Iyyesuse Qhawho Lemtʼattaya Ghapamiisiki Alheesi
8
Iyyesuse ighuposinnu oodhina,
waarsho kisha Uso kaleema ashshi.
2 Xinkissana qhawho lamtʼe naqaghtiki okayipa na miinteema ghulladhu hasa na payu:
“Pogholho haayyu,
awwoʼa payni ye alheesesi aʼalkasnay.”
3 Iyyesusekka xarghghotakki shokki ghappadhuppa:
“Awwoʼaye alheesam.”
Na paayyuppa qhawhossi lamtʼe na qaghtika miinakalte alheesamu.
4 Xaysa tupettay Iyyesuse,
qhawhossinna hasinna payi:
“Oliisi yaxanukka inna qallu,
naqharray ashshapa kʼeesittonu he hiʼaasay,
alheesame thahu qhamu koro arrinu teexakkossi Muuse hayiisi itʼtʼoosay.”
Iyyesuse Kodhampakko Rafisampakko Dhippannakki Dhinisi
5 Iyyesuse xinkessi ashshipa kathama Kʼifrnahoomessa xullunna,
qhawho piyye Roomenna ho qhipampawhe dhippa rafisa Uso kula okayipa hasa paayyupa waathadhu:
6 “Pogholho haayyu,
kodhampakko haayyu thoththonipa isi uuma qootʼodhapa isi manneete rafa”
7 Iyyesusekka inna payina:
“An okaynapa dhinisa.”
8 Naqharray qhawhossi qhipampawhe dhippa rafisa hasi payipa nu holasu:
“Pogholho haayyu,
Atho manne haayyu kaleema xullenu ano qhawho gheeqasa qandhikka,
naqharray Atho patta olho thoʼoko payma kodhampako haayyu idhdhinaye.
9 Qhamusa kula anokka ho rafisampawhe haayunu haayyama,
qahamussa kula he anokka rafisipa isi ye eeʼe payakka iqaga,
usundhissana kittatte tookito:
‹Ashsha› kanapay payni iʼashsha,
tookitoka ‹Okay› kanapay payni iʼokaayya,
aylitho haayyukka:
‹Oliisi kodh› kannapay payni ikkodha.”
10 Iyyesusekka iqathisaasi apaqhina idhdhahxhxipa warshossi Uso kala ashshana hasa payu:
“Dhuke an hune qalli,
dhukkaysadhi hasaqaghiti dhammaasi koro Israeelatena kaki anu hiʼu.
11 Kulay an hunena payana:
waarsho kisha xayto oqhqhaye lighapa oqhqhaye xullana koru okaynapa Ahxase Moontitona Aprihaamepa Yisihaakʼe pana Yaykʼoope qale yiʼenu qakkadhu.
12 Naqharray koro Ahxase Moonthito nu gharsamti ghinte kalay thukkanko kitteema aʼusundhe yakni.
Xaytusanakka ooyepa ilghe illa qhume kodhdhamanna.”
13 Xaysa tupettay,
Iyyesuse rafisampakosi dhippanna hasinna payi:
“Ashshapa qhama dhukkaysatti kula ihho kodhdhita.”
Saathisay ihhasa na payina kodhampakossi huusukka idhdhini.
Iyyesuse Koro Kisha Ho udhdhamaasikki Dhinnisi
14 Iyyesuse ho Petʼiroosena manne kulakki ashshipa sooghitte Petʼiroose the thornottay pawwaqadhappa isi rafassa hxafoy.
15 Ixxargho naghappadhina tornossi inna sali,
haqippa olho usundhe gheeqasa nukodhi.
16 Xayto iʼawnuyina koro kisha ho nassidhdhe maghoomattay ghappamiisikki Iyyesuse kula okayettay;
Usokka nassidhdhesi maghoomaasi Kʼaalettaakki na lihhasipa koro udhdhama kaasaasikka dhinnisoy.
17 Olissaasi kodhettay hxuumassi hxuumampakko Isaayyaseb payina:
“Udhme haanisi Uso inena akkadhi,
qharaaro haanisikka inena dhooqhadhokki” dhikkadhi.
