Lighno Poodhaxito
4
Kuyyaqakko pile Iyyesuse ihholipa pasito hinaseema kollise paayyu.
Waarsho uuma kisha qhooti illa holupa Uso kula okayi maallay konkko sappeemi hadhdhipa qakkadhu,
waarsho kaasakka pasusana hinaseete qaghi.
2 Usokka olho kishasi lighnottay hasa payupa kollisu:
3 “Apaqhasindha!
Pooxampako poodhaxo pooxenuki soofi.
4 Ippoodhaxo pooxana tookko tookko onkatte hinaseemi hayyippa aaghekka okayonkippa sooqonki.
5 Poodhaxo hubhakka moqhorkoomi hayyi,
xaytusanakka piyye qhooti yena waanti maallay hattakki fuuʼi.
6 Ikkodhdhitama kapay oqhqhaye ihxhxustina irruqhi,
qhooti ye xisse sheeghi maallay ishshaʼi.
7 Poodhaxo hubhakka qhatʼme kitteemi hayyi,
qhatʼmesikka na ghohippa poodhaxossi fuuʼisi loqhippa he kala haqhasippa ye awshunna hasa haqhu.
8 Poodhaxo hubhakka piyye xeesasa qhooti hayyi maallay iffuuipa ghohu,
awshokka teexu,
tookko ibhbhite 30,
tookko 60,
tookkoka 100 awshi.”
9 Nakaleemakka Iyyesuse hasi payi:
“Qhawho qhaame apaqha sheegha iʼapaqha!”
Iyyesuse Moʼo Maallay Qhamu Lighnottay Qalladhi
10 Iyyesuse iʼqawni qaghana,
korossi nakala ashshapa kolladhampawhe huusu 12 qhoota lighnidhdheete kaaʼitha Iʼuso kasqadhe
11 Usokka hasi na payi:
“Huneesi qalliite Ahxase Haallikkitona bhadhamti are ihhune teexamti,
naqharray koro pilenu olho kaasaasi lighnotakki anu torruyi.
12 Olhunna maallay hasa kodhdhintikka qhamu hasa payyamti kulaa:
‹Usundhe qhamu karo Haallikkito ye holleppa cʼuppo huusundhdhikka nu hxuramunu,
eemesi iʼeemankimma saqakkooma ye ghapadhe,
apaqhasesikka iʼapaqhama ye hela thaaye.›”
Ishshighgho Lighno Poodhaxitona
13 Xinkisana Iyyesusekka hasi na payi:
“Inta lighnusa huneesika ye hune xulli?
Eepa,
lighnidhdhe hibhaasi malaala arre alkasinte?
14 Pooxampakko Kʼaale Haallikkitoosiki pooxi.
15 “Kʼaallisa ippooxamtina poodhaxussa onke hinaseema puqqikka korossi Ikʼkʼaale apaqhasina Seetʼana okayipa Kʼaalessi saqakko kitteema na poxamtiisi haattay isi na akkisiki hiʼaasi.
16 “Holuppa poodhaxussa moqhorkkooma pooxamikka he hasa ligha,
Kʼaalesi iʼapaqhena hattakki hxasoottay akkadhe,
17 naqharray kuyyaqqe qhacʼasa pattama xisse ye sheeghe maallay qhootta Kʼaalatte maallakki rakko taakintti ghoghorame na hxafiti payni minakalti marmane.
18 “Poodhaxakkusa ghusakko qhatʼmatte kitteema pooxamikka koro Kʼaale apaqhisiki hiʼaasi,
19 ikkodhama qaako piyyinu heghadhepa shorokunko piyye qhaatʼinattay tatakame holuppa olho lathu kippadhe saqakkooma na hoqhappa Kʼaalesiisi na niiku maallay ye awshonkina isi hasa haqhe.
20 “Tookkekka poodhaxusa piyye xeesasa pooxamisiki lighe,
usundhisakka he kʼaalessi apaqhaseppa isi akkadhanki,
usundhisa na tookko ibhbhite 30,
tookko 60,
tookkokka 100 iʼawshi.”
