Iyyesuse Qhawho Nasso Magha Naqaghiisiki Dhinisi
5
Konkotakki paso Kalilanna tahxhxepa piyye Kersnoonena hxafoonki.
2 Iyyesuse konkito oodhinisittay qhawho toʼon ho nasso lokmadhittay ghapami haattay xayto hawleetena lighipa naahxafoy.
3 Qhawhu xayto hawleetena qaakaasi yaxakka siplettay shappepa gheyyase ye alkasi.
4 Kuyyaqqe dhamma siple luhheetepa he xarghgheetetakki ashapi,
naqharray siple xarghgheetesi iyuyutapa he lugheetesikka isi ghoghondha,
husannu qhawho usoosi ghape alkasa ye qaghikka.
5 Kuyyaqako kaasay awnepa kuyyaqate xayto hawlaadheetepa ghuppa qilla ye salu male isi aʼashshapa isi rirrira,
pishko huusuusi awrughettay isi hela qhitʼapa isi hela papaysheesa.
6 Usokka Iyyesusessi siikaapnoomi hiʼina nakulakki soripa kilpayye huusuttay ghulladhdhuppa nu sakatu.
7 Ikkitto dhammattay hasa payuppa riiru:
“Ato Miʼaye Haallikkossi Dhammana Iyyesuse!
Moʼo an hola sheeghi?
Qhamu athuyye qootʼuyintinu Haallikkotaakki an ho waathadha!”
8 Hussakka olhunna maallay hasa payi qhootina payipa:
“Ato nasso magha,
qhawhuna lighpa!”
qheeru maallay.
9 Iyyesusekka hasi payipa kasqadhu:
“Makaxko haahu yaxa?”
Usokka hasi payipa nu holasu:
“Ine he kisha maallay Lekewoonea ayela payi.”
10 Xaytusanakka qhamu ye usundhe ghorrinu uumi kokiseppa waathadhonki.
11 Xaytusana luumaadhe kisha irrpante ghadho kalaʼitha koshadhaki qagha.
12 Nassidhdhesi maghakka hasi payeppa Iyyesusessi waathadhonki:
“Qhamo an ashshinaanippa luumadhisa kitta yakamaaninu inne pay.”
13 Iyyesusekka innu payi;
nassidhdhesi lokmadhekka qhawhossina inna ligheppa luumaadhesi kitteema yakamonki,
irpantisanna luume the kuma lakki hxafna poolle kata hayyipa pasooma loqhqhadhoy.
14 Hessi luumaadhdhe koshakka ighghoradheppa ashshonki kathamaadhepa ghodhdhadheete olisaasi thorruyonki,
korokka olisa kodhdhamadhiisi eemenu mannadhdhe huusundhinu lighonkippa
15 Iyyesuse kula okayonkina qhawhossi nassidhdhe maghatta ghapami ho lallaadhdhe urkuyipa kʼalpekka nu holippa isi qakkadhasiki hiʼeppa ghaaponki.
16 Koro olisa qharaʼitha hiʼi olho qhawhossi nasso maghattay ghapamipa olho luumadheema kodhdhamadhi kaasaasi innu thorruye.
17 Hussa maallay Iyyesuse qhamu piyye thuusundhina lighnipa ashshonukki waathadhe.
18 Iyyesuse ikkonkooma xulleete qaghana qhawhossi qharro nassidhdhe maghattay ghapami hasi payipa waathadhu:
“Akko shooppe thaahu an ho qale ashshi!”
19 Naqharray Iyyesuse qhamu na qale ashshinisi ye woʼumma ina payi:
“Manne haahu kula qaakapa qhamu Pogholho olho mala ghaqi dhamma ho kodhipa hxurakko ho hiʼasusa ahxke haahunu thorruyay.”
20 Qhawhossikka olhossi dhaqamma Iyyesuse nu kodhiisi piyyessi Kathama-Hudhdhanb ana payisaki thorruye paayi;
koro apaqhi kaasakka dhahxhxu.
