Xiskesi Iyyesuse Kalla Ashsha
8
Xaysa tupettay Iyyesuse Ahxasesi ote xeesana katamaadhepa ghodhdhadhe kaasay inni torruyanaki lighi.
Kolladhampawhe hudhdhanpa lakkisika Uso qalli qaghe.
2 Qhamusa kula xiske tookke tookke henassidhdhe maghooma nalighe pana he udhankito dhinnepa isi Iyyesuse qale ashshaki qagha.
Usundhisana kittatte tootte xiskaththosi nassidhdhe maghooma taxxan na lighe,
tessi piyye Mektelanu okayti te ana Mariyaame payi.
3 Qhawhossi manne Herodiisena hayo haya Kuuza ana payina naxaye tuusu:
Yohaanapa Sosina pana xiske pilawhe hekishaki qagha,
usundhisakka Iyyesuse pana kolladhampawheesi olho ishsheeghetakki nu kodhadhe.
Lighno Pooxampakito
(Maat. 13:1-9; Mar. 4:1-9)
4 Waarsho kisha iʼilla holipa korokka xayta xaytanu isi Uso kula okaayana Iyyesuse hasi payipa lighnuusi nu qallu.
5 “Pooxampako poodhaxo pooxenukki pasho kula soofipa ipoodhaxo pooxana poodhaxakko tookko tookko onkatte hinaseemi hayyipa alughettay oghu,
aaghe moontito sooqonki.
6 Poodhaxo hubhakka moqhorkoomi hayyi,
iffuʼina piyye qhooti yekʼapti maallay ishshaʼi.
7 Poodhaxo hubhakka qhatʼme kitteemi hayyi,
qhatʼmisaka na ghohippa hekala haqhasi.
8 Poodhaxo hubhakka piyye kufkitosi hayyipa fuuʼu,
ighghohi tupettay xarghgho dhippa lakki awshi.”
Nakaleemakka Iyyesuse hasi payipa riiru:
“Qhawho qhaame apaqha sheegha iʼapaqha!”
9 Kolladhampawhesi huusukka hasi payeppa Uso kasqadhonki:
“Lighnuna ishghe tuusu moʼo?”
10 Iyyesusekka hasi payipa nu holasu:
“Huneesi qashshatte Ahxase Haallikkito bhadhamti are ihune teexamti,
naqharray tookke ‹iʼeemankima yehiʼe,
iʼapagha ye hela taaye› a hussa mallaki alighnottay nu qalli.”
Lighno Pooxampakitona Ishighe Tuusu
(Maat. 13:18-23; Mar. 4:13-20)
11 Lammi ishghe lighnusana husi:
“Poodhaxusaka Kʼaale Haallikkito,
12 poodhaxussa onke hinaseema hayyikka korossi Kʼaale apaqhasapa na qharray qhamu ye dhukkaysaneppa dhinonkinu haattay Orriththo okayapa Kʼaalesi saqakito isinna akki.
13 Poodhaxusa moqhorkkooma hayyikka korossi Kʼaale apaqhasapa hattay hxasoottay dhukkaysadhuusikki hiʼaasi,
usundhekka kuyyaqe qhacʼasa patta dhukkaysadhepa isi xise ye sheeghe maallay kuyaqaku temmate naʼokaytina imarmadha.
14 Poodhaxakusa ghusakko qhatʼmatte kitteema puqqikka korossi Kʼaalesi haamakata apaqhasasikki hiʼaasi,
naqharray qagho piyyinu dhihaadhepa shorokunkopa hxaso piyyitakki loqhadheppa yeawshonkina isihasa haqhe.
15 “Naqharray poodhaxakusa piyye xeesasa puqqi korossi saqako xeesapa saqakko dhukkatettay Kʼaale apaqhasapa isi tiqitadhasikki hiʼaasi,
usundhekka he dhupaytettay kokisadhapa isi awsho awshanki.”
Lighno Hammakko Haahana
16 Nakaleemakka Iyyesuse hasi payi:
“Qhawho hammakko hammasapa isinna shanghe qhupapa taakinti hoore kalaʼita qadhdha yaxakka ye qaghi;
laadhdhi koro manne kala xulla qhamu xayto hiininu hammakkoosi xayto armadha sappeematte axawwadhi.
17 Moʼo malla payni ho bhadhamipa isi yearmadhi,
hohe mughisipa isiyearami moʼokka ye qaghi.
18 Lammi mala qhama apaqhastesa he tiqitadhindha,
ho sheeghanu anaanu padhawna,
naqharray hoye sheeghina hossi iyyina ansheeghasikaki ana akkina.”
