Lighno Pooxampakkito
13
Kuyyaqakusana Iyyesuse manneete illighipa pasito hinaaseema qakkadhu.
2 Koro kisha qhooti Uso kapeema illa holi maallay konko sappeema hadhdhuppa qakkadhdhu,
waarshossikka pasito hinaaseemi shikkaari.
3 Hasa payuppa olho kishaasi lighnottay nu qallu:
“Pooxampakko poodhaxo pooxenukki pasho kula soofi.
4 Ippoodhaxo pooxana poodhaxo tookko,
tookko onke hinaseemi hayyipa aaghekka sooqonki.
5 Poodhaxo hubhbhakka moqhorkkoomi hayyi,
xaytusanakka piyye qhooti yena waanti maallay hattakki fuuʼi.
6 Ikkodhdhitama kapay oqhqhaye ihxustina irruqhi,
qhooti ye xisse sheeghi maallakka ihhaxawi.
7 Poodhaxo hubhakka qhatʼme kitteemi hayyi,
qhatʼmisakka na ghohippa poodhaxossi fuuʼiisi loqhippa he kala haqasi.
8 Poodhaxo hubhakka piyye xeesassa ihhayyipa fuuʼu,
ibhbhe kishakka awshu,
tookko ibhbhithe 100,
tookko ibhbhithe 60,
tookkokka ibhbhithe 30 awshu.
9 Qhawho qhaame apaqha sheegha iʼapaqha!”
Iyyesuse Moʼo Maallay Qhamu Lighnottay Qalladhi
10 Xaysa tupettay kolladhampawhe Iyyesuse kulakki itʼtʼuyeppa hasa payonkippa kasqadhonki:
“Emma moʼo maallakki aʼusundheesi lighnottay qallatti?”
11 Usokka hasi na payi:
“Huneesi qalliithe Ahxase Moonthitona bhadhamtiisi are ihhune teexamti,
naqharray usundheesi yenu teexamukka.
12 Moʼo malla payni ho sheeghanu ananu padhawna,
innu naqanakka,
naqharray hoye sheeghina hussa qaghakka ana akkkina.
13 Usundhe he eemakki lighemma ye hiʼe,
he apaqhasakki lighemma ye apaqhe,
holuppa ye hela thaaye maallakki allighnottay nu qalli.
14 Kʼaalessi Issayyaasea hasa payipa tooxokki usundheema dhikkadha:
‹Aʼapaqhasankumma,
naqharray huni hela thaayte,
Ahhiʼankumma,
naqharray saqkooma huni ghapatte.
15 Moʼo malla payni waarshunna saqqe huusundhi inna fafe,
qhaame huusundhi inna kʼupame,
ehxhxe huusudhisikka iʼtʼtʼiipe,
hasakki ye kodhdhu payni ahxay,
ehxhxe huusundhittay iʼeemanapa
qhaame huusundhitakka apaqhonkippa
saqqe huusundhittakka hela thaayonkippa
ye kulakka holonkippa Anokka usundhe dhinniso.›
16 “Naqharray ehxhxe haahundhi qhooti hiʼeppa qhaame haahundhikka isi apaqha maallay hune hehe poghatte.
17 Dhuke an hune qalli:
husi hune hiiteesi hxuumampawhepa koro pare qagha ho kisha hiʼe woʼima naqharray ye hiʼonki,
husi hune apaqhteesikka apaqhi woʼemma naqharray ye apaqhonki.
Ishighe Lighno Pooxampakkitona
18 “Lammi ishghe lighno pooxampakkosinna apaqhqhasindha!
19 Poodhaxussa onkatte hinaseema hayyi payyo qhawho ye hela thaayi kʼaalessi Ahxase Haallikkitona apaqhqhasipa Seetʼana kʼaalessi saqko kitteema na poxxammitiisi haattay isinna akkisikki hiʼaasi.
20 Poodhaxussa moqhorkooma pooxxammikka qhawho kʼaalesi apaqhina hattay hxasoottay akkadhaasikki hiʼaasi,
21 naqharray kuyyaqqe qhacʼasa pattama xisse ye sheeghi maallay qhoota Kʼaalatte maallakki rakko taaki ghoghorame nahxafti payni miinakali marmadhi.