Shette Iyyaʼirooseppa Xiskatho Laalle Iyyesuse Ghappadhiti
21 Iyyesusekka ihholipa konkottay pasito afe koray tahxhxuna,
waarsho kaasakka Uso kapeema illa holi,
xinkisana Uso passito kaantakki qaghi.
22 Xaytusana hessi rafisampawhe manne ghissoote koro Ayhutattena kittatte qhawho tookko ana payi Iyyaʼiroose Iyyesusessi ihhiʼina luhhe kaleema inna ranipa hasa na payuppa uuma waathadhu:
23 “Akko,
shette thaayyu takkayaki yela faraye qhamu dhiniintipa qaghottay qaakonu akko shoppe thaahu,
okayipa xarghgho haahuusi na saappa ghapadhay.”
24 Iyyesusekka isi na qale ashshana koro kisha na qale ashsha maallay xayto ina kaaʼitha hillise.
25 Xaytusanakka xiskatakko tootte the perko 12 saasa kʼeeqhte na eltiki qagha.
26 Akimitto tookkonu tookko kula ashshetta qootʼo dhamma hiʼippa kodhaththe thiisi kaasaasikka poghghi;
naqharray inna naqapa isi ashsha dhiisho dhine ye alkasukka.
27 Isseka qhooti ote Iyyesuse apaqhti maallay,
waarshossi ille hillisana kitta korukki okaytipa konnata koru laalle Thuusuna kayle ghappadhi.
28 Olhuna maallay hasa kotti;
“Laalle Thuusu pattakki anna ghappadhini payni an dhinna” qhooti paytipa dhukkaysadhi maallay.
29 Kʼeeqhtessi na elakka haattakki na shikkaartipa qhamu udhanko hiisina dhintisa pishko hiisina upadhi.
30 Iyyesusekka haattay qhamu humna Usona lighiisi ihhela arripa waarsho kula laaghghamuppa na payu:
“Yaxa yela laalle ghappadhi?”
31 Kolladhampawhe huusukka inna paye:
“Waarshu hasa ille dhuukaasi inna hiʼanaki payti ‹Yaxa ye ghappadhi?›”
32 Usokka qhamu yaxa olisa kodhi arenu illaghghammipa eemoy.
33 Naqharray xiskatosikka olho iseesi kodhamadhiisi qhooti arti maallay immurrukti xootoladhippa nakala ranippa dhukessi nu kodhdhamti kaasaasi nu thorruyi.
34 Usokka inna payi:
“Miʼaye thayyu,
dhukkaysadhe thaahi ihhe dhinistiye nakayhottay ashsha,
qootʼo haahina ahxaysattiye.”
35 Iyyesuse ihhaannay olisaasi qalladhana koro ho rafisampakosi manne ghissoote koro Ayhutattenu okayi,
Iyyaʼiroosena hasa na payonki:
“Kulay miʼaye thaahu iffartina moonuka thaythe kollisampakko rakkisti?”
36 Naqharray Iyyesuse iqqallithisaasi apaqhina yena dhihadhumma Iyyairoosena inna payi:
“Atho olo ghaapima dhukkaysadh.”
37 Iyyesuse,
Petʼiroosepa Yaykʼoope pana qaso huusu Yohannise malettay yaxakka qhamu Uso qale ashshini ye woʼukka.
38 Immane Iyyairosenna xafina Iyyesuse koro ho wacʼacʼapa isi riirapa isi ooyasiki hiʼi.
39 Manne kala xulluppa hasana payu:
“Wacʼacʼipa ooyi kaasay he moyto kodhdhamadha?
Miʼayi kulay ippiʼatima ye faruy.”
40 Korossikka dhafkotakki na kishshaqi.
Naqharray Iyyesuse korossi manneete kala qagha kaasaasi illihasipa paappopa yaaye miʼayaate pana hessi Uso qale qaghaasi he kula ooquppa xaytossi miʼayisa na qaghti kula xullu.
41 Shettesina xarghgho ghapuppa na payu:
“Tʼalita kʼumi” Hussa payyo pako Aramaykatetayc “Ato shetti,
haqa payyo.”