Yayye Iyyesusepa Qassawhe Huusu
(Maat. 12:46-50; Mar. 3:31-35)
19 Yayye Iyyesusepa qassawhe huusuki xaytosi Uso naqaghi kula okayi,
naqharray waarsho qhooti kishi maallay Uso kula itʼtʼuye ye alkasonki.b
20 Korossi xaytusana qaghana kittatte qhawho tookko hasinna payi:
“Kulay yaayepa qassawhe haahuki ghinteema shikkaaripa isiho hiʼe woʼa.”
21 Usokka hasi payipa nuholasu:
“Koro Kʼaale Haallikkitoosi apaqhasapa issi kodhdha usundhisaki yaaye thaayyu pa qassawhe haayyu.”
Iyyesuse Qhamu Bimpesi Paso Kakantulaasi Hess Paasi
(Maat. 8:23-27; Mar. 4:35-41)
22 Iyyesuse kuyyaqako tookko kolladhampawhe huusuna hasinna payi:
“Konko sappeema hadhdhinipa kora pasito afe koray tahxhxini.”
Usundhekka ashshankooma haqonki.
23 Iʼpaso sappaʼita konkosittay ashshankina Iyyesuse ipiʼaadhi,
xinkisana pimpe haxaki pasoosi sappeema paayyadhi,
qandhekka qhooti konkosi kitteema hoqhqhe paayye maallay uumatti ghaape.
24 Usundhekka Iyyesusena hasina payeppa hakisonki:
“Akko Kollisampako haani,
Kollisampako haani,
kulay anhumaani!”
Usokka ihhakipa pimpesippa qandhesi kakantulamaasi qheeru,
usundhekka hattakki saleppa hess payonki.
25 Xaysa tupettay Iyyesusekka kolladhampawhessina ina payi:
“Emma dhukkaysadhe taahundhi aha?”
Naqharray usundhe qhooti uuma ghaape maallay hasi illena papaye:
“Ata husi pinpepa qandhe kakantulamakka nu hayame yaxa?”
Iyyesuse Qhawho Nasso Maghattay Qapamiisi Qhamu Dhinisi
(Maat. 8:28-34; Mar. 5:1-20)
26 Xaysa tupettay piyyessi paso Kalilanna afe koray qagha piyye Kerkesoone kulaki kokotta tahxhxe.
27 Iyyesuse ikkonkosina oodhina qhawho Nassidhdhe magha naqagheki katamanu lighipa naahxafoy,
qhawhu perre kisha lallaadhdhe ye urkuyunna heneqitti xayto hawladhdheetena qaakima manneete ye qaaki.
28 Iʼiyyesusessi hiʼina uumatte irriiripa naminta ranuppa ikkitto dhammattay hasa payu:
“Ato Miʼaye Haallikkossi Dhammana Iyyesuse,
manhola sheeghi?
Akko maʼala oloye qootʼuyi”
29 Nasso maghakusa olhuna maallay riirikka qhawhusana qhamu lighninu Iyyesuse qhooti qheeri maallay.
Xaysa qharaʼita kuyyaqako kaasakki nahahaki maallay xarghghepa lughghe huusuusi sipletakki ana shapipa isa tiqadha.
Ikkodhdhitama kapay siplisaasi ighoghondhapa isi yuyuuta;
holuppa iʼakkapa xayto kaare yena fuuʼe kula isi ashshayattay.
30 Iyyesusekka hasi payipa kasqadhu:
“Makaxko haahu yaxa?”
Usokka qhooti nassidhdhe magha hekisha naqaghe maallay ina payina:
“Makaxakko haayyu lekewoonec.”
31 Nassidhdhesi maghakka hasi napayeppa uuma waatadhonki:
“Akko maʼala hxohxunossi uuma hxahxad kata olo ine yaki”
32 Xaytusanakka lumaadhdhe kisha irpante he ghupo takkayya kalaʼita koshadhaki qagha,
usundhekka qhamu ashshineppa luumaadhdhissa kitteema yakamonkinukki Iyyesuse waatadhe.
Usokka innupayi.
33 Hussa maallay nassidhdhesi maghaka qhawhossinna inna ligheppa ashshonki luumaadhdhesi kitteema yakamonki,
irpantisakka polle kati hayyeppa paso kitteema loqhqhadhonki.
34 Hessi luumaadhdhe koshakka olhossi kodhdhamadhiisi ihiʼenna ighghoradheppa ashshonki katamapa ghodhdhadheete torryonki.
35 Korossikka olhossi kodhdhamadhiisi hiʼenu xaytu qaghinuki lighipa Iyyesuse kula okayu;
qhawhossi nassidhdhe magha nalighekka holallaadhdhe urkuyipa kʼalpekka nuholippa isi lughghe Iyyesusenna kalla qakkadhaasi ihiʼenna ighghaape.
