Iyyesuse Qhawho 5,000 Ki yiʼashi
6
Xaysa tupettay Iyyesuse paso Kalila Tʼipiriyadhoose ana payi kulakki tahxhxi.
2 Iyyesuse dhahxhxootettay ikoro dhinnisana waarsho kisha qhooti hiʼi maallay Uso kaleemi ashshi.
3 Iyyesuse ghupo sappeemi hadhdhipa kolladhampawhe huusu illay haama qakkadhu.
4 Paalesi Faasika koro Ayhutattenaki iitʼuy.
5 Xinkissana Iyyesuse ishokkipa emmadhunna waarsho kisha Ho uso kula okayasikki hiʼipa filipoosena hasa na payu:
“Yiʼo waarshu kaasa hxafnaasi ahaate an pithamnaani?”
6 Iyyesusekka Filipʼoose themmenukki ihasa payi dhiishoy,
Uso olhu konnisi iʼara.
7 Filipoosekka hasi payipa nu holasu:
“Yiʼoosi tinaare dhippaa lakkitta kakki apithamnipa ho takkumma takkumma anu qhooto payni ye usundhe hxafnikka.”
8 Kolladhampawhessi 12na kittatte tookko Simioonessi Petʼiroose ana payina qaso huusu Intriyaase hasi payi:
9 “Miʼaye tookko ho dhilantakko porthito hxupinpa hxaaritte lakki sheegha hassa qagha,
emma naqharray koru kaasanna oli munna hxafni?”
10 Iyyesusekka hasi na payi:
“Into korussaasi qakkateesa.”
Xaytusanakka qhooti maqqakko qaghi maallay korussakka maqqakkossissa iʼqakkadhi,
korussakka tʼiire patta qhawho 5,000 kula qaghitti.
11 Xaysa tupettay Iyyesuse dhilankossisi akkuppa Haallikkoosi kaanasuppa korossi qakkadhinu qhootoy,
ho luppa hxaaresisikka naanu qhootoy,
koro kaasay qhamu woʼisaama yiʼoy.
12 Koro kaasay yiʼoppa idhdhalaxi tupettay Iyyesuse kolladhampawhessi huusuna hasi na payi:
“Ghodhdhanakko toʼokokkakki huni hxuronkuna illeema holasa.”
13 Usundhekka dhilantakkossi porthito hxupin koro nayipa ghodhanaadhe nakkala haqhonkiisi iʼilla holasenna kʼunna hudhdhanpa lakki ihoqhqhi.
14 Koroka dhahxhxootessi Iyyesuse kodhiisi qhooti hiʼi maallay hasi payi:
“Karayka qhawhu hxuumampakkossi piyye qhaatʼema okayinakki Uso!”
15 Naqharray koro kittettay qhamu Uso ghapnipa poghlumisusa dhihattootte tuusundhiisi qhooti na upadhi maallay qawnikki sikaapuyipa ghupo kula ashshoy.
Iyyesuse Qhamu Paso Saappeʼita Ashshi
16 Xayto iʼawnuyana kolladhampawhe paso kulakki oodhdheppa
17 konkooma hadhdhonkippa karo piyye Kʼifirnahoome kula ashshankoma haqonki,
xinkisana xaytokka ithukkani,
Iyyesusekka haannay ye usundhe kula okayu.
18 Uruure qhooti uuma ururti maallay pasokka ikkakanthulama.
19 Kolladhampawhekka kilo methire 5 taakinti 6 kulaqaghitiki iʼashshe tupettay Iyyesuse paso sappeʼitha iʼashshipa konkossi kula ittʼuyunna ihiʼeppa murrukonki.
20 Naqharray Uso inna payina:
“Kulay Anoye olo ghaape!”
21 Hussa maallay konkossi kitteema ixuleese woʼenna,
konkossikka hattakki xayto inna kula ashshenna hxafi.
Iyyesuse Yiʼo qaghito
22 Haqhayna sinkato korossi pasito afe koray haqhi pasito saappeete qhamu konko toʼoko patta qaghipa kolladhampawhe patta ashshonkippa Iyyesuse naqharray usundhe qale konko saappeema qhamu ye hadhussa ihiʼe.
23 Xaysa tupettay konkidhe pile he piyye Tʼipiriyadhoosennu haqeppa xaytossi Iyyesuse na ghissoote kalathay kodhdhipa Waarshokka na yiito yiʼonna kaanta qagha kula okayonki.
24 Waarshosika Iyyesuse taakinti kolladhampawhe huusuusi xaytusana idhape tupettay konkidhesi xaytusana qagha saappeema ihadhdheppa Iyyesuse gheeqenu piyye Kʼifirnahoome kula ashshonki.
