Hepaseesate Kalla Hetiqitadhe
(Maat. 10:26-27)
12
Xinkissana waarsho uuma kisha qhooti illa holipa naqu maallay iʼille dhudhukapa isi ille ogha.
Usokka iʼintoosipa kolladhampawhe huusuna hasa paye payu;
“Qharriteema haqasiso Feresawaadhdheetena kalla he tiqitadhindha,
hussa payyo pasaste.
2 Hobhadhamipa isiye armadhi,
hohe mughisipa isiye arami moʼoka ye qaghi.
3 Hussa maallay olho atukankito qallatte hammakkoʼita iqhaskanni,
olho ammanneete kala xashxashtettay qallatekka liqqakkoʼita ittorruyamni.
Qhawhoosi ghaape Qhamu Yegheeqasti
(Maat. 10:28-31)
4 “Hune dhalitto haayyu,
hasa anhunena payi,
he sakanko patta poghapa xaysana kutay olho pileesi kodhe isiye alkaseesi ologhaape.
5 Naqharray qhamu yaxaasi ghaape hune gheeqastiisi anhune qalla:
hussakka Haallikkosi ipoghi tupettay karo hatte Kahanematesa kʼurenu humna sheeghaasi patta ghaapindha.
Ee,
anhunena payana Usoosi patta ghaapindha!
6 “Purrayitte hxupiniisi pakkana lakkisa alasi qaandhi?
Ikkodhdhitama kapay usundhissana kittatte purrayite toottekaki Haallikkito miintatte ye taymootamti.
7 Kulay hunena kasusa pukkaqatekaki hodhihami,
lammi hune olo ghaapemma xorto haahundhi purraye kishanu ighulaye.
8 “Anhunena payana:
qhawho qhoota Ano Miʼaye Qhawhito koro miinteema qalla kaasaasi Anokka erkampatadhdhe Haallikkito miinteema qhamussa kula an qallina.
9 Naqharray qhawho koro miinteema yeemarmadha erkampatadhdhe Haallikkito miinteema aʼuso marmanna.
10 Qhawho Ano Miʼaye Qhawhitosa pako magha qalladhi kaasannu innuhxuramnay,
naqharray qhawho Nasso Kʼulkʼullo dhaqghisinu yenuhxuraminti.
11 “Xinke koro hune ghappipa qhaqhittenu manne ghissoote koro Ayhutatte kula,
rafisampakopa tanynyaadhe miinta hune itʼtʼoosuna ‹Ata moʼo an qalannaani?
Taakinti moʼo anhelaholasnaani?›
Olopayepa Isarakadhanku.
12 Moʼo malla payni xinkisana olho qalladhe hune gheeqastiisi Nasso Kʼulkʼullo hune kollisna.”
Qhawho Shorokitosina qeepunko Huusu
13 Qhawho tookko waarshito kittatte Iyyesusena hasa payi:
“Kollisampako haayyu,
qharunkoa hayyuna napayina kodhattesi paappo haanina antaynaanina pakaye thaayyu usi qhamu yee qhooninu nuqalli.”
14 Naqharray Iyyesuse inna payi:
“Ato qhawhu,
qhama huneema qhaqhitte qhaqhnipa xaatdhukumanu yaxa hune sappa yexawwadhi?”
15 Nakaleemakka koritoka hasa payu:
“qagho qhawhito naqino shorokunkitotay qandhi,
hussa maallay hetiqitadhindha.
Koqolunko kaasanna kallakka hepankadhanku.”
16 Xaysa tupettay Iyyesuse hasi payipa lighnottay nuqallu:
“Qhawho shorokitto homaangho uuma pashito nu awshi qagha.
17 Usokka hasi payipa isi hela ghadha:
‹Hantu manghu kaasaasi xayto anna yakini yeqaghina mala passini?›
18 Hasakka payu ‹Hantu righghe haayyu kaasaasi anpulinapa righghe pilawhe he kanoomaasi ghuppadhopa mangho hayyupa kodhatte tayyusi sixapa usundheema yaka›
19 Lammi xaysa tupettay napse tayyuna anna payinana ‹Haadhi shorokunko perre kisha he hxafasnaasika sheeghtiye.
Hxaysadh!
Yiʼa!
Quk!
