Iyyesuse Qhamu Qhawho Thottooni Dhinisi
9
Xaysa tupettay Iyyesuse konkottakki pasito tahxhxipa kathama huusuna hxafoy.
2 Haahakka koro qhawho thottooniisi tʼarfettay dhooqhipa Uso kula okaasuy.
Usokka dhukkaysadhe thuusundhiisikki na hiʼipa qhawhossi thottoonina hasa payu:
“Haay,
atho miʼayi olo ghaapima cʼuppo haahu ihho hxuramiye.”
3 Xinkissana kollisampawhe Hikke Muusenna kittatte tookke tookke hasi payeppa isi saqqe kittekata dhihadhanki:
“Kulay qhawhu Haallikkoosiki dhaghghisi.”
4 Iyyesusekka dhihattootte thuusundhisikki inna aripa hasa na payu:
“Moʼo maallakki assaqqe haahundhina olho magha dhihatte?
5 Keenni ‹Cʼuppo haahu ihho hxurami paye› taakkinti ‹Haqapa ashshoy› payeete qallitisana tinkaki na woyya?
6 Naqharray Ano Miʼaye Qhawhito piyyina saappeete cʼuppo hxurasenu qhama humna rafisatte sheeghisa an hune arasi” kippayipa qhawhossi thoththoonina hasa payu:
“Haqpa tʼarfe thaahu dhooqhadhoppa manne haahu kula qaakkoy.”
7 Qhawhossikka ihaqipa manne huusu kula qaakoy.
8 Waarshosikka iʼolissasi hiʼina idhdhahxhxipa Haallikkossi humna rafisatte hasa ligha koronu teexasi kaanasu.
Ooqame Maatiwoose
9 Iyyesuse ixaytusana lighghana qhawho kʼaratʼtʼo sooqa Maatiwoose ana payi ho xayto kʼaratʼitona qakkadhasiki hiʼipa hasa na payu:
“Ye kala okay!”
Usokka haquppa nakala ashshoy.
10 Iyyesuse ihho Maatiwoosenna manneete yiʼo yiʼana koro kʼaratʼtʼo sooqapa cʼuppolawhe okayipa Usopa kolladhampawhe huusu qale yiʼo yiʼenu qakkadhonki.
11 Feresawaadheka olissaasikki hiʼeppa kolladhampawhe huusuna hasa payoonki:
“Kollisampakko haahundhi moonukki koro kʼaratʼtʼo sooqapa cʼuppolawhe qale yiʼo yiʼi?”
12 Iyyesusekka qallithe thuusundhiisikki apaqhipa hasa na payu:
“Akimito koro udhdhamanu dhiishay koro xeesoomanu ye gheeqasika.
13 Ashshindhapa kʼaalessi iyyana ‹Ano hxurakko awoʼi dhiishay teexakko qandhikka›a qhoththusadhankupa aronku.
Ano olhannu okayi he pare qaghanu qandhimma cʼuppolawheesi karo Haallikkito holasenu.”
Kasqo Yiʼo Male Ghissadhe Kaʼita itʼtʼuyi
14 Xinkissana kolladhampawhe Yohannisekki Iyyesuse kula okayipa hasa payoonkippa Uso kasqadhonki:
“Inepa Feresawaadhdhe kuyyaqko kaasakki ayyiʼo male ghayyini,
naqharray kolladhampawhe haahu momallakki qhamussa kula ye kodhe?”
15 Iyyesusekka hasi na payi:
Akkampako iʼusundhe qale qaghana uyyattadhe azane iʼalkasna?
Naqharray kuyyaqako akkampakusa na kaanta akamniki okayna,
xinkisana yiʼo male ighisana.
16 Qhawho laalle keeshshatteema muuqhatte qhawthite muuqha ye qaghi,
hasi kodhi payni muuqhatte qhawtitisay laalle keeshatisaasi ikkaaqanappa kaaqanisaka uuma ghandhaqi.
17 Qhamusa kula qhawho surpo keeshshakkooma tʼayye woynatte madhdheesi tiigha ye qaghika,
naqharray hasi kodhi payni,
surpussa ikʼkʼoʼona,
tʼayye woynattekka tuqhqhamoy;
surpusakka ixxarkishamna.
Naqharray tʼayye woynatte maadhdheesi surpo qhawthitooma atiighi,
onke hasa lighattay lakkintoy he xeesakki kodhdhine.