Lighno Hammakkossi Haahana
21 Iyyesusekka hasi na payi:
“Hammakkoosi xayto ye armadhi hoore kalaʼitha taaki thaanko ana qhupapa?
Hammakkoosi xayto armadha saappeema axawwadhi qandhi?
22 Hussa maala ho bhadhamipa isi ye arrmani,
hohe mughisipa isi ye arramni yeqaghi.
23 Lammi qhawho qhaame apaqha sheegha qagha payni iʼapaqha!”
24 Nakaleemakka Iyyesuse hasi na payi:
“Olisa apaqhastenu he tiqithadhindha bhatʼollisa abhatʼtʼetakki hune bhatʼtʼaminti,
laadhi the ghulaki hune padhaawamni.
25 Moʼo maalla payni ho sheeghanu anaanu padhawna,
na qharray hoye sheeghina hussa qaghakka ana akkina.”
Lighno Ghohoko Poodhaxitona
26 Nakaleemakka Iyyesuse hasi payi:
“Ahxase Haallikkito qhawho pashooma poodhaxo pooxasiki lighti.
27 Qhawhusakka awne irrafa,
kuyyaqate ihhaqa,
qhamu malaala kodhdhitisa ye arunakki poodhaxusa fuuʼipa isi ghohi.
28 Payyoteema piyyekka thiisittay manghoosi iffuuasay,
nakaleemakka fiitoppa awushu.
29 Mangho iʼawshipa xeere ghimakito na hxafinki payni qhawhusa minakalti maacʼire ghaarsadhi.”
Lighno Poodhaxo Sanaficʼatenna
30 Ihholi hasa na payu:
“Ahxase Haallikkitoosi mootakka kitaxisnaani,
lighno hunkatakki an hiʼasnaani?
31 Ahxase Haallikkito poodhaxakko dhishtakko senaficʼattenaki illighti,
usokka ho poodhaxidhdhe piyyatte qagha kaasanna kalla qhacʼa.
32 Naqharray apoxxipa fuuʼu thupettay ighghohappa dhishto kaasannu isi ghuli,
haki aaghe hoolottay haqakka manne na ghupptaneppa na kala kaasuyadhe alkasonki saasa saanne kaanooma lihhasadhoy.”
33 Iyyesusekka koro qhamu hela thaayninukki lighno hasa lighattay Kʼaale Thuusu nu thorruyi.
34 Lighno malettay olho toʼokokkakki ye usundhe kollisikka,
naqharray qawnikki qaghe payni olho kaasaasi kolladhampawhe huusunu innu ishshigha.
Iyyesuse Pimpessi Paso Kakanthulaasi Hessiki Paasi
35 Kalapkusana Iyyesuse kolladhampawhe huusuna hasina payi:
“Ashshinipa pasito afe koray tahxhxini.”
36 Waarshosi hxuronkippa Iyyesuse illay konko saappeema hadhdhonkippa ashshonki,
konkaadhdhe pilekka na qalli qaghe.
37 Xinkisana pimpe haxakki haqipa haki qandhe konkooma hoqhqhine saasa kakanthule paayyi.
38 Naqharray Iyyesuse konkito kittatte kasidhdho ikkasidhdheesadhipa korito konnato koray rafu,
kolladhampawhe huusukka Iʼuso haqiseppa hasa na payonki:
“Kollisampakko haani,
ata an humaanina yeho dhaakati?”
39 Usokka ihhaqipa pimpesiisi qheeru,
pasitokka:
“Kʼampay!”
na payu;
ururesikka isaltipa olho kaasay hesi payu.
40 Iyyesusekka ina payi:
“Moonuka hasa ghaapte?
Haka hantu saasa dhukaysadhe huni sheeghte?”
41 Usundhdhekka uuma ighghaapepa isi hasa illena papaya:
“Ihim!
Ata husi pinpepa pasokka nu hayame yaxa?”