Hxasoodha!›
20 Naqharray Haallikko inna payina:
‹Ato qeepaku,
kalapku kuyyuna napse taahu ihola akamnana shorokunkusa aʼilla holsati kaasay yaxanuki haqhni?›
21 Hussa maallay qhawho shorokunko piyyisa illaholsadhapa kapay Haallikkito miintatte xiyyatakko kodhdhu dhikkate tuusu qhamussakulakki kodhdhinti.”
Haallikko Patta Kippadhe
(Maat. 6:25-34)
22 Xaysa tupettay Iyyesuse kolladhampawhessi huusuna hasinna payi:
“Hussa maallay anhunena payana qagho haahundhinu ‹Moʼo ayyiinaani?›
Taakinti pishko hahundhinuka ‹Moʼo an urkuynaani?›
Olopayeppa isarakadhanku.
23 Moʼo malla payni yitito kaanta qagho ighula,
lallate kaantaka pishko ighghulaye.
24 “Into qhuruppeesi eemindha,
yepooxadhe,
yeghimadhe xaytuna mangho yakne taakinti righte yesheeghe,
ikkodhdhitama kapay Haallikko usundhe yiʼasha;
laadhdhi hune aagheete kaanta uuma aghulte.
25 Keenni hunena kittatte qhawho rakkadhipa perre huususa saate toote padhaawadhe alkasu yaxa?
26 Lammi oli tiikiyaasiki kodhe huni alkasonku payni moʼo mallaki aʼolho pilenu rakkate?
27 “Into miisisa pise malaala qhamu ghohe eemindha!
Yetardhe,
yesaqhuyekka;
ikkodhdhitama kapay anhunena payana Selemoonekaki kaanaste tuusuna usundhena kittatte qhamo pisitakko tookko kula ye urkuyyukka.
28 Hune hedhukkaysadhe hunena qhacʼti Haallikko qashkussa liqakaʼita kuyyu armadhapa qhayna hatteema Isi yaknaasiki hasa urkeesi payni huneesi malaalaki yeghulasnippa hune urkeesu!
29 “Hussa maallay olo payenna ‹Moʼo ayyinaani?
Moʼo anghuknaani?›
Pa heghadhettay isarakkadhanku.
30 Moʼo malla payni olissa kaasaasi korossi ye Haallikko arikki tayadhenu gheeqa,
naqharray olissa kaasay qhamu hune gheeqasisa Paappo haahundhi iʼara.
31 Olho kaasanna intoosapa Ahxase Tuusu gheeqankuma olissa kaasay ihune padhaawamnaye.
32 “Hune heqhamo qeemme qhacʼa kula kodhdhite,
Paappo haahundhi moontito Ahxase Tuususi huneesi teexi woʼiye ologhaape.
33 Olho ashsheeghte kaasaasi lassindhapa kodhattisaasi xiyyawhenu teexanku!
Xayto kergheko yena hxafni,
itteka yena yiʼinti,
karatʼitaadhe yekeshuye gharsadhankuppa kodhatte yehume sheeghtiisi moontooma illaholsadhanku;
34 momaalla payni xayto shorokunko haahundhi qaghina saqqe haahundhika xaytusanaki qaghne.”
Tayrepa Tiqitadhe
(Maat. 24:45-51)
35 Nakaleemakka Iyyesuse hasi payi:
“Laalladhe kodhmonu gharaasi urkuyapa kuyyaqako kaasay kodhmonu gharsadhankuppa hammakko haahundhikka hohammasami ikodhdha.
36 Hune korossi Pogholho huusundhi haki manne xantadheetenu holli saasa tiqitadha kula kodhdha,
usundhisakka Pogholho huusundhi tutuppe iʼokayipa isi mankaxxe koxisana qhaashenu heminakalte gharisadhe kula kodhdha.
37 Kodhampawhisakka Pogholho huusundhi kuyaqaku tutuppe okayina hekokisadhettay usoosi tiqitadha saamatte ihxafi payni hemala he poghadhe!
Dhuke anhune qalli:
Uso hattakki gharsanipa yiʼo kapeemate qakkatteesu,
usundhe kapeematekka iitʼuyuppa usundhe yiʼashoy.
38 Koro pogholho huusundhi awne parakitte taakinti xayto qhayana iʼokayina he kokisadhepa isi tiqitadha saamattekki hxafi payni kodhmapawhisa hehe poghadhe.
39 “Naqharray oliisi arindha,
paappo manneete kereqeko saate inna okayni ari payni kereqekusa immanne huusuusi ghondhana yehxurri ahxay.