Mi’aye Iyyaʼiroosepa Xiskathossi Laalle Iyyesuse Ghappadhiti
18 Iyyesuse ihhannay olissaasi nuthorruyana,
rafisampakko manne ghissoote koro Ayihutattenakki Uso kula okayipa luhhe kala naranuppa hasa na payu:
“Akko kulay miʼaye thayyu yela fariye okaypa xarghgho haahuusi nasaappa ghapadhamma idhdhinnay.”
19 Iyyesusekka ihaqipa kolladhampawhe huusu illay naqale ashshoy.
20 Iʼonkatte qaghana xiskatho toʼon the perko 12 kʼeeqhte na eltikki okayipa konnatho koru kayle laalle Thuusuna ghappadhi.
21 Isekka saqko hiisittay:
“Laalle thuusu pattaakki an ghappadhini payni andhinna.”
Qhooti paytipa dhihadhoy maallay.
22 Iyyesusekka illaaghghammi ise eemmuppa hasa na payu:
“Haay,
miʼaye thayyu,
dhukkaysadhe thaahi ihedhinisti” Xiskathosikka sathisana idhdhinti.
23 Xaysa tupettay Iyyesuse ihqqhawhossi manne ghissoote koro Ayihutatte rafisana manneete hxafina koro sootaadhe yoqhapa koro riirapa isi ooyasikki hiʼi.
24 Usokka hasinna payi:
“Xaysanna ligha;
miʼayyi kulay ippiʼaatima ye faruyye!”
Naqharray usundhe inna kishshaqe.
25 Korossi illighi tupettay,
Iyyesuse manne miʼayessi nakaalla qaghti kaleemi xullipa xarghgho naghapunna,
isekka ihaqati.
26 Olissa kodhdhamadhikka piyyaadhisa xaysa kaaʼita qagha kaasakki qhaskadhi.
Iyyesuse Taafawhe Lakkipa Qhawho Muumisi Qhamu Dhinisi
27 Iyyesuse iʼhaqipa isi ashshana,
qhawho lakki taafawhe hasa payapa isi riirapa isina kala ashsha:
“Miʼaye Thaawite,
maʼala ine qhararsadh.”
28 Iyyesuse immanne kala xullina taafawhessi Uso kulakki okaye,
Usokka hasi na payi:
“Oliisi qhamu an kodhe alkasisa adhukkaysadhanku?”
Usundhekka hasi payeppa nu holasonki:
“Ee,
Pogholho haani.”
29 Xaysa tupettay Iyyesuse ehxhxe huusundhiisi ina ghappadhipa hasa na payu:
“Qhamo dhukkaysadhe taahundhisa ihune kodhdhita.”
30 Ehxhxe huusundhikka naqhaashamonki.
Iyyesusekka ikkokisipa na payu:
“Oliisi yaxanukka olo qalle.”
31 Naqharray usundhe iʼashsheppa olhossi Iyyesuse nukodhiisi piyyaadhdhe xaysa kaaʼitha qagha kaasay thorruyonki.
32 Korossi ehxhxe naqhaashame illighipa ashshonna,
koro pile qhawho nasso maghattay ghapamipa mumuusi Iyyesuse kula okaasi.
33 Nassossi maghaka inna lighi tupettay qhawhossi muumikka qalladhe paayyu.
Waarshokka:
“Oli hasa ligha piyye Israʼeelattena hagha kuyyu saasa olo hiʼu!”
Kippayipa dhahxhxu.
34 Naqharray Feresawaadhdhe iʼiyyankina:
“Kulay Uso rafisampakko nassidhdhe maghattakki nassidhdhe magha lihasi.”
Iyyesuse Qhamu Waarsho Qhararsadhi
35 Iyyesusekka mannaadhdhe huusundhi ghissootattena kallaki kollisipa otesi xeesa Ahxase Haallikkitona isi thorruyapa qhararopa koro udhanko pile pilettay udhdhamaasikka isi dhinnisapa kathamaadhepa ghodhdhadhe kaasay isi aʼashsha.
36 Naqharray iwwaarshoosi eemina qeemme koshshito dhapeppa hxurmadhonkippa isi rakkadha kula qhooti kodhdhe maallay iqhararsadhi.
37 Hussa maallay kolladhampawhatte hasi na payi:
“Lammi ghimakko ikkisha,
naqharray kodhampawhe ghimakusana he qhacʼa.
38 Hussa maallay Pogholho ghimakito kodhampawheesi qhamu ghimakko huususa padhawnipa erakunu waathadha.”