22 Poodhaxakkussa ghusakko qhatʼmatte kitteema pooxxammika:
qhawho kʼaaleesi apaqhasapa tatakame qaako piyyinapa heghadhe shorokunkitottay isi naniikamipa ye awsho awudhunna hasa haqhuusikki hiʼaasi.
23 Naqharray poodhaxussa piyye xeesassa pooxxammi:
qhawho kʼaaleesi apaqhasapa isi hela tayasikki hiʼaasi,
usokka iʼawsha,
tookko ibhbhite 10,
tookko 60,
tokkoka 30 awshi.”
Lighno Fiiritʼito
24 Iyyesuse ihholi hasa payuppa lighno pile nu qallu:
“Ahxase Moonthito,
qhawho pashooma poodhaxo xeesa pooxisikki lighti;
25 naqharray koro kaasay irrafi tupettay paarakara huusu iʼokayipa kasposissa fiiritʼo pooxuppa ashshoy.
26 Kaspossikka ighghohipa fiithe paayyunna fiiritʼokka inna armadhi.
27 Hussa maallay aylaadhessi pashusaasi pooxe hasi payeppa paappossi pashitoosi kasqadhonki:
‹Pogholho,
pasho haahusa poodhaxo xeesa an pooxni qaandhi?
Emma fiiritʼussa ahanukki na okayi?›
28 Usokka inna payi:
‹Parakara hasa kodhi.›
Ayladhessika inna payenna:
‹Emma qhama ashshinanipa firitʼusa na ropaninnu awwoʼaay?›
29 Naqharray Uso hasi payipa nu holasu:
‹Ye kodhdhinti,
moʼo maalla payni afiiritʼo ropankunna kaspo anna qale ropinte.›
30 Hussa maallay hxurapa xeere ghimakkito haaki hxafne saasa iʼille qale ghyye,
kuyyaqko ghimakkitona korussa ghimana anna payna:
‹Fiiritʼusaasi qharritteema na ropapa qhama haththettay dhillinu illeema marronku,
naqharray kaspoosi ghimindhapa unkuleema yakanku.›”
Lighno Senaficʼate
31 Hasa payuppa lighno pile nu qallu:
Ahxase moonthito qhawho poodhaxakko senaficʼatteb akkipa pashooma pooxusiki lighti.
32 Usokka Poodhaxidhdhe piyyatte qagha kaasanna kala ho qhacʼa.
Naqharray ighghohi payni dhishto takkumma kaasannukki ghulipa kaarko kula ghaqqi kodhdhuppa aaghe moonthitokka saanne huususa manne ghuppathadhonkippa isi naqaaka.
Lighno Haqsisito
33 Hantukka lighno pileesikki nu qalli:
“Ahxase Moonthito xiskaththo haqsisso akkitipa dhaammo bhatʼoolle issex qhamu horrinu shukkadhotakki lighti.”
Iyyesuse Moʼo Maallay Qhamu Lighnottay Kollisi
34 Iyyesuse olissa kaasaasikki lighnottay waarshonu thorruyi,
lighno malettay olho toʼokokakki ye usundhe kollisikka.
35 Moʼo malla payni hossi hxuumampakkottay hasa payami qhamu dhikkaninu
“qalliithe thayyussi lighnotaakki an torruyni,
olhossi haka piyye qhaatʼe uummamenu paayyatti bhadhamisikka annu thorruyna.”
Ishighe Lighno Fiiritʼitona
36 Xaysa tupettay Iyyesuse waarshosisi illaghipa manne kula xullu,
kolladhampawhe huusukka Uso kulakki itʼtʼuyeppa hasa na payonkippa kasqadhonki:
“Into ishighe lighno fiiritʼitona ine qalli.”
37 Iyyesusekka hasi payipa nu holasu:
“Ho poodhaxussa xeesa pooxi Ano Miʼaye Qhawhito;
38 pashussakka piyye qhaatʼi,
poodhaxussa xeesakka miʼaadhe Ahxase Moonthitona,
fiiritʼokka miʼaadhe Seetʼanay.
39 Parakara fiiritʼussaasi pooxikka Orriththo,
ghimakkokka dhikkate piyye qhaatʼinna,
he ghimnakka erkampatadhdhe.