36 Koro qhawhossi nassidhdhe magha naqaghe qhamu mala dhinisa hiʼikka korossi okayinu innu qalli.
37 Xaysa tupettay koro piyye Gerkesoone kaasay qhooti uuma ghaapi maallay Iyyesuse qhamu piyye tuusundhina lighnipa ashshonukki waatadhe.
Husamally Iyyesusekka konkomi hadhdhipa xaytossi innuokayi kula ashshoy.
38 Qhawhossi nassidhdhe magha nalighekka hasi payipa Iyyesuseesi waatadhu:
“Anokka anho qale ashshi” Iyyesuse kapay hasinna payipa laaghghu:
39 “Manne haahu kula qaakapa Haallikko olho malaqaqiti dhamma iho kodhiisi koro kaasannu torruyay” qhawhossikka olhossi dhaqamma Iyyesuse nukodhiisi koro katamana qaaka kaasannu inni torruyana ashshoy.
Miʼaye Iyyairooseppa Xiskathosi Iyyesusena Laalle Ghappadhiti
(Maat. 9:18-26; Mar. 5:21-43)
40 Waarsho kaasakka Iyyesusessi qhooti tiqitadhi maallay ina kula hollina hxasotakki akkadhi.
41 Kuyyaqakusana qhawhossi manne ghissoote koro Ayhutattena rafisampakko kodhdhi Iyairoose ana payiki Iyyesuse kula okayipa luhhe huusu kaleema ranuppa qhamu manne huusu kula okayninu waatadhu.
42 Olhunnu waatadhikka,
miʼaye tuusu tootte te perko hudhdhanpa lakkina qhooti na udhamtipa isinna fara maallay.
Iyyesusekka iqhqhawhossi qale ashshana koro kisha nakala ashshapa isi ille hillisapa isi ille dhudhuuka.
43 Xaytusanakka xiskatakko toʼon teperko hudhdhanpa lakki kʼeeqhte na eltiki qagha,
isekka olhu sheeghti kaasaasi akimeemi hela poghghiti,
naqharray yaxakka yeʼise dhinise alkasukka.
44 Isekka Iyyesuse kulakki okaytipa konnatta koru nakapa xighghipa kayle laalle Tuusuna ghappadhina kʼeeqhtesi na elakka hattakki nashikaarti.
45 Iyyesusekka hasi payipa kasqadhu:
“Qhawhusa yaxa yeghappadhi?”
Usundhe kaasay ina payenna:
“Iniho ghappadhooni” Petʼiroose kapay hasinna payi:
“Kollisampako haayyu,
waarshu qhamu iʼille hillisipa isi hokala ashshaasi inna hiʼanaki appaytina ‹yaxa ye ghappadhi›?”
46 Naqharray Iyyesuse ina payina:
“Qhamu haxno yela lighisa qhoota anhela arri maallay dhukkeema qhawho yeghappadhi.”
47 Xiskathosikka qhamu bhadhame ye alkasusa ihela artipa ini xotoladhana okayi nakala rani.
Xaysa tupettay qhamu moonu ghappadhitipa malaala haattay dhiniisi koro kaasay miinteema helathorruyi.
48 Iyyesusekka ina payina:
“Miʼaye thaayyu dhukkaysadhe taahi ihhe dhinistiye!
Nakayhottay ashsha.”
49 Iyyesuse ihaana olissaasi qalladhana qhawho tookko horafisampakko manne ghissoote koro Ayhutattenu okayipa Iyyairoosena hasa payu:
“Kollisampakosi tayte olorakisima kulay miʼaye taahu iffartiye.”
50 Iyyesuse kapay iʼolissaasi apaqhina Iyyairoosena hasinna payi:
“Ato olo ghaapipa dhukkaysadhama miʼaye taahu idhdhinaye.”
51 Iyyesuse immanne Iyyairoosena hxafina Petʼiroosepa Yohannisepa Yaykʼoopepa paappopa yaaye miʼaayyatte malettay yaxakka qhamu Uso qale manne kala xullininu ye woʼukka.
52 Koro xaysanna qagha kaasakka qhoota miʼayisa farti maallaki “Woyyo woyyo!”
payipa isi ooya.
Naqharray Iyyesuse inna payina:
“Olo ooyemma miʼaye kulay ippiʼaatima ye faruyye”
53 Naqharray usundhe miʼaysay qhamu fartisa qhooti are maallay dhafkotakkiina kishshaqe.
54 Iyyesuse shettesinaki xarghgho ghapipa hasa napayu:
“Ato shetti haq.”
55 Isekka qhooti napse nu holti maallay miinakalte ihhaqatipa shikkaari,
Iyyesusekka ina payina:
“Olhu yiintiisi nuteexa”
56 Ahxke shettesinaka,
naqharray Uso oli kodhdhamadhiisi yaxanukka inna qallonku kinna payipa usundhe hayu.