Iyyesuse Qhawho Xarghgho Nathoonisiki Dhinisi
3
Kuyyaqako pile Iyyesuse manne ghissoote koro Ayhutattesa ixxulli,
haahaka qhawho tooko ho xargho nathooni qagha.
2 Koro ho Iyyesuse dheehenu gheeqa hasi kodhdhipa isi tiqithadha:
“Into eemni,
ata kuyyaqako hxaysinkitonaki dhinisni?”
3 Iyyesusekka qhawhossi xarghgho natoonina inna pay:
“Okayipa xaysa shikkaaray.”
4 Iyyesuse hasi payipa usundhe kasqadhu:
“Emma keeni kuyyaqako hxaysinkitona ho payami olho xeesa kodhem ho magha?
Napse dhinisem patise?”
Naqharray usundhe ikʼkʼampaye.
5 Iyyesusekka saqqe huusundhi hena fafe qhooti kodhdhe maallay iʼazanipa koro nakaaʼitha qaghaasi miirattay eemmuppa qhawhossina hasa payu:
“Into,
xarghgho haahu gheteʼis!”
Usokka igheteʼisina xarghgho huusu idhdhini.
6 Fersawaadhdhekka illigheppa Iyyesuseesi qhamu mala paasineppa patisonkiisi koro Herotiisea qale suladhe paayyonki.
Waarsho Passito Hinaseemi Iyyesuse Kapa Illa holi
7 Iyyesuse kolladhampawhe huusu illakki passo kula ashshi.
Koro uuma kisha piyye Kalilappa Yihutannu Uso kaleema ashshoy.
8 Koro olhu Uso kodhi kaasaasi iʼapaqhina piyye Yihutannu,
the Iyyerusaalemenu,
the Etomiyasenu,
piyyaadhe kolle Yortanoosenna afeete qagha pana kathama Tʼirooseppa ho Sitoonanu Uso kula okayi.
9 Waarsho qhooti uuma naqi maallay qhamu Ye uso hillisnenu konkosi qhamunnu gharisnepa nu itʼtʼosoonkinu kolladhampawhe huusuusi hayi.
10 Koro kishasikki udhankito dhiinisi maallay koro udhankottay qootʼuyama kaasay qhamu xarghghe huusundhittay ghappadhinenuki woʼepa isi rakkisanki.
11 Nassidhdhe maghumakka Iʼuso hiʼe payni irrirapa isina miinta raranapa isi hasa payanki:
“Ato Miʼaye Haallikkito!”
12 Naqharray Uso yaxa qhamu kodhdhisa yaxanukka qhamu ye qallinenukki kokisipa usundhe hayu.
Iyyesuse Qhamu Erkampawhe Hudhdhanpa Lakkisi Qholadhi
13 Iyyesuse ighghupo kula hadhdhina hessi cʼikadhisi he kulakki ooqi,
usundhekka nakula itʼtʼuyoonkippa
14 qhamu Uso qale kodhdhineppa kollisuppa usundhe erakunu 12si na qholuppa erkampawhe na payuppa makaxu.
15 Holuppa qhamu nassidhdhe maghoomaasika lihhase alikkanenu ghulno nu teexu.
16 Erkampawhessi Iyyesuse qholadhikka hisi:
Simiʼoonessi Petʼiroose na payipa makaxu,
17 dhelle Zeptiwoose:
Yaykʼoopepa qaso huusu Yohannise,
hessi Poʼanerkese napayipa makaxu (hussa payyo Miʼaadhe Ghawwaqikito),
18 Intriyaasepa Filipʼoosepa Pertʼelemewoosepa Maatiwoosepa Tomaasepa miʼaye Ilfiyoose Yaykʼoopepa Tatewoosepa Simiʼoone Yookkampakkossi pana
19 Askʼoronthu Yihutassi Iyyesusessi likkasipa teexu.
Iyyesusepa Piʼelzepule
20 Iyyesuse immanne kalla xullina waarsho kisha holipa illa holu maallay Usopa kolladhampawhe huusu yiʼo yiʼekakki ye alkasonki.
21 He dhaliththo Iyyesuse kodhdha qallithe the iyya isaaroodhi qhooti apaqhe maallay Uso ghapenukki xaytu qaghi sasa nakala okaye.
22 Kollisampawhe hikke Muusena Iyyerusaalemenu okayekka hasi paye:
“Usona Piʼelzepuleb na qagha,
nassidhdhe maghaasikka rafisampakko nassidhdhe maghattakki lihhasi.”
23 Iyyesusekka he kulakki usundhe ooqipa lighnottay hasa payuppa usundhe kasiqadhu:
“Seetʼana mali hollipa Seetʼanaasi lihase alkasu,
24 Ahxase tootte ille qhoqhootapa isi ille pappaxa payni dhikitepa shikkaare ye alkasinti.
25 Qhamusa kula ahxke tookke ille qhoqhoota payni ille qale qaake ye alkasne.
26 Seetʼanakka qhamussa kula iʼille qhoqhoota payni ippanna male qaake ye alkasnikka,
dhikkatte thuusukka inna hxafti payyo.
27 “Hussa maallay qhawho qharritteema tannapkoosi ye shapunna manne tannapkitosa xullinapa olhu sheeghiisi na sare alkasu ye qaghikka,
naqharray ishshapi tupettay sareesi iʼalkasna.
28 “Dhukke an hune qalli,
cʼuppo miʼaadhe qhawhito kodheppa dhaghisto kaasay innu hxuramna;
29 naqharray qhawho Nasso Kʼulkʼullooma dhaghsaththo qalladhi kaasannu ita cʼuppo perre ye hume sheeghenaki nu kodhdhini dhishoy moʼokka payni yenu hxuramni.”
30 Iyyesuse olhu na maallay hasa payi:
“Nasso magha hola qagha” qhootinna paye maallay.
Yaayye Iyyesusepa qassawhe huusu
31 Xaysa tupettay yaayyepa qassawhe huusuki uso kula okkayipa ghinteema shikkaaronki,
qhawho na erakkonkippa ooqasonki.
32 Koro nakaaʼitha qakkadhaka hasi payupa nu qallu:
“Kulay yaayye thaahuppa qassawhe haahuki ghinteema shikkaarippa isi ho gheeqa.”
33 Usokka hasi payipa nu holasu:
“Yaayye thaayyu yaxa?
Qassawhe haayyukka koro yaxay?”
34 Korossi nakaaʼitha qakkadhaasi eemoppa hasa payu:
“Yaayye thayyupa qassawhe haayyu hisi,
35 qaso haayyupa alawte thaayyu pana yaayye thaayyu qhawho woʼoko Haallikkito kodha kaasay.”