Farte Shoxampakko Yohannise
14
Xinkissana Herodhisesi piyye Kalila rafisa qhooti ote Iyyesuseesi apaqhi maallay.
2 Kodhampawhe huusuna hasinna payi:
“Hasi kodhdhiti payni Shoxampakko Yohanise fartatte haqi payyo,
hussa maallakki dhahxhxotaadhissa kaasay Usottay kodhdhamadhe.”
3 Xayna qharaʼitha Herodise shoxampakko Yohanniseesi ighghapasipa shapuppa manne shappeetesa xulleesu,
olhu na maallay shapasikka,
naxaye qaso huusu Filpoose Herotiyata maallay.
4 Moʼo malla payni Yohannise Herodhisena:
“Naxaye qaso haahuna qhama akkintinu hikke ye payukka” qhooti napayinu.
5 Herodhise Yohannisesi poghi woʼi,
naqharray waarsho Yohannisessi qhamo hxuumampakkito qhooti akkadhi maallay ighghaapi.
6 Herodhise kuyyaqko inna dhaladhiisi ikkaanasana shette Herotiyatay korossi yiʼonu aʼ ooqi miinteema qhooti hiriptipa Herodhisesi hxaseeso maallay,
7 olhunna kasqatti kaasaasi qhamunnu teexninukki nu akutadhi.
8 Isekka yayye tiisinakki dhihamte apaqtipa hasa napayi:
“Pukaqate Shoxampakko Yohannise taankottay ye teex!”
9 Ihhasa paytina Herodiisenu uuma innu dhakaatti,
ikkodhdhitama kapay,
korossi yiʼo yiʼa miinteema qhootinu akutadhi maallay korussaasikki ghaapipa pukkaqte Yohanniseesi qhamanu texninu hayo teexu.
10 Manne shappeete kula qhawho erakkuppa pukkaqte shoxampakko Yohanniseesi qhaqhasu.
11 Pukaqatessi qhaqhisikka thankottay aʼokasuppa sheththesinnu ateexu,
isekka iʼakkitipa yaaye thiisinu teexi.
12 Kolladhampawhe Yohannisekka iʼokayeppa pukkaqqosiisi akkonkippa maayonki.
Xaysa tupettay ashshonkippa olissaasi Iyyesusenu qallonki.
Iyyesuse Qhawho Kuma Hxupinki Yiʼashi
13 Iyyesuse qhamu Yohannise farisa apaqhnittay Uso pattakki konkooma hadhdhipa xayto koro yena qaghi kula ashshoy.
Waarshokka xayto Uso na ashshiisi iʼapaqhina kathamaadhenukki lighipa lughghettay Uso kaleema ashshoy.
14 Iyyesuse konkito saappeete iʼoodhdhina waarsho kishakki hiʼipa qhararsadhuppa he udhdhamaasikka dhinnisoy.
15 Xayto iʼawnuyina kolladhampawhe huusu Uso kapemi itʼtʼuyeppa hasa na payonki:
“Xayto anna qaghni mandho,
saathekka illighiti hussa maallay waarshu qhamu ashshinipa ghodhdhadhdheʼitha olhu yiinisi pittamadhonnu laaghghi.”
16 Naqharray Iyyesuse hasinna payi:
“Ashshe ye usundhe gheeqastiye olhu yiineesi hune nu teexa!”
17 Usundhekka hasi na paye:
“Ine dhilantakko hxupinpa hxaaritte lakki pattakki an sheeghni”.
18 Iyyesusekka hasinna payi:
“Into akkapa ye kula okayankuttay!”
19 Xaysa tupettay waarshossi maqqakkooma qhamu qakkaninu hayu.
Dhilantakkossi hxupinpa hxaarittessi lakkiisi akkuppa montho qila emmadhuppa Haallikko kalataysadhu tupettay dhilantakkosiisi ghoodhdhuppa waarshossinu qhamu qhootnennu kolladhampawhesissa teexu.
Usundhekka waarshossinu qhootonki.
20 Koro kaasay yiʼoppa dhalaxu,
kolladhampawhekka ghodhdhanadhessi nakalla haqhe kʼunna 12 haqisoonki.
21 Koro yiʼussa yiʼika xiskepa miʼaadhe ye dhihamonki male tʼiire patta qhawho 5000 kula ghaqqiitti.
Iyyesuse Paso Sappaʼitha Iʼoghadhipa Ashshoy
22 Hattay kolladhampawhe konkooma qhamu hadhdhineppa afe kula inthawonkippa tahxhxonkinukki usundhe hayippa Uso waarshossiisi haqisenu konnankonnayye haqhu.
23 Waarshosiisi ihhaqisi tupettay Uso patta ghissootenu ghupo tookko kula hadhdhu,
xayto iththukanina Uso pattakki xaytusana qagha.
24 Xinkissana kolladhampawhe ikkonkossittay paso saappaʼitha ashshana pinpe okayipa konkosiisi lallaaghe paayyi.
25 Awne saathe kollay tupettay Iyyesuse paso sappaʼitha iʼoghadhipa kolladhampawhe kula isi okaaya.
26 Ippaso sappaʼitha oghadhapa isi okaayana kolladhampawhe ihhiʼeppa murrukonkippa hasa payonkippa riironki:
“Oli korru karaadhe!”
27 Iyyesusekka hattakki napayina:
“Haay!
Kulay Anoye,
olo ghaape!”
28 Petʼiroosekka Iyyesusena inna payi:
“Pogholho haayyu,
Atho payni,
paso sappaʼitha qhama oghannipa ho kula okayanu ye pay!”
29 Iyyesusekka inna payi:
“Okay!”
Petʼiroosekka konkito saappeete iʼoodhdhipa paso sappaʼitha Iyyesuse kula isi oghadhapa isi ashsha.
30 Naqharray urure qhooti naqti maallay ighghaapipa isi pasosinna kittekata xullana hasi payipa riiru:
“Akko Pogholho haayyu ye pehis!”
31 Iyyesusekka hattakki shokkipa ghapuppa hasa na payu:
“Atho ho dhukkaysadhe hola qhacʼti,
moʼo maallakka he ghatti?”
32 Iyyesusepa Petʼiroose ikkonko saappeema hadhdhenna ururessi issalti.
33 Hessi konkito saappeete qagha hasi payeppa Iyyesusenu sakathonki:
“Dhukenu Atho Miʼaye Haallikkito!”
Iyyesuse Piyye Kenseretʼessa Ikkoro Udhdhamma Dhinnisi
34 Pasosinna ittahxhxeppa piyye Genseretʼenna hxafoonki.
35 Koro piyyisanna qaaka qhamu Iyyesuse kodhdhisa iʼupadhina koro usundhe kaaʼitha qaaka kulakki koro errakeppa koro udhdhamma kaasaasi Uso kula aʼokaasu.
36 Korossi udhdhamakka kayle laalle thuusuna ghappaadhdhenu pattakki Uso waathadhe,
he ghappadhdhe kaasakka udhanko huusundhina dhinnonki.