40 Qhama fiiritʼoosi ropipa isa haththettay dhili kula dhikkatte piyye qhaatʼinnakka qhamussa kulakki kodhdhinti.
41 Xinkissana Ano Miʼaye Qhawhito erkampatadhdhe hayyusikki an eraknipa koro qhama cʼuppo konninu koro kodhapa koro maghno kodha kaasaasi Ahxase thayyuna kittatte sooqonkippa ghinte kalay lihasonki,
42 Xayto ooyepa ilghe illa qhume na qaghe haththe dhikitha iyyiakni.”
43 Naqharray kuyyakussana koro pare qagha Ahxase Paappo huusundhina kittatte qhamo oqhqhayyatti hxusne,
qhawho qhaame apaqha sheegha iʼapaqha!”
Lighno Shorokunko Bhadhdhamina
44 Nakaleemakka Iyyesuse hasi payi:
“Ahxase Moonthito shorokunko pasho kitteema bhadhdhamisikki lighi.
Shorokunkusaasi qhawho tayuppa holu lanka bhadhu,
qhooti uuma hxasoodhi maallay ashshoppa olho sheeghi kaasaasi lassoppa pashusaasi pithamuy.”
Lighno Furittatte
45 Iyyesuse ihholipa hasa payu:
“Ahxase Moonthito qhawho xoruya furitte xeesa pithamenu gheeqasikki lighti.
46 Qhawhussa Iffurittessi uuma shooshay tayina iʼashshipa olhu sheeghi kaasaasi lassoppa pitamuy.”
Lighno Marapatte
47 Nakaleemakka hasi pay:
“Ahxase Moonthito marape apaso kitteema ghaasipa hxaare qawni qawni na yakamikki lighti.
48 Ihoqhqhitina hessi ghappasakka pasito hinaase kulakki kiikeppa lihasonki,
qakkadhonkippa hxaare xeesaasi na qholonkippa koochcho kitteema yakonki,
naqharray the ye xeestiisi tuqhonki.
49 Dhikkate piyye qhaatʼinnakka hasi kodhdhinti,
erkampatadhdhe iʼokaynapa cʼuppolawhatte kittatte koro pare qaghaasi reehonki.
50 Maghampawheesi xayto ooyepa ilghe illa qhume na qaghe haththe ye ime sheeghitisa iyyiakni.”
51 Iyyesusekka ihholipa hasa na payu:
“Olissa kaasay ihune xuli?”
Usundhekka inna payenna “Ee Pogholho haani!”
52 Usokka hasi payipa nu holasu:
“Lammi qhawho shorokitto kollisampakko Hikkatte ho qalliithe Ahxase Moonthito bhadhdhamtiisi tomooma ara,
kodhaththessi thuusu kaanasamti aʼilla holasina keeshattepa qhawthitte lihasakki lighghiti.”
Torakko Iyyesuseema Haqi
53 Iyyesuse lighnidhdhi kaasaasi iththorruyipa dhikkisu tupettay,
haahnu ihhaqipa ashshoy.
54 Piyye thuusu kathama Naazrate kula okayuppa mannessi ghissoote koro Ayhutattena kaalla isi koro kollisa;
koro apaqhi kaasay idhdhahxhxipa hasa payu:
“Ata qhawhu arnanippa dhahxhxootaadhdhi ikkodhiisi ahaati akki?
55 Husi qhawhossi kaare hxashana Miʼaye huusu qandhi?
Yayye thuusuna Mariyaame ana payi qandhi?
Qassawhe huusukka Yaykʼoopepa Yoosofepa Simiʼoone pana Yihuta qandhi?
56 Alawwe huusu kaasay hassa ine qali qaghe qandhi?
Emma qhawhu oli kaasaasi ahaati akki?”
57 Hussa maallay ye Uso akkadhonki.
Naqharray Iyyesuse hasinna payi:
“Hxuumampako piyye thuusupa ahxke huusuna pattakki ye kaanasami.”
58 Qhooti ye Uso dhukkaysadhonki maallay Iyyesuse xaytusasa dhahxhxootaadhe kishaasi ye kodhdhu.