40 “Hunekka gharsadhapa tighitadhonkuma Ano Miʼaye Qhawhitokka saate huni hela sheeghtenaki an okayniye.”
41 Petʼiroosekka hasinna payipa kasqadhu:
“Pogholho haayyu,
lighnusa attoruyti ata ineesi pattam koro kaasannu?”
42 Pogholhokka hasi payipa nuholasu:
“Lammi aplito dhukatepa isi arnane sheeghapa pogholho koro huusunu saati gheeqastina qhamu yiʼo yiashninu isi uso xawwana yaxa?
43 Kodhampako Pogholhossi ihollina olhossi ana payiisi kodha hohe poghadhi!
44 Dhuke anhune qalli,
olhu sheeghi kaasa sappeemi uso xawwani.
45 Naqharray kodhampakusa:
‹Pogholho haayyu hattay ye okaynima iʼolanna› kippayipa isi dhihadhapa isi yi’apa isi qukapa isi hxahxayyoodhapa kodhampawhe tʼiirepa xiskeesikka tubhbhe paayyu payni,
46 pogholho aylitusana kuyaqaku ye dhihadhuppa saati ye hela sheeghinaki okaynipa lakkisa qhaqhuppa itʼa huususikka koro ye dhukaysadhi qale nakodhu.
47 “Kodhampakko woʼoko Pogholhitoosi inni arna ye gharsadhu taakinti olho pogholho huusu napayisi ye kodhu uumatteki tubhamni.
48 Naqharray qhawho woʼoko pogholho huusuna ye aruna dhappitte usoosi tubhbhasnaasi kodhipa tayamu dhoxate tuusu teqhacʼaki kodhdhinti.
Qhawho ana olho dhamma teexi olho dhamma na gheeqama.
Qhawho ana wanunko dhamma teexinakka olho dhamma na gheeqamna.”
Nakayho qandhimma Ille Qhoqhoote
(Maat. 10:34-36)
49 Nakaleemakka Iyyesuse hasi payi:
“Haadhi,
Ano hattetakki anpiyyisa okayi,
apayni hattisay miinakalte iqhawsatipa sipini payni malaali yela xeesinti.
50 Naqharray shoxatte anshoxaniisiki ansheeghi,
isisakka haki dhikkanti saasa hxaysinko anusheeghikka.
51 Intaa Ano ho piyyisa nakayho okaassenu okayi anhune lighi?
Hasa qandhikka.
Anhune qalla,
Ano illenakala korossi qhoqhootenukki anokkay.
52 Hantunu paayyatti ahxke manne tookkate qaaka qhawho hxupinki ille qhoqhotna,
qhawho izzax qhawho lakkisa,
qhawho lakkika qhawho izzax sappeemi haqaneppa isi ille papaxanki.
53 Paappo miʼaye huususa,
miʼayeka paappo huususa,
yaaye shette tiisisa,
shetteka yaaye tiisisa,
xaghghite xaante tiisisa,
xaanteka xaghghite tiisisa ihaqintipa ille qhoqhootonki.”
Olho Kodhdhamana Are
(Maat. 16:2-3)
54 Nakaleema Iyyesuse waarshossina hasinna payi:
“Apayini xayto oqhqhaye xullitina korukki aʼurrate hiite payni appayankuna ‹Irrawo dhipna.›
Dhukeema idhdhipa.
55 Holuppa apayini uruure hakalu ururuya payni kuyyu xayto hotora ikkodhdhini,
dhukkeema qhamosi apayte kulaki kodhdhi.
56 Hune hettayte hepapaseesa malke piyyatepa te moontitoosi aʼeemankuppa qhamu mala ligheesi isa aranku,
kapay olho perrina kodhdhamadhaasi monuki huni arte?”
Parakarito qalle Qare
(Maat. 5:25-26)
57 Nakaleemakka Iyyesuse hasi payi:
“Emma hune pukkaqate taahundhina moʼo mallaki olho pare kodhdhisi huni ubhatepa isa qhaqhitte qhaqhanku?
58 Parakaritto haahu illay manne qhaqhitatesa haannay huni itʼtʼuyonkuna qharaʼita usoqale araramenu kokisadh,
apayni hasakki atukodhu payni tanynya kulakki hotta ashshini,
tanynyaka ihollapa ho ho shapnanu ho teexu,
ho ho shapnakka manne shappeetesa ihho xullesni.
59 Anhola iyyana pirraadhe pakkanaka yehaqhuna haka murtipa dhikkisa saasa shappeete atulighinti.”