25 Usundhdhekka iʼashsheppa pasito afe koray tayokippa hasa na payonki:
“Kollisampakko,
ata parakka hassa kula okayti?”
26 Iyyesusekka hasi na payi:
“Dhuke dhuke an hune qalli,
hune olho anna maallay ayyeesi gheeqte qhoota ayiitho yiiteppa dhalaxanku maallay dhiishay qhoota adhdhahxhxoote hiite maallay qandhikka.
27 Olo yiʼo pannanu kodhadhima naqharray yiʼossi qagho perre ye hume sheeghenna kodhdhi Miʼaye Qhawhito hune teexninu kodhadha,
ususaka Haallikko Paappo maathama inna shoqhiye”.
28 Korossikka hasi na payi:
“Emma kodhmo Haallikkito kodhenu moʼo kodhe ine gheeqasa?”
29 Iyyesusekka hasi payipa nu holasu:
“Kulay kodhmo Haallikkito hossi Uso erakiisi dhukkaysadhe.”
30 Usundhdhekka hasi napaye:
“Qhamo anho dhukkaysananinu dhahxhxoote mala qagha aʼine hiʼaasnti?
Makkonti?
31 Qhamossi payina:
‹Qhamu iʼyiinenukki ayyiʼossi monthikki nuteexi›c pa atooxoy kula appaadhdhe haani mennaasikkib mandhito yiʼe”.
32 Xaysa tupettay Iyyesuse hasi na payi:
“Dhuke dhuke an hune qalli,
yiʼussa moonthonu oodhdhi Muuse qandhikki hune teexima,
yiʼussa dhukatte moonthitoosi Paappo hayyu hune teexi.
33 Yiʼo Haallikkito ho moontonu oodhdhapa isi piyye qhaatʼenu qagho teexa.”
34 Hussa maallay korossi hasi na payi:
“Pogholho haani,
yiʼussaasi kuyyaqko kaasay ine teex.”
35 Iyyesusekka hasi na payi:
“Yiʼo qaghito Ano;
qhawho ye kula okayi ye puffini,
qhawho yeesi dhukkaysadhakka ye dheeponni.
36 Naqharray aye hiʼankumma huni ye dhukkaysatte kanhunena payi.
37 Qhawho Paappo hayyu ye teexi kaasay ye kulakki okayni,
qhawho ye kula okayisikka moʼokka payni ghintakata anu lihasnikka.
38 Ano olhana maallay ammoonthonu oodhdhi hossi ye erakina woʼoko Huusu kodhenu dhiishay woʼoko Hayyuusi kodhenu qandhikka.
39 Hossi ye erakina woʼoko huusu husi,
korossi iyyeteexina kittatte toʼokosikakki anu patisunna qhamu an perre dhikkatattena fartatte an usundhe haqissninuu.
40 Moʼo maallay payni woʼoko Paappo hayyuna qhawho Miʼayeesi hiʼipa dhukkaysadhu kaasay qagho perre ye hume sheeghesi qhamu taayyaninu,
Anokka perre dhikkatattena fartatte an uso haqisna.”
41 Iyyesuse qhooti iyyina:
“Yiʼo moonthonu oodhdhi Ano!”
Maallay koro Ayhutatte inna qhurumrumipa,
42 hasa na payu:
“Husi miʼayessi Yoosefe Iyyesuse qaandhi?
Paappo huusupa yaaye thuusukka hessi an arri qaandhi?
Emma malaali iyyina ‹Moonthonukka an oodhdhi›?”
43 Iyyesusekka inna payi:
“Olo ella qhurumrume.
44 Qhawho Paappo hayyu ye kula ye kiiku malettay ye kula okayna ye qaghikka,
qhawho ye kula okayikka kuyyaqko dhikkattattena Anokka fartatte an uso haqisna.
45 Qhamossi payina:
‹Koro kaasay ho Haallikkito kolladhi ikodhdhini› pa Matʼaafadhdhessi hxuumampawhattesa atooxoyd kula qhawho Paappona apaqhipa kolladhu kaasay ye kulakki okayni.
46 Hussakka qhawho Haallikko Appasi hiʼi qagha payyo qandhikka,
ho Haallikko Appasi hiʼi hossi usona kaanta okayi patta.
47 Dhuke dhuke an hune qalli:
qhawho Yeesi dhukkaysadhi qagho perre ye hume sheeghesiki sheeghi.
48 Ano yiʼo qaghito.
49 Appadhdhe haahundhi immandhito qaghana mennaasikki yiʼe,
naqharray iffarre;
50 yiʼossi moonthonu oodhdhi haadhi husi,
qhawho yiʼusi yiʼi ye farrikka.
