramin a ne terik ma nuse namlin.
Kote Feniks ye loloyanir sa na yampren Kreta,
ma to mnaur fali nfon far barat daya ma barat laut.
Mnaur uman na dol
27:13-38
13 Noak a ne mnaur nanrir namamasar nof trangan,
mpe mangkaryayar na kabal a ne rafliak feti bise ma raflolwain lo,
mpa rfair soar ma rafla ralyole rof yampren Kreta ni ruap terik.
14 Nempa to dodo a nbal e,
mnaur uman a nma.
Mnaur uman ye nma nof da far dol ma ka tomwatar rfalak feti,
“Mnaur Timur Laut.”
15 Ne mnaur a ne ntef kabal nwayat ma to nsangal nal,
mpa msalan lonri ma kabal nayeban.
16 Mpe mayeban tila mait yampren angkir sa ngarany Kauda ma nteri kam nof mnaur.
Boloka nawar kam a na iane nempa bise ma mfair skuti far kabal das.
17 Lama skuti nait das e,
rbebe kabal tenany ror talyar.
Ma rtolar lare nema rsalan lonri kabal ma nayeban fali ramtaut feti keta nangret a na sari na yampren Libia.
18 Ma ni bobole ne nuse ntafal ma mengarat,
mpa mangkaryayar na kabal a ne ryebas muatnar far tasik.
19 Ni bengdu e,
koko sir a ryebas a nbal kabal ni mparetar.
20 Ne lerar fir a ne to mkeban lere ma ftunar ma mnaur uman ntef dedesar kabal a ne mpa mdaun lan mamy mamate.
21 Ma lerar fir a ne kam to mtame.
Ne Paulus namdir ma nfalak,
“Tbwarngur,
farlan mlyarat ningw snyurtar ma kete tafla tof Kreta e,
to tungan suse ma kabanir to rlai farye.
22 Nempa lere ye ktwak mir kateman ma tafkoran dalminrar,
fali to fen lese nof kit ma tmat,
ma lan kabal ye ma namsos.
23 Yakw ye kswatngur ber Ratu ma kwarya ber I.
Lebabe e,
Ni malaekat sa nma namdir seringw,
24 ma nfalak,
‘Paulus,
kete mumtaut!
Fali keta ko e,
mtwi mumdir Kaisar sounlury.
Ma Ratu dalamy ngamone ber ko,
mpa tomwatar monuk ma ror ko a na kabal ye keta rmorip.’
25 Mpa tbwarngur,
kete mimtaut ma mifkoran dalmir!
Fali kulele feti Ratu keta nose kabanir monuk ye far ma nfalak ber yakw ne.
26 Nempa ninr kabal ye keta nangret a na yamprenar sa.”
27 Ma lere buti resin fat ye lo,
kam lolone mayeban na tasik Adria.
Ma nronram fetwalan e,
mangkaryayar na kabal a ne rafliak feti kabal sesedin da lo.
28 Ne ral tali la rkete bati ma rtuni ma rsar tasik lamany.
Ne ain a ne lamany fafa meter buty fatb.
To dodo e,
rsar a nbal,
ne ain a ne fafa meter buty tel.
29 Fali ramtaut feti keta kabal nangret na langer dasyar,
mpa rtolar sorar fat rof kabal mudy.
Ma rtak feti ka weni nanglawar.
30 Mpe mangkaryayar na kabal a ne rose ma rafla rof kabal mpa rose lole ma rtolar soar rof kabal lury safo rtolar skuti.
31 Mpene Paulus nfalak ber suldadwar nir ulun ma suldadwar na kabal a ne,
“Farlan mangkaryayar na kabal ye rafla rbie kabal e,
keta myat monuk.”
32 Mpe suldadwar a ne rtetak skuti ni tali,
mpa nayeban.
33 Ketla timur matan nangfuty e,
Paulus nluan ma kam monuk mtame.
Ma nfalak,
Tbwarngur!
Dedesar ma mdyaf myor dalmir suse mpa to mtyame lere buti resin fat ye lo.
34 Mpe ktwak ma mtyame fuky nema mimkoran fali keta to sasaf diat a kmi.
35 Lama nfalak farane e,
nal roti ma nose alang ber Ratu na sonirlury,
betno nasaman ber sir ma rane.
36 Mpe sir monuk a ne dalmir a ramkoran mpa rtame.
37 Ma kam monuk na kabal a ne tomwate raty du buty itw resin nem kam.
38 Lama mtame ma mabotan e,
mangkaryayar na kabal a ne ryebas monuk gandum far tasik nema kabal a ne mperane.
Kabal nangret
27:39-44
39 Noak ma nuse idak,
mangkaryayar na kabal a ne rsalan yamprenar sa,
nempa to rafai yamprene ne.
Ne rsalan tutun ni laran mpa rareke desar ma kabal a ne nangret a na iano.
40 Ne rtetak sorar ma rnau kalin na tasik dalam.
Ma rtolar wilnyar a nbal,
betno rfair lare na lury nema mnaur nanrir kabal a ne far da.
41 Nempa kabal a ne nangret a na sari,
ne kabal lury a nyasak knryai mpa to nawawan,
mpe ner silayar rtef kabal mudy ma ntakbinrar.
42 Suldadwar na kabal a ne rose ma rfen napyar monuk,
fali ramtaut feti keta ketnir rlur far da ma rafla.
43 Nempa suldadwar nir ulun a ne nose nteri sir fali nmpeang ma Paulus a nmorip.
Mpa nluan tomwatar ma rlur rafai ne ma rputuk a rbalun ma rlur far da.
44 Betno tomwatar ma to rlur rafai ne rluri kpawar nre kabal a ne singkir.
Ma to sasaf diat kam monuk terik ma mait da.