Rakkidhe Koro Iyyesuse Kala Ashshasa Hxafna
18 Iyyesuse koro kisha qhamu Uso kapeema illa holiisikki hiʼina,
kolladhampawhe huususi pasito afe koray qhamu tahxhxinenukki hayi.
19 Xaysa tupettay kollisampakko Hikkatte,
Iyyesuse kula okayipa hasa na payu:
“Kollisampako haayyu,
xayto Atho ashshinti kaasay kula anokka anho qale ashshina.”
20 Iyyesusekka hasi payipa nu holasu:
Kaqqalle hxohxonidhe ishsheeghe,
aaghe moonthitoka mannaadhe ishsheeghe.
Naqharray Ano Miʼaye qhawhito xayto anna hxaysanni kakki anu sheeghi.
21 Kolladhampawhatte kittatte tookko hasi payipa Iyyesusessi kasqadhu:
“Pogholho haayyu,
qharitteema qhama ashshinipa paappo haayyu maaayyasanu ye pay.”
22 Iyyesuse kapay hasinna payi:
“Atho ye kala okay!
He farresi hehuusunndhi farre qhamu maynenu hxur.”
Iyyesuse Qhamu Pimpe Hes Paasi
23 Iyyesusekka ikonko saappeema hadhdhina kolladhampawhe huusukka nakala hadhdheppa ashshonki.
24 Tutuppe pimpe haxay pasosisa haqipa kakantulame qandheetena haqti konkosi loqheemema itʼtʼuyu;
naqharray xinkisana Iyyesuse ippiʼaadhi.
25 Kolladhampawhekka Uso kulakki ittʼuyeppa haqisoonkipa hasa napayonki:
“Pogholho haani,
Ata kulay anhumaaniye ine pinnis!”
26 Usokka ina payina:
“Hune he dhukkaysadhe hunena qhacʼti,
ata moʼo hune tayipa isa ghaapanku?”
Xaysa tupettay ihaqi ururepa kakantulamessi qandheetesi qheeru,
olho kaasakka hes payu.
27 Korossikka dhahxhxuppa isihasa kodhdha:
“Ata Qhawhu pinpepa pasoka nuhayame ho malay?”
Iyyesuse Qhawho Lakki He Nassidhdhe Maghattay Ggappameesikki Dhinnisi
28 Iyyesuse afe korakki tahxhxipa piyye Gerkesoonenna hxafonna qhawho lakki he nassidhdhe maghattay ghappamekki xayto hawladhdheetenu lighipa naahxafonki,
qhooti maghawhe kodhdhe maallay qhawho onkisattay lighghe ye alkasi.
29 Usundhekka hasi payeppa riironki:
Ato Miʼaye Haallikkito Iyyesuse,
manhola sheeghni?
Xeere haani ye hxafonkinakki aʼine qootʼuyenu okayti?
30 Xaytusa usundhe qaghenna kaanta xayto okkotto sikaapana luumadhdhe kisha he koshadhakki qagha.
31 Nassidhdhessi maghakka hasi payeppa Iyyesusessi waathadhonki.
“Aʼine lihasna payni luumadhe irpankussa kora kitteema qhama ashshinaanippa yakamaaninu ine pay!”
32 Iyyesusekka inna payi:
“Ashshindha!”
Hussa maallay qhawho lakkissinna kittatte illigheppa ashshonki luumadhdhessi kitteema yakamonki.
Luumadhdhe irpantissa kaasay polle kata hayyonkippa qandhe kitteema loqhqhadhonkippa farroonki.
33 Hessi lumaadhe koshakka kathama kulakki ghoradheppa olho kodhdhamadhipa olho qhawho lakkissi nassidhdhe maghattay ghappamesa kodhdhamadhi kaasaasikka thorruyonki.
34 Xaysa tupettay koro kathamisana qaaka kaasay Iyyesuse eemenuki na kula okayipa hiʼunna qhamu piyye thuusundhina lighnipa ashshonukki waatadhe.