51 Yiʼosi moonthonu oodhdhipa isi qagho teexa Ano,
qhawho yiʼunna yiʼa qagho perre ye hume sheeghekki qaakni,
piyye qhaatʼenu qagho qhamu kodhdhininu yiʼo Ano teexni sakanko hayyu.”
52 Korossi Ayhutattekka hasi payipa isi ille thamakadha:
“Ata qhawhu sakanko huusuusi mallali ine teexe alkasnipa yiʼooni?”
53 Hussa maallay Iyyesuse hasi na payi:
“Dhuke,
dhuke an hune qalli,
apayini sakanko Miʼaye Qhawhitonakki huni yionkuppa kʼeeqhte thuusuusikka isi huni qukonku payni qaghoosi huni sheeghte.
54 Qhawho sakanko hayyu yiʼapa kʼeeqhte thayyusikka isi quka kaasay qagho perre ye hume sheekesikki sheeghi,
Anokka kuyyaqkko dhikkattattena fartatte an uso haqisna.
55 Sakanko haayyu yiʼo dhukatte,
kʼeeqhte thaayyukka qukte dhukatte.
56 Qhawho sakanko hayyu yiʼapa kʼeeqhte thayyusikka isi quka yettaakki qaakni,
Anokka usottaakki an qaakni.
57 Qhamossi Paappo qaaghampakko ye erakipa Anokka Usottay ho qagha kodhdha kula qhawho sakanko hayyu yiʼa kaasakka Yettay qaaghampakko ikodhdhini.
58 Lammi yiʼossi moonthonu oodhdhi haadhi husi,
hussakka yiʼossi appadhdhe haahundhi yiʼe kula qandhikka,
he yiiʼussa yiʼekka iffarre,
naqharray qhawho yiʼusi yiina qagho perre ye hume sheeghekki qaakni.”
59 Iyyesuse olissaasi xayto inna qalli kathama Kʼifirnahoomenna manne ghissoote koro Ayhutattena kala kollisina.
Kʼaale qagho Perre Yehume Sheeghenna
60 Kolladhampawhessinna kittatte he kisha iʼolissaasi apaqhenna hasi paye:
“qallithi uumatti haxtina,
yaxa akkadhe alkasna?”
61 Iyyesusekka olhossi kolladhampawhe huusu na maallay qhurumrumesi saqakkottaakki upadhipa hasa na payu:
“Oliki hune dhappisna?
62 Ano Miʼaye Qhawhito xaytossi qharro anna qaghi kula an holipa isan hadhdhanaka ye hiite payni ata moʼo appaaynte?
63 Hokoronu qagho teexa Nasso Haallikkito,
sakanko kapay olho toʼokokakki ye koro kodhi,
Kʼallissa Ano hune qallikka Nassopa qagho.
64 Naqharray hunena kittatte koro tookko tookko hoye dhukkaysadhikki qagha”.
Iyyesuse olhu namaallay hasa payi,
heye Uso dhukkaysadhe koro yaxay qhamu kodhdheppa qhawho Uso likkasnapa teexukka yaxa qhamu kodhdhisa iʼara.
65 Nakaleemakka Iyyesuse hasi payi:
“Hussa maallakki hunena payina Paappokki ye uso alkasasu payni qhawho ye kula okaye alkasna ye qaghi.”
66 Xaysa tupettay kolladhampawhessi huusuna kittatte he kisha konankonnayye hole,
kuyyakussanu koru Iyyesuse kaleema ye ashshonki.
67 Hussa maallay Iyyesuse kolladhampawhessi 12 hasi na payi:
“Hunekka inta ashshe awoʼanku?”
68 Naqharray Simoonessi ana Petʼiroose an payi hasi payipa nu holasu:
“Pogholho,
ata yaxa kala ashshinani?
Atho kulay Kʼaale qagho perre ye hume sheeghenakki asheeghtiye.
69 Atho Kʼulkʼullithito Miʼaye Haallikkito qhama kodhdhitisa Ine kulay anho arrippa ho dhukkaysadhaaniye.”
70 Iyyesusekka ihholipa hasa na payu:
“Hunissa 12si Ano qaandhikki hune qholadhi?
Naqharray hunena kittatte qhawho tookko orrito”.
71 Olhunnu hasa payikka Miʼayessi Simiʼoone piyye Askʼoronthana ana Yihuta payi kolladhampawhessi hudhdhanpa lakkina kittatte ittookko kodhdhakka payni ho Iyyesusesi likkasnapa teexu uso qhooti kodhdhi maallay.