Qhawho Yehela Cʼuppo Huusu Puutʼi Kaasay Qhamu Panni
13
Kuyyaqakusana koro tookko tookko Iyyesuse kula okayipa hasa napayu:
“Kulay koro piyye Kalilanaki Haallikkonu teexakko teexapa Pilatʼoose usundheesi paaxuppa kʼeeqhte tuusundhiisi teexakkosi illay lahxesoy.”
2 Iyyesusekka hasi payipa nuholasu:
“Kati rakko koru piyye Kalilasa hxafi koro tokusa piyye Kalilana qaaka kaasanna kaanta cʼuppo huusundhi ho ghulaki hune lighi?
3 Hasa qandhikka anhune qalla,
hunekka apayni cʼuppo haahundhisiki huni hela puutʼonku payni qhamo huusundhi kulakki apatinte.
4 Taakinti qhawhusa hudhdhanpa sette kimpe Selihoome nadhoqtipa farronki kaaʼita moʼo adhihate?
Kati usundhisa korossi katama Iyyerusaalemenna qaaka kaasanna kaanta cʼuppo huusundhi ho ghula ihunelighi?
5 Hasa qandhikka anhune qalla,
naqharray hunekka apayni cʼuppo haahundhisiki huni hela puutʼonku payni qhamo huusundhi kulakki apatinte.”
Kaarkkosi Ye Awshina Lighno Huusu
6 Xaysa tupettay Iyyesuse lighnuusiki innu torruyi:
“Qhawho tookko hodhishto woynatte kitteema kaarkko ho ana pelese payi hoqartakko lighaasi dhishadhi qagha,
lammi iʼiyana anashshinapa kaarkkosinna awsho yutadha,
iʼashshina awshitakko toʼokokaki yena tayu.
7 Hussa maallay kodhampakosi dhishtitona hasinna payi:
‹Haadhi karku pelesatte perko izzaxki ana awsho gheeqipa isi anuna tayukka,
hantu lammi ghox!
Moonuki tayte xayto ghapi?›
8 Naqharray kodhampakosi dhishtito hasi payipa nuholasu ‹Akko Pogholho haayyu,
into hxurpa perku kuyyusaama eemoy,
ana kalaʼita arumnapa kufkoka natuqhqhoye.
9 Perkko qhamasamati awshiti payni olho xeesa,
hasaki ye kodhdhu payni aghoxnaye.›”
Iyyesuse Kuyyaqako Hxaysinkitona Xiskatakko Tekonnatho Nakahiisi Qhamu Dhinisi
10 Iyyesuse kuyyaqako hxaysinkitona manne ghissoote koro Ayihutattena tokkate kallaki koro kollisi.
11 Mannisana kalaka xiskatakko teperko hudhdhanpa setten nasso magha nakonatto kahhisiki qagha,
isekka qhooti konnatho nakahhi maallay shikkaarteesi ye alkastika.
12 Iyyesuse iʼise hiʼina iʼooqipa hassa napayu:
“Ato xiskatu udhanko haahina adhdhinti!”
13 Xarghghe huususikka nasaappa ghapadhu,
isekka haattaki haqati shikkaarippa Haallikkoosi kalataysadhi.
14 Iyyesuse qhooti kuyyaqako hxaysinkitona dhinisi maallay rafisampakosi manne ghissoote koro Ayhutattena immirooodhipa waarshossina hasa payu:
“Torppana kittatte kuyaqqe kodhmito kuyyaqako tappi qagha,
kuyaqisana kittatte okayapa dhinnonku dhishoy kuyyaqako hxaysinkitona ye kodhintikka”.
15 Pogholho Iyyesusekka hasi payipa nu holasu:
“Hune hetayte hepapaseesa keeni hunena kittatte qhawho kuyyaqako hxaysinkitona qardho huusuusi taakinti harre tuusuusi xaytossi inna shapadhina ishighapa qandhe qukisenu isi tootiisi ye qaghi?
16 Haadhi,
xiskatu tesanynye Aprihaamena kodhdhiti perko hudhdhanpa setten kaasakki Orriththo shapipa qootʼo hiʼi,
emmaghe Udhankusa ise shapipa isi qootʼo hiʼanna kuyyaqako hxaysinkitona ishighame yeise gheeqasti?”
17 Korossi Iyyesuse toora iqallitisasi apaqhina ipalami,
naqharray waarsho kaasay dhahxhxootessi Iyyesuse kodhittay ihxasoodhi.
Poodhaxo Senaficʼatena Lighno Huusu
(Maat. 13:31-32; Mar. 4:30-32)
18 Iyyesuse hasi payi:
“Ahxase Haallikkito moosiki lighti?
Mootta illakki ahitaxisni?
19 Qhawho poodhaxakko senaficʼate akipa pashooma pooxuki lighti,
ghohippa kaarkko kulaghaqi hxafoy,
aaghe moontitokka saanne hiisi sappeema mannaadhdhe ghuppatadhonki.”
Lighno Haghasisito
(Maat. 13:33)
20 Iyyesuse lanka ihholipa hasa payu:
“Ahxase Haallikkitoosi moottakka hitaxisni?
21 Ahxase Haallikkito xiskaththo haqasiso akkitipa dhaammo bhatʼoolle izzaxa illi shukkadhoki lighti,
haqasisusakka pukeesa qhamu horrinuki kodhi.”
Qhoota Mankaxxe Tʼululana
(Maat. 7:13-14,21-23)
22 Xaysa tupettay Iyyesuse karo katama Iyyerusaaleme kula iʼashshana katamaadhepa ghodhdhadheeti koro kollisipa isi lighgha.
23 Kuyyaqakusana qhawho tookko Iyyesusessi hasa payipa kasqadhu:
“Pogholho haayyu,
peri koro takkassa pattakki dhina?”
Iyyesusekka hasi payipa nuholasu:
24 “Mankaxxe tʼululana xullenu kokisadha,
momaalla payni anhunena payana,
mankaxisana xullenu koro kisha woʼama naqharray xulle yealkasne.
25 Paappo manneete ihaqanapa mankaxxessi ikʼuppi tupettay seeto kalakki ashshikkarintepa isahasa kodhdhanku:
‹Akko pogholho haani,
maʼala taahu mankaxxe inne qhash!›
Naqharray uso ihunena paynana ‹Ahanu qhama okaaytessa anu hune arikka.›
26 Kuyyaqakusana hunekka annapaynakuna:
‹Atopa ine illeqale ayiinipa qukaani,
mooraadhdhe haaninakka akkollisti.›
27 Uso ihunena payna ‹Ahanu qhama aokayte anu arikka,
hune maghawhe yela kaanta sikaapuya.›
28 Aprihaamepa Yisihaakʼepa Yaykʼoope pana hxuumampawhe kaasaasi Ahxasi Haallikkitona kittatte ahiʼinte,
naqharray hune seeto kalaka haqhinte,
xinkisana ooyepa ilghe illa qhume kodhdhamanna.
29 Koro kisha xayto oqhqhaye lighapa oqhqhaye xullanu,
haghutuppa hakalu okaynapa Ahxase Haallikkitona yiʼenu qakkadhu.
30 Haadhi koro keetina kittatte koro intawna,
koro intawina kittattekka koro keetna qagha.”
Iyyesuse Qhamu Iyyerusalamenu Ooyi
(Maat. 23:37-39)
31 Kuyyaqakusana Feresawaadhdheete kittatte koro tookko tookko Iyyesuse kulakki okayipa isinna payana:
“Herodiise qhooti ihopoghe woʼi maallay piyyinna kittatte lighpa ashshoy”.
32 Naqharray Iyyesuse hasi usundhena payi:
“Ashshindhapa kaqalhusana hasa payanku:
‹Kuyyupa qhayna Nassidhdhe maghaasi alihasna,
koro udhdhamaasika dhinniso,
kuyyaqako izzxana kodhmo haayyusi adhikisna›.
33 Ikkodhdhitama kapay kuyyupa qhayna pana qhammay karo katama Iyyerusaaleme kulakki an ashshankonu haqni.
Moʼo malla payni hxuumampakko katama Iyyerusaaleme malettay xayto pileema fare ye uso gheeqasi.
34 “Iyyerusaaleme,
Iyyerusaaleme Ato tekoro hxuuma torruyaasi paaxay,
hahe kula erakisikka awrughettay isa hattapay.
Lukkalite qhamu cʼiwcʼiwwaadhdhe hiisisi hoolo kaleema holsati kula tara meʼitakki amiʼaadhe haahisi hekula holase woʼi!
Naqharray hune huni woʼonku.
35 Lammi manne haahundhi ihunena qonnanki,
anhunena iyyana,
haka paytena ‹Homakaxko Pogholhitottay okaaya hohe poghadhi› saasa xaynu koru huniye